महाराष्ट्रातील तुरीचा पहिला संकरित वाण (बिडिएनपीएच १८-५) वनामकृविद्वारा विकसित

 शेतकऱ्यांसाठी हा संकरित वाण लवकरच उपलब्ध करण्यात येईल.....मा. कुलगुरू डॉ. इन्द्र मणि

वसंतराव नाईक मराठवाडा कृषि विद्यापीठाच्या बदनापूर येथील कृषि संशोधन केंद्राद्वारे विकसित करण्यात आलेला तुरीचा बिडिएनपीएच १८ - ५ या संकरित वाणास अखिल भारतीय समन्वित संशोधन प्रकल्प खरीप कडधान्य, कानपूरद्वारा इक्रीसॅट, हैद्राबाद येथे घेण्यात आलेल्या वार्षिक समूह बैठकीत मान्यता देण्यात आली असून या वाणाची शिफारस महाराष्ट्रासह भारताच्या मध्य विभागासाठी करण्यात आलेली आहे. विशेष बाब म्हणजे महाराष्ट्रातील कृषि विद्यापिठाद्वारे शिफारस करण्यात आलेला हा पहिलाच तुरीचा संकरित वाण आहे. वसंतराव नाईक मराठवाडा कृषि विद्यापीठाच्या बदनापूर येथील कृषि संशोधन केंद्राने यापूर्वी तुरीच्या वाणाच्या विकासामध्ये राष्ट्रीय पातळीवर अनेक विक्रम केलेले आहेत आणि बिडिएनपीएच १८-५ या संकरित वाणामुळे शेतकऱ्यांची भरीव आर्थिक उन्नती साधता येईल. शेतकऱ्यांसाठी हा संकरित वाण लवकरच उपलब्ध करण्यात येईल असे मा. कुलगुरू डॉ. इन्द्र मणि यांनी नमूद केले.

या वाणाची उत्पादकता १७५९ ते २१५९ किलोग्रॅम प्रति हेक्टरी इतकी असून हा वाण १५५ ते १७० दिवसात तयार होतो. दाण्याचा रंग पांढरा असून मर आणि वांझ या तुरीच्या प्रमुख रोगांकरिता हा वाण मध्यम प्रतिकारक आहे. तसेच किडींना कमी बळी पडतो.

सदर वाण विकसित करण्यामध्ये वसंतराव नाईक मराठवाडा कृषि विद्यापीठाचे माननीय कुलगुरू डॉ. इन्द्र मणि, संशोधन संचालक डॉ. खिजर बेग, माजी संशोधन संचालक डॉ. दत्तप्रसाद वासकर, शिक्षण संचालक डॉ. उदय खोडके आणि विस्तार शिक्षण संचालक डॉ. धर्मराज गोखले यांच्या मार्गदर्शनाखाली डॉ. डी. के. पाटील, डॉ. व्ही. के. गीते या शास्त्रज्ञांनी डॉ. के. टी. जाधव, प्रशांत सोनटक्के, डॉ. पी ए पगार आणि डॉ ज्ञानेश्वर मुटकुळे यांच्या सहकार्याने हा वाण प्रसारित केला. या वाण प्रसारामुळे विद्यापीठामध्ये उत्सहाचे वातावरण निर्माण झाले असून विद्यापीठाच्या सर्व महाविद्यालाचे सहयोगी अधिष्ठाता, विभाग प्रमुख, प्राध्यापक, अधिकारी आणि कर्मचारी यांनी कृषि संशोधन केंद्राच्या शास्त्रज्ञांच्या चमूचे अभिनंदन केले.

VNMKV developed the first hybrid variety of pigeon pea (BDNPH 18-5) in Maharashtra

 This hybrid variety will soon be made available to the farmers....Dr. Indra Mani, Hon. Vice-Chancellor.

