डिजिटल शेतीचे घडे गिरविण्‍याकरिता वनामकृविचे अकरा पदव्‍युत्‍तर विद्यार्थी थायलंडला रवाना

नापेह प्रकल्‍पांतर्गत विशेष उपक्रम

वसंतराव नाईक मराठवाडा कृषि विद्यापीठातील जागतिक बॅक आणि भारतीय कृषि अनुसंधान परिषद, नवी दिल्‍ली पुरस्‍कृत राष्‍ट्रीय कृषी उच्‍च शिक्षण प्रकल्‍पांतर्गत डिजिटल शेतीवर आधारीत प्रकल्‍प राबविण्‍यात येत असुन या प्रकल्‍पांतर्गत डिजिटल शेतीसंबंधीत शैक्षणिक आणि संशोधन उपक्रम राबविण्‍यात येत आहेत. प्रकल्‍पांर्गत विद्यापीठातील प्राध्‍यापक, संशोधक व विद्यार्थ्‍यांमध्‍ये डिजिटल शेती संबंधीत कौशल्‍य निर्मिती करणे हा मुख्‍य उद्देश आहे. याचाच एक भाग म्‍हणुन थायलंड येथील एशियन इन्स्टिट्यूट ऑफ टेक्नॉलॉजी या नामांकित संस्‍थेत विद्यापीठांतर्गत असलेल्‍या विविध महाविद्यालयातील अकरा पदव्‍युत्‍तर विद्यार्थ्‍यांना डिजिटल तंत्रज्ञान व त्‍याचा वापर या एक महिन्‍याच्‍या आयोजित प्रशिक्षण करिता दिनांक २६ फेब्रुवारी ते २६ मार्च दरम्‍यान पाठविण्‍यात आले आहे. सदर विद्यार्थ्‍यांचे पदव्‍युत्‍तर संशोधन हे डिजिटल तंत्रज्ञान व यांत्रिकीकरण यावर आधारित आहे.

सदर विद्यार्थींना शुभेच्‍छा देतांना विद्यापीठाचे कुलगुरू मा डॉ इन्द्र मणि म्‍हणाले की, परभणी कृषी विद्यापीठाच्‍या इतिहासात प्रथमच विद्यापीठाच्‍या वतीने विद्यार्थ्‍यांना परदेशात प्रशिक्षणास पाठविण्‍यात येत असुन यामुळे विद्यार्थ्‍यांना जागतिकस्‍तरावरील अद्ययावत तंत्रज्ञान अवगत करण्‍याची संधी प्राप्‍त होणार आहे. भविष्‍यात हे विद्यार्थी डिजिटल शेती करिता कुशल मनुष्‍यबळ म्‍हणुन आपले मोलाचे योगदान देणार आहेत. नुकतेच अमेरिकेतील चार नामांकित विद्यापीठांशी परभणी कृषि विद्यापीठांने सामजंस्‍य करार केले असुन दोन संशोधक प्राध्‍यापक अमेरिकेत प्रशिक्षण पुर्ण करून आले आहेत, लवकरच काही विद्यापीठ प्राध्‍यापक व संशोधक यांनाही पाठविण्‍यात येणार आहे. तसेच विद्यार्थीची दुसरा गट थायलंड, मलेशिया व स्पेन येथील नामांकित शैक्षणिक संस्‍थेत पाठविण्‍यात येणार असल्‍याचे ते म्‍हणाले. 

सदर विद्यार्थ्‍यांना पाठविण्‍यात करिता कुलगुरू मा डॉ इन्द्र मणि यांच्‍या मार्गदर्शनानुसार शिक्षण संचालक डॉ धर्मराज गोखले, कुलसचिव डॉ धिरजकुमार कदम, विद्यापीठ नियंत्रिका डॉ दिपाराणी देवतराज, प्रकल्‍पाचे मुख्‍य अन्‍वेषक डॉ गोपाल शिंदे, महाविद्यालयाचे प्राचार्य डॉ सय्यद ईस्‍माईल, डॉ उदय खोडके, डॉ राजेश क्षीरसागर, डॉ जया बंगाळे आदीसह विभाग प्रमुख, नाहेप प्रकल्‍पातील प्राध्‍यापक व कर्मचारी यांनी सहकार्य केले.

