वसंतराव नाईक मराठवाडा कृषि विद्यापीठांतील अखिल भारतीय समन्‍वयीत ज्‍वार सुधार प्रकल्‍पांतर्गत मानवत तालुक्‍यातील मौजे मानोली येथील शेतकरी बांधवाना आद्यरेषीय पिक प्रात्‍यक्षिकांतर्गत परभणी सुपर मोती व सीएसव्‍ही २९ आर या रब्बी ज्‍वारीचे बियाणे वाटप ज्‍वार संशोधन केंद्राचे प्रभारी अधिकारी डॉ के आर कांबळे यांच्‍या हस्‍ते दिनांक १५ ऑक्‍टोबर रोजी करण्‍यात आले. यावेळी प्रगतीशील शेतकरी श्री मदन महाराज शिंदे, ज्‍वार कृषि विद्यावेत्‍ता डॉ जी एम कोटे, शेषेराव शिंदे, रामराव शिंदे, विठ्ठल शिंदे आदींची उपस्थिती होती.
यावेळी रब्बी ज्‍वार लागवडीबाबत मार्गदर्शन करतांना डॉ के आर कांबळे म्‍हणाले की, संतुलीत आहारात ज्‍वारीचे महत्‍व असुन ज्‍वारीचा कडबा जनावरांसाठी चांगले खाद्य आहे. रब्बी करिता विद्यापीठ विकसित परभणी सुपर मोती हे वाण ज्‍वारी व कडब्‍याकरीता चांगला वाण आहे. तसेच खरीप हंगामातील परभणी शक्‍ती या वाणात लोह व जस्‍ताचे प्रमाण इतर वाणापेक्षा अधिक आहे. प्रास्‍ताविक डॉ जी एम कोटे यांनी केले, कार्यक्रमास गावातील शेतकरी बांधव मोठया संख्‍येने उपस्थित होते.