The hybrid pigeon pea variety BDNPH 18-5, developed by the Agricultural Research Center at Badnapur, under Vasantrao Naik Marathwada Krishi Vidyapeeth Parbhani, has been approved by the All India Coordinated Research Project on Kharif Pulses, ICAR –IIPR Kanpur, in the annual group meeting held at ICRISAT, Hyderabad during 27-29 May. This variety has been recommended for the central zone of India, including Maharashtra. Notably, it is the first hybrid pigeon pea variety ever developed by any Agricultural Universities in Maharashtra. The Agricultural Research Center at Badnapur, under Vasantrao Naik Marathwada Krishi Vidyapeeth Parbhani, has previously achieved many national records in the development of pigeon pea varieties. The hybrid variety BDNPH 18-5 is expected to significantly enhance the economic prosperity of farmers. Dr. Indra Mani, Hon. Vice-Chancellor stated that this hybrid variety will soon be made available to the farmers.

The productivity of this variety ranges from 1759 to 2159 kg/ha, and it matures in 155 to 170 days. The seeds are white in color, and the variety shows moderate resistance to the major diseases of pigeon pea, such as wilt and sterility mosaic disease, and is also less susceptible to pests.

Variety was developed under the valuable guidance of Dr. Indra Mani, Hon.Vice-Chancellor, Dr. K. S. Baig, Director of Research, Dr. Dattaprasad Waskar, Former Director of Research, Dr. Uday Khodke, Director of Education and Dr. Dharmaraj Gokhale, Director of Extension Education by the scientists Dr. D. K. Patil and Dr. V. K. Gite, with the assistance of Dr. K. T. Jadhav, Prashant Sontakke, Dr. P. A. Pagar, and Dr. Dnyaneshwar Mutkule, played a crucial role in the development of this variety. Due to this variety development created an enthusiastic atmosphere in the University. All Associate Deans, Heads, Professors, Officers, and Staff of the University's have congratulated the team of scientists of the Agricultural Research Center, Badnapur.

वनामकृवि विकसित बियाणे खरेदीस शेतकऱ्यांचा उत्तम प्रतिसाद

  शेतकऱ्यांना बियाणे उपलब्धतेसाठी माननीय कुलगुरू डॉ. इन्द्र मणि सतत प्रयत्नशील

खरीप हंगामाच्या नियोजनातील महत्त्वाचा टप्पा म्हणजे बियाणे खरेदी. यावर्षी शेतकऱ्यांनी बियाणे खरेदीसाठी वसंतराव नाईक मराठवाडा कृषि विद्यापीठ विकसित सोयाबीन, तूर, ज्वार आणि मुगाचे बियाणे खरेदी करण्यासाठी प्रथम पसंती दिली आणि दिनांक १८ मे रोजी वसंतराव नाईक मराठवाडा कृषि विद्यापीठ परभणीच्या ५२ व्या वर्धापन दिनानिमित्ताने विस्तार शिक्षण संचालनालय आणि कृषि विभाग यांच्या संयुक्त विद्यमाने आयोजित खरीप पीक परिसंवाद आणि कृषि प्रदर्शनाच्या दिवशी बियाणे विक्रीस सुरुवात होणार असल्यामुळे कार्यक्रमामध्ये मुख्यतः मराठवाड्यातील आठही जिल्ह्यासह महाराष्ट्रातून जवळपास ५००० शेतकऱ्यांनी सहभागी नोंदविला आणि यापैकी १८०० शेतकऱ्यांनी बियाणे खरेदी केले. विद्यापीठाद्वारे यावर्षी प्रथमच ११७८ क्विंटल खरीप पिकांचे सत्‍यतादर्शक बियाणे (७९५७ बॅग) उपलब्ध करून देण्यात आलेले होते. विद्यापीठाची परभणी येथील मध्यवर्ती प्रक्षेत्राची जमीन पेरणी योग्य केल्यामुळे बीजोत्‍पादनात वाढ झाली.  कृषि विद्यापीठाने मूलभूत आणि पैदासकार बियाणे उत्पादित करून, त्याचा पुरवठा महाबीज, राष्ट्रीय बीज निगम, शेतकरी उत्पादक कंपन्या आणि खाजगी बियाणे उत्पादक कंपन्यांना करावा. जेणेकरून या कंपन्या मूलभूत आणि पैदासकार बियाण्यांपासून पायाभूत व प्रमाणित बियाणे उत्पादित करून त्याचा शेतकऱ्यांना पुरवठा करतील, या पद्धतीने विद्यापीठाची बियाणे विक्री केली जाते. यादृष्टीने विद्यापीठाचे माननीय कुलगुरू डॉ. इन्द्र मणि हे शेतकरी देवो भव या भावनेने व शेतकऱ्यांचे हित प्रथम पाहून कार्यपद्धती अवलंबून असल्यामुळे विद्यापीठाच्या संशोधन संचालनालयाद्वारे अधिकाधिक बियाणे शेतकऱ्यांना उपलब्ध करून देण्यासाठी सतत प्रयत्नशील आहेत.