व्‍हॉलीबॉल स्‍पर्धेत वनामकृविच्‍या मुलीच्‍या संघास सुवर्ण पदक

हिसार (हरियाणा) येथील चौधरी चरण सिंह हरियाणा कृषी विद्यापीठात २१वी अखिल भारतीय आंतर कृषि विद्यापीठ स्‍पर्धा २०२२-२३ चे दिनांक २० फेब्रवारी ते २४ फेब्रुवारी दरम्‍यान आयोजन करण्‍यात आले होते. यात व्‍हॉलीबॉल स्‍पर्धेत वसंतराव नाईक मराठवाडा कृषि विद्यापीठाच्‍या मुलीच्‍या संघाने सुवर्ण पदक प्राप्‍त करून मानाचा तुरा रावला तसेच सर्वसाधारण गटातील चॅम्पियन्स ट्रॉफी प्राप्‍त केली. यावेळी चौधरी चरण सिंह हरियाणा कृषी विद्यापीठाचे कुलगुरू मा डॉ बी. आर. काम्‍बोज यांच्‍या हस्‍ते ट्रॉफी प्रदान करण्‍यात आली. सदर यशाबाबत कुलगुरू मा डॉ इन्‍द्र मणि, शिक्षण संचालक डॉ धर्मराज गोखले, कुलसचिव डॉ धिरजकुमार कदम, विद्यार्थी कल्‍याण अधिकारी डॉ सचिन मोरे आदींनी अभिनंदन केले. संघास डॉ आशाताई देशमुख, डॉ डि एफ राठोड, डॉ चौव्‍हान आदींनी मार्गदर्शन केले. सदर संघात मनोरमा देसाई, देवांशी हिवासे, प्रतिक्षा लोखंडे, ईशा वडसकर, ऋुतुजा नखाते, हर्षा मेशराम, सिमा लोहार, डिंपल राऊत, मेहक पठाण, गौतमी मोहिते आदीं खेळाडुचा समोवश होता. स्‍पर्धेत विविध क्रीडा प्रकारात देशातील कृषि विद्यापीठातील ६५ संघाने सहभाग नोंदविला होता.

नाविण्यपुर्ण संशोधनाचा उपयोग करुन युवकांनी उद्योजक व्हावे .... कुलगुरु मा. डॉ. इन्‍द्र मणि

राष्ट्रीय कृषी विकास योजनाच्‍या माध्‍यमातुन रफ्तार ही योजना शासन राबवित आहे, या शेतकऱ्यांच्या प्रयत्नांना बळ देऊन, जोखीम कमी करणे आणि कृषी व्यवसाय उद्योजकतेला चालना देऊन शेतीला फायदेशीर उपक्रम बनवणे हा हेतु असुन कौशल्य विकास आणि आर्थिक सहाय्याद्वारे नवकल्पना आणि कृषी-उद्योगांना प्रोत्साहन देण्यासाठी यात इनक्यूबेटीस केंद्र उभारणीस सहाय्य केले जाते. कृषि व्‍यवसायामध्‍ये नाविण्‍यपुर्ण संशोधनात्‍मक बाबींचा वापर होणे आवश्‍यक आहे, याकरिता कृषि शास्‍त्रज्ञांनी पुढे यावे. या योजनेकरिता मुंबई येथील केंद्रीय कापूस तंत्रज्ञान संशोधन संस्था ही नोडल संस्था असुन या उपक्रमांचा शेतकरी, विद्यार्थी व युवा शेतकरी यांनी लाभ घ्‍यावा, असे प्रतिपादन कुलगुरु मा डॉ. इन्‍द्र मणि यांनी केले.

