भारतीय स्वातंत्र्याचे अमृत महोत्सवी वर्ष व वसंतराव नाईक मराठवाडा कृषि विद्यापीठ स्थापनेच्या सुवर्ण महोत्सवी वर्षाचे औचित्य विद्यापीठांतर्गत असलेल्या लातूर येथील विलासराव देशमुख कृषी जैवतंत्रज्ञान महाविद्यालयात “जैवतंत्रज्ञान आणि जैवमाहिती तंत्रज्ञान साधनांचा पीक सुधारणेसाठी एकत्रित वापर” या विषयावर सात दिवसीय प्रशिक्षणाचे दिनांक २२ मार्च ते २९ मार्च दरम्यान आयोजित करण्यात आले, प्रशिक्षणाचे उदघाटन दिनांक २२ मार्च रोजी पार पडले. उदघाटन कार्यक्रमाच्या अध्यक्षस्थानी प्राचार्य प्रा. हेमंत पाटील हे होते. प्रमुख पाहुणे म्हणुन अंबाजोगाई कृषि महाविद्यालयाचे प्राचार्य डॉ.बी.एम.ठोंबरे हे होते.
अध्यक्षीय भाषणात प्रा हेमंत पाटील म्हणाले की, कृषी जैवतंत्रज्ञान व जैवमाहिती तंत्रज्ञानचे येणा-या काळात महत्व प्राप्त होणार असुन यात विद्यार्थ्यांना मोठय संधी आहेत. सदरील प्रशिक्षणात प्रात्याक्षिकांवर भर देण्यात आला असुन जैवतंत्रज्ञानाबाबत विद्यार्थ्यांतील कौशल्य विकसत होण्यास मदत होईल. मार्गदर्शनात डॉ.बी.एम.ठोंबरे यांनी जैवतंत्रज्ञान व जैवमाहिती तंत्रज्ञानाचा वापर होऊन भविष्यात शेतकऱ्यांच्या पिकाची गुणवत्ता व उत्पादन क्षमता वाढू शकेल असा विश्वास व्यक्त केला.
प्रशिक्षणाचे आयोजन कुलगुरू मा डॉ. अशोक ढवण व संचालक शिक्षण डॉ. धर्मराज गोखले यांच्या मार्गदर्शनानुसार करण्यात आले होते. प्रशिक्षणात कृषी जैवतंत्रज्ञान, कृषी वनस्पती रोगशास्त्र, व कीटकशास्त्र शाखेतील पदव्युत्तर शिक्षण घेणाऱ्या विद्यार्थ्यांना विविध विषयावर तज्ञ मंडळी मार्गदर्शन करणार आहेत. यात प्रामुख्याने कोरीया येथील जीओनसंग्य राष्ट्रीय विद्यापीठातील संशोधक डॉ. उल्हास कदम व डॉ. राहुल शेळके, अमेरिकेतील पॅसिफिक एज ग्रुपचे संचालक डॉ. बालाजी आगलावे, पुणे येथील सावित्रीबाई फुले विद्यापीठातील जैवमाहितीशास्त्रज्ञ डॉ. पायल घोष, डॉ. अमोल देठे, मोन्सॅन्टो शास्त्रज्ञ डॉ. संदीप दांगट, आदी तज्ञ मंडळी मार्गदर्शन करणार आहेत. कार्यक्रमाचे प्रास्ताविक प्रशिक्षण समन्वयक डॉ. राहुल चव्हाण यांनी केले. सुत्रसंचालन डॉ. दीप्ती वानखडे यांनी केले तर आभार डॉ. विद्या हिंगे यांनी मानले. जैवतंत्रज्ञान विभाग (भारत सरकार) यांच्या अर्थ सहाय्याने प्रशिक्षणाचे आयोजन करण्यात आले. प्रशिक्षण आयोजन समितीत प्रा. बी. एन. आगलावे, डॉ. विद्या हिंगे, डॉ. दीप्ती वानखडे, अभिजीत देशमुख आदींचा सहभाग आहे. कार्यक्रमास प्राध्यापक, कर्मचारी व विद्यार्थी मोठया संख्येने उपस्थित होते.