याकरिता विद्यापीठाने २६२ महाबीज सह इतर बियाणे कंपन्या आणि शेतकरी उत्पादक कंपन्यासोबत सामंजस्य करार केलेले आहेत. विद्यापीठाने आजपर्यंत सोयाबीनचे १३ वाण विकसित केलेले असून मराठवाड्यामध्ये विद्यापीठाच्या सोयाबीनच्या वाणाखाली ४० ते ५० टक्के क्षेत्र आहे तर तुरीचा बीडीएन-७११ या अतिशय नावाजलेल्या वाणाची ५०% पेक्षा जास्त क्षेत्रावर पेरणी केली जाते. या वाणासह इतर सर्व वाणांच्या बीजोत्पादनसाठी यावर्षी संशोधन संचालक डॉ. खिजर बेग, बीजोत्पादन संचालक डॉ. देवराव देवसरकर, विस्तार शिक्षण संचालक डॉ धर्मराज गोखले, शिक्षण संचालक डॉ. उदय खोडके यांच्या मार्गदर्शनाखाली बीजोत्पादन सहसंचालक डॉ. एस. पी. मेहेत्रे, मध्यवर्ती प्रक्षेत्राचे प्रभारी अधिकारी डॉ. व्ही. के. खर्गखराटे,  प्रभारी अधिकारी डॉ. संतोष शिंदे, डॉ. भानुदास भोंडे, डॉ. अमोल मिसाळ आणि त्यांच्या सहकाऱ्यांनी अतिशय उत्कृष्ट नियोजन करून बियाणे विक्रीसाठी उपलब्ध करून दिले.

बियाणे विक्रीच्या पहिल्या दिवशी (दि. १८ मे) १८०० शेतकऱ्यांनी उत्स्फूर्त प्रतिसाद देऊन ४१८.२६ क्विंटल बियाणे खरेदी केले तर दुसऱ्या दिवशी म्हणजे दिनांक २० मे रोजी १९६.५२ क्विंटल बियाण्याची खरेदी केली आणि दिनांक २१ मे रोजी ५६३.२२ क्विंटल बियाणे शेतकऱ्यांना खरेदीसाठी उपलब्ध राहिले आहे यामध्ये सोयाबीन पिकाचे एमएयुएस १५८ आणि एमएयुएस १६२ हे वाण उपलब्ध असून तुरीचा बीडीएन-१३-४१ ( गोदावरी), ज्वारीचा परभणी शक्ती आणि मुगाचा बीएम २००३-२ हे वाण उपलब्ध आहेत.

वसंतराव नाईक मराठवाडा कृषि विद्यापीठ व वाव गो ग्रीन यांच्याद्वारे जांभ येथे संत्रा बागेवर ड्रोनद्वारे फवारणी प्रात्यक्षिक