वसंतराव नाईक मराठवाडा कृषि विद्यापीठ आणि अभाकृअप - केंद्रीय कापूस तंत्रज्ञान संशोधन संस्था, मुंबई यांच्या संयुक्त विद्यमाने दिनांक १७ फेब्रुवारी रोजी शेतकरी, शास्त्रज्ञ व विद्यार्थी यांचेकरिता “सिनर्जी ऑफ इनोव्हेशन अँड इन्क्युबेशन” (नाविण्यपुर्ण व उष्मायन यातील समन्वय) यावरील तांत्रिक चर्चासत्राचे आयोजन करण्यात आले होते, चर्चासत्राच्या अध्‍यक्षीय भाषणात ते बोलत होते. यावेळी शिक्षण संचालक डॉ. धर्मराज गोखले, संचालक संशोधन डॉ. दत्तप्रसाद वासकर, कृषि अभियांत्रिकी व तंत्रज्ञान महाविद्यालयाचे प्राचार्य डॉ. उदय खोडके आदींची प्रमुख उपस्थिती होती. 

सदर चर्चासत्रात केंद्रीय कापूस तंत्रज्ञान संशोधन संस्थेचे वरिष्ठ शास्त्रज्ञ डॉ. अशोककुमार भरीमल्ला, कृषि अभियंता डॉ. ज्योती ढाकणे आणि कृषि अभियंता डॉ. मनोज कुमार महावार यांनी राष्ट्रीय कृषि विकास योजना मधील विविध योजनेबद्दल माहिती दिली. सदरील योजनेत नाविण्यपुर्ण संशोधनात्मक बाबींसाठी अनुदानाकरिता अर्ज सादर करण्‍याबाबत मार्गदर्शन केले. चर्चासत्रात नॅनो सल्फर (गंधक) या विषयावर शास्त्रज्ञांसाठी तांत्रिक सत्रात मार्गदर्शन करण्‍यात आले. कार्यक्रमाचे आयोजक विभाग प्रमुख (कृषिविद्या) डॉ. वासुदेव नारखेडे व विभाग प्रमुख  (मृदाशास्त्र विभाग) डॉ. प्रविण वैद्य हे होते. कार्यक्रमाचे सुत्रसंचालन डॉ. पपीता गौरखेडे यांनी केले तर आभार डॉ. सुनिता पवार यांनी मानले. चर्चासत्रास विद्यार्थी, शेतकरी, शास्त्रज्ञ, प्राध्यापक मोठया संखेने उपस्थित होते.

वनामकृवि संशोधित कृषि अवजारे जास्‍तीत जास्‍त शेतकरी बांधवांपर्यंत पोहचली पाहिजेत .... कुलगुरू मा डॉ इन्द्र मणि

वनामकृविचा अमरावती येथील दुर्गा अॅग्रो वर्क्‍स सोबत सामंजस्य करार

वसंतराव नाईक मराठवाडा कृषि विद्यापीठातील पशुशक्‍तीचा योग्‍य वापर योजनेच्‍या वतीने लहान व मध्‍यम भुधारक शेतकरी बांधवाकरिता उपयुक्‍त अशी अनेक कृषी अवजारे विकसित करण्‍यात आली आहेत. शेतकरी बांधवामध्‍ये या अवजारांची मोठी मागणी होत आहे. याबाबींचा विचार करून सदर कृषी अवजारे जास्‍तीत जास्‍त शेतकरी बांधवापर्यंत पोहचण्‍याकरिता परभणी कृषि विद्यापीठांने आणि दर्यापुर (अमरावती) येथील दुर्गा अॅग्रो वर्क्‍स यांच्यात दिनांक १६ फेब्रुवारी रोजी सामंजस्य करार करण्यात आला. विद्यापीठ विकसित १४ कृषी अवजारे निर्मितीचा अधिकार सदर दुर्गा अॅग्रो वर्क्‍स यांना देण्‍यात आले आहेत. सदर सामंजस्‍य कराराचा कार्यक्रम कुलगुरू मा डॉ इन्द्र मणि यांच्‍या अध्‍यक्षेतखाली पार पडला.  याप्रसंगी संचालक संशोधन डॉ दत्‍तप्रसाद वासकर, कुलसचिव डॉ. धिरज कदम, विद्यापीठ नियंत्रिका श्रीमती दिपाराणी देवतराज, सहयोगी अधिष्‍ठाता डॉ. उदय खोडके, योजनेच्या प्रमुख डॉ. स्मिता सोलंकी, विभाग प्रमुख डॉ.  राहुल रामटेके, कृषी उद्योजक दुर्गा अॅग्रो  वर्क्‍सचे श्री सुरज चंदेल आदींची उपस्थिती होती.

