वसंतराव नाईक मराठवाडा कृषि विद्यापीठातील बायोमिक्स संशोधन आणि निर्मिती
केंद्रास दिनांक १७ एप्रिल रोजी माननीय
कुलगुरू प्रा. (डॉ.) इन्द्र मणि यांच्या प्रमुख उपस्थित विद्यापीठ कार्यकारी
परिषदेचे सदस्य तथा आमदार मा. श्री. सतीश चव्हाण आणि सदस्य मा. श्री. प्रविण
देशमुख यांनी भेट देऊन पाहणी केली. यावेळी विद्यापीठाचे संशोधन संचालक डॉ. खिजर
बेग, शिक्षण संचालक डॉ. भगवान आसेवार, विद्यापीठ अभियंता
श्री. दीपक कशाळकर, विभागप्रमुख डॉ. प्रफुल्ल घंटे व प्रभारी
अधिकारी डॉ. चंद्रशेखर अंबाडकर आदी उपस्थित होते.
या प्रसंगी बोलताना आमदार मा. श्री. सतीश चव्हाण यांनी शाश्वत शेतीमध्ये
बायोमिक्सचे योगदान अतिशय मोलाचे आहे, असे सांगितले. बायोमिक्स हे १४
प्रकारच्या उपयुक्त सूक्ष्मजीवांचे जैविक मिश्रण असून, त्याचा
उपयोग जमिनीत उपयुक्त अन्नद्रव्ये तयार करणे, कीड व रोग
नियंत्रण आणि पिकाचे एकूण उत्पादन तसेच दर्जा वाढविण्यासाठी होतो, असे त्यांनी स्पष्ट केले.
प्रभारी अधिकारी डॉ. चंद्रशेखर अंबाडकर यांनी या जैविक मिश्रणाविषयी
सविस्तर माहिती देताना सांगितले की, बायोमिक्सच्या वापरामुळे शेतकऱ्यांना
जमिनीजन्य रोग व विविध किडींवर प्रभावी नियंत्रण मिळते. यामुळे रासायनिक कीटकनाशक
आणि बुरशीनाशकांवरील खर्चात बचत होते. पिकाचे आरोग्य सुधारते आणि उत्पादनवाढीस
हातभार लागतो.
बायोमिक्स वनस्पती रोगशास्त्र विभाग, कृषि महाविद्यालय परभणी आणि
विद्यापीठाच्या विविध संशोधन केंद्रांवर भुकटी आणि विद्राव्य स्वरूपात उपलब्ध असून,
शेतकऱ्यांनी त्याचा लाभ घ्यावा, असे त्यांनी आवाहन
केले.