कुलगुरू मा डॉ इन्‍द्र मणि म्‍हणाले की, परभणी कृषी विद्यापीठाने अनेक कृषी अवजारे संशोधित केलेली आहेत, ही अवजारे जास्‍तीत जास्‍त शेतकरी बांधवा उपलब्‍ध होण्‍याकरिता या अवजारांची दर्जेदार निर्मिती करून किफायतशीर दरात उपलब्‍ध करण्‍याची गरज लक्षात घेता, सदर सामंजस्‍य करार महत्‍वाचा आहे. केवळ कृषी अवजारे संशोधीत करून उपयोगाचे नसुन ती शेतकरी बांधवापर्यंत पोहचली पाहिजेत.  

वनामकृवित छत्रपती शिवाजी महाराज जयंती उत्‍साहात साजरी

छत्रपती यांचा इतिहास संपुर्ण जगाला प्रेरणादायी ...... कुलगुरू मा डॉ इन्‍द्र मणि

छत्रपती शिवाजी महाराजांनी सर्व जातीधर्मातील माणसांना सोबत घेऊन स्‍वराज्‍य स्‍थापन केले. छत्रपतींनी स्‍वराज्‍यासाठी आखलेली धोरणे, प्रशासन, युध्‍दनिती, सुसंघटन, रयतेच्‍या कल्‍याणासाठी केलेले कार्य आजही प्रेरणादायी आहे. छत्रपती शिवाजी महाराजांना घडविण्‍यात मोलाचे योगदान त्‍यांची आई राजमाता जिजाऊ यांचे आहे. छत्रपती यांचा इतिहास संपुर्ण जगाला प्रेरणा देणार असुन आजच्‍या युवकांनी त्‍यांच्‍या चरित्राचा अभ्‍यास करून त्‍यांचे विचार आचरणात आणावेत, असा सल्‍ला कुलगुरू मा. डॉ इन्‍द्र मणि यांनी दिला.

वसंतराव नाईक मराठवाडा कृषि विद्यापीठातील विद्यार्थ्‍यी कल्‍याण अधिकारी कार्यालयाच्‍या वतीने दिनांक १९ फेब्रुवारी रोजी छत्रपती शिवाजी महाराज जयंती साजरी करण्‍यात आली, कार्यक्रमाच्‍या अध्‍यक्षस्‍थानावरून ते बोलत होते तर व्‍यासपीठावर शिक्षण संचालक डॉ. धर्मराज गोखले, संशोधन संचालक डॉ दत्‍तप्रसाद वासकर, विस्‍तार शिक्षण संचालक डॉ देवराव देवसरकर, कुलसचिव डॉ धिरजकुमार कदम, विद्यापीठ नियंत्रक श्रीमती दिपाराणी देवतराज, प्राचार्य डॉ सय्यद ईस्‍माइल, प्राचार्य डॉ उदय खोडके, प्राचार्य डॉ राजेश क्षीरसागर, प्रा. दिलीप मोरे, विद्यार्थी कल्‍याण अधिकारी डॉ सचिन मोरे आदींची प्रमुख उपस्थिती होती. यावेळी कुलगुरू मा. डॉ इन्‍द्र मणि यांच्‍या हस्‍ते छत्रपती शिवाजी महाराजांच्‍या प्रतिमेचे पुजन करून विनम्र अभिवादन करण्‍यात आले. यावेळी ढोल-ताशाच्‍या गजरात छत्रपती शिवाजी महाराज यांच्‍या मुर्तीची विद्यापीठ परिसरात मिरवणुक काढण्‍यात आली. कार्यक्रमाचे प्रास्‍ताविक डॉ सचिन मोरे यांनी केले, सुत्रसंचालन आशिष देवकर यांनी केले तर आभार शंकर भासवंडे यांनी मानले. कार्यक्रमास विद्यापीठातील अधिकारी, प्राध्‍यापक, कर्मचारी व विद्यार्थ्‍यी मोठया संख्‍येने उपस्थित होते.

संपुर्ण मराठवाडयाकरिता स्‍थळ निहाय डिजिटल मृदा नकाशे तयार करण्‍यात येऊन मातीच्‍या प्रकारानुसार पिकांची निवड करणे होणार शक्‍य

नागपुर येथील भाकृअप- राष्ट्रीय मृदा सर्वेक्षण व भुमी उपयोग नियोजन संस्थेशी वनामकृविचा सामंजस्‍य करार

नागपुर येथील भारतीय कृषी अनुसंधान परिषदेची राष्ट्रीय मृदा सर्वेक्षण व भुमी उपयोग नियोजन संस्था व वसंतराव नाईक मराठवाडा कृषि विद्यापीठ यांच्यात दिनांक १६ फेब्रुवारी रोजी सामंजस्य करार करण्यात आला. करारावर कुलगुरू मा. डॉ. इन्‍द्र मणि, राष्ट्रीय मृदा सर्वेक्षण व भुमी उपयोग नियोजन संस्थेचे संचालक डॉ. बी. पी. भास्कर, संचालक संशोधन डॉ. दत्तप्रसाद वासकर आणि मृद विज्ञान व कृषि रसायनशास्त्र विभागाचे विभाग प्रमुख डॉ. प्रविण वैद्य यांनी स्‍वाक्षरी केल्‍या. यावेळी विद्यापीठ कार्यकारी परिषदेचे सदस्‍य विधान परिषद सदस्‍य मा आ श्री सतीश चव्‍हाण, विधान परिषद सदस्‍य मा आ श्री रमेशराव कराड, विधानसभा सदस्‍य मा आ श्री अभिमन्‍यु पवार, शिक्षण संचालक डॉ. धर्मराज गोखले आदींची प्रमुख उपस्थिती होती.

शाश्‍वत शेतीकरिता मातीचा कार्यक्षम वापर करणे आवश्‍यक आहे. सदर करारामुळे संशोधन व सर्वेक्षणाच्‍या माध्‍यमातुन दोन्‍हा संस्‍था रिमोट सेन्सिंग, भौगोलिक माहिती प्रणाली (जीआयएस), उपग्रह या आधुनिक तंत्रज्ञानाचा उपयोग करून संपुर्ण मराठवाडा विभागातील प्रत्‍येक ठिकाणाचा डिजिटल मृदा नकाशे तयार करणार आहेत, या संशोधनाव्‍दारे निर्णय समर्थन प्रणाली विकसित करण्‍यात येणार आहे, ही निर्ण प्रणाली मुळे शेतकरी बांधवाना मातीच्‍या गुणधर्मानुसार योग्‍य पिकांची लागवड निवड व जमिन वापराचे काटेकोर नियोजन शक्‍य होणार आहे. मृदा स्‍थळ उपयुक्तता, मातीची सुपीकता, स्‍थळनिहाय विशिष्ट माती आणि अन्‍नद्रव्‍य व्यवस्थापन याकरिता ही प्रणाली मार्गदर्शक ठरेल. कराराच्‍या माध्‍यमातुन दोन्‍ही संस्‍थेतील वैज्ञानिक यांचे ज्ञान, माहिती आणि कौशल्‍य यांची देवाणघेवाण करण्‍यात येऊन पदव्‍युत्‍तर विद्यार्थ्‍यांच्‍या मृदा संशोधनासही हातभार लाभणार असुन संशोधन लेखांची गुणवत्ता वाढविण्याकरिता संधी प्राप्त होणार आहे.

परभणी कृषि महाविद्यालयाच्‍या माजी विद्यार्थ्‍यांनी घेतली वसतीगृहातील खोलीची नुतनीकरणाची जबाबदारी

परभणी कृषि महाविद्यालयाप्रती माजी विद्यार्थ्‍यांनी श्री अनंत चोंदे यांनी व्‍यक्‍त केली कृतज्ञता

वसंतराव नाईक मराठवाडा कृषि विद्यापीठातील परभणी कृषी महाविद्यालयाची स्‍थापना सन १९५६ साली झाली, या महाविद्यालयाचे ग्रीष्‍म व वसंत वसतीगृहाच्‍या बांधकामास ६० पेक्षा जास्‍त वर्षे पुर्ण झाली असुन करोनाच्‍या काळात वसतीगृहातील खोलींची अवस्था खराब झाली. या वसतीगृहातुन अनेक विद्यार्थी घडले असुन देशात व राज्‍यात विविध पदावर राहुन आपले योगदान देत आहे. अनेक माजी विद्यार्थी आजही वसतीगृहास भेट देऊन महाविद्यालयातील आठवणींना उजळा देतात, याच ग्रीष्‍म वसतीगृहातीत खोली क्र ४२ मध्‍ये वास्‍तव्‍यास असणारे सन १९९२ बॅचचे कृषि पदवीचे माजी विद्यार्थी तथा विद्यापीठ कार्यकारी परिषदेचे माजी सदस्य मा श्री. अनंत चोंदे यांनी स्‍वखर्चातुन सदर खोलीचे नुतनीकरण करण्‍याचा संकल्‍प केला. यातुन महाविद्यालयाप्रती आपली कृतज्ञता व्‍यक्‍त केली. सदर खोलीचे नुतनीकरणाच्‍या कामाचे उद्घाटन कुलगुरू मा डॉ. इन्‍द्र मणि यांच्या दिनांक १६ फेब्रुवारी रोजी हस्ते करण्‍यात आले, या खोलीचे नुतनीकरण करुन दिनांक २५ फेब्रुवारी रोजी लोकार्पण करण्याचे ठरले आहे. यावेळी कुलगुरू मा डॉ इन्‍द्र मणि यांनी महाविद्यालयाप्रती सामाजिक बांधिलकी जपुन माजी विद्यार्थी श्री अनंत चोंदे यांनी स्‍वखर्चातुन नुतनीकरणाच्‍या संकल्‍पाचे कौतुक केले.   

याप्रसंगी माजी विद्यार्थी श्री अनंत चोंदे, विद्यापीठ कार्यकारी परिषदेचे सदस्‍य मा. श्री. विठ्ठलराव सकपाळ, मा. श्री. सुरज जगताप, मा. डॉ. दिलीपराव देशमुख, मा. श्री प्रविण देशमुख, मा. डॉ. अदितीताई सारडा, मा. श्री भागवतराव देवसरकर, मा. माननीय कृषि मंत्री यांचे विशेष कार्यकारी अधिकारी मा श्री. देवळाणकर, महाविद्यालयाचे माजी विद्यार्थी शिक्षण संचालक डॉ. डी. एन. गोखले, कुलसचिव डॉ धिरजकुमार कदम, प्राचार्य डॉ. सय्यद ईस्माईल, विद्यापीठ अभियंता श्री दीपक काशळकर, मुख्‍य वसतीगृह अधिक्षक डॉ. आर. पी. कदम, विद्यापीठ उपअभियंता डॉ. डी. डी. टेकाळे आदींची उपस्थिती होती.

कार्यक्रमास सहाय्यक वसतीगृह अधिक्षक प्रा. आर. सी. सावंत, प्रा. जी. एन. गोटे,  श्री एस. आर. सोनटक्के, स.ईरफान, श्री ए.टी. आसेगावकर, मलिक पठाण, शेख कासिम, परसराम ढगे, बाबुराव शिंदे, महाजन, जोधंळे, विष्णु ढगे, ढोणे, स्वराज रोडे, ओमकार महाकाळ, डोनोडे, सोनके, केंद्रे, अधागळे, भुमकर, शशांक पाटील, आंबुरे, फडतारे आदीसह विद्यार्थी व वसतिगृह अधिकारी, कर्मचारी मोठया संख्‍येने उपस्थित होते.