शेतीतील विविध कामांपैकी फवारणी अत्यंत महत्त्वाचे काम असून त्याकरिता पारंपारिक पद्धतीचा वापर केल्याने शेतकऱ्यांना बऱ्याच अडचणींना सामोरे जावे लागत आहे. वेळेवर मजूर मिळत नाही, पिकास किडी किंवा रोग लागल्यावर वेळेच्या आत फवारणी होत नाही, मुजरावर व औषधीवर अवाढव्य खर्च करूनही पिकाच्या परिस्थितीनुसार बऱ्याच वेळेस सापाची भीती असते तसेच फळबाग व इतर पिकांची उंची इत्यादीबाबीमुळे प्रभावीपणे वेळेवर फवारणी करणे शक्य होत नाही. त्यामुळे खर्च करूनही शेतीचे गणित बिघडते व उत्पादनात घट येते. शेतकऱ्यांच्या या अडचणी पाहता राष्ट्रीय पातळीवर ड्रोन करीता सल्ला देणारे वसंतराव नाईक मराठवाडा कृषि विद्यापीठाचे माननीय कुलगुरू डॉ. इन्द्र मणि यांनी शेतकऱ्यांकरिता डॉ. शंकर गोयंका यांची गो ग्रीन कृषी विमान, हरियाणा या कंपनीशी शेतकऱ्यांना भाडेतत्वावर ड्रोन द्वारे फवारणी करता यावी याकरिता सामंजस्य करार केला. त्या अनुषंगाने आज जांब येथील श्री सुरेश रेंगे यांच्या संत्रा बागेत अडीच एकर वर फवारणी करून प्रात्यक्षिक देण्यात आले. विद्यापीठाच्या वतीने डॉ. स्मिता सोलंकी यांनी ड्रोन हाताळणी आणि उपयुक्तता यावर उपस्थित शेतकऱ्यांना मार्गदर्शन केले. यावेळी सहाय्यक प्राध्यापक डॉ. अनंत लाड, श्री अनिल हरकळ, डॉ.योगेश म्हात्रे तसेच वाव गो ग्रीन कंपनीचे श्री कोल्हे, श्री राहुल मगदूम आदींची उपस्थिती होती. ड्रोन पायलट आर्यवीर ठाकूर यांनी शेतकऱ्यांना ड्रोन प्रात्यक्षिक करून दाखवले. शेवटी शेतकऱ्यांशी चर्चा करून त्यांचे शंका समाधान केले. परिसरातील ५० पेक्षा अधिक शेतकऱ्यांनी   अडीच एकर वरील संत्रा बागेत फवारणीचा प्रत्यक्ष अनुभव घेण्यासाठी सहभागी होवून उत्तम उत्स्फूर्त प्रतिसाद दिला आणि विद्यापीठांनी शेतकऱ्यांकरिता तंत्रज्ञान त्यांच्या बांधावर आणून अवगत केल्याने विद्यापीठाचे आभार मानले व उपस्थित शेतकऱ्यांनी या तंत्रज्ञानामुळे शेतकऱ्यांचा वेळ पैसे व होणारे काबाडकष्ट हे कमी होऊन तरुण शेतकऱ्यांना नक्कीच या नवीन तंत्रज्ञानाद्वारे रोजगार उपलब्ध होईल अशी भावना उपस्थितांनी व्यक्त केली.

वनामकृवि अंतर्गत रस्त्याचे मजबुतीकरण आणि डांबरीकरणाचे काम प्रगतीपथावर

विद्यापीठाचे माननीय कुलगुरू डॉ. इन्द्र मणि यांनी केले कामाचे निरीक्षण

वसंतराव नाईक मराठवाडा कृषि विद्यापीठ, परभणी अंतर्गत असलेल्या रस्त्यांची अवस्था मागील काही वर्षापासून अतिशय खराब होती. या रस्त्याच्या दुरुस्तीसाठी महाराष्ट्र शासनाने २६ किलोमीटर लांबीचे अंतर्गत रस्ते मजबुतीकरणास आणि डांबरीकरणास मंजुरी दिली होती. या कामाचा शुभारंभ माननीय कुलगुरू डॉ. इन्द्र मणि यांच्या शुभहस्ते करण्यात आला होता. हे काम सध्या प्रगतीपथावर असून विहित मुदतीमध्ये पूर्ण करण्यात येवून विद्यापीठातील वाहतूक सुखकर होणार आहे. या कामाचा दर्जा अद्यावत मानकाप्रमाणे अतिशय उत्कृष्ट राहण्याच्या दृष्टीने संबंधित यंत्रणेस आणि बांधकाम कंत्राटदारास माननीय कुलगुरू हे सातत्याने निर्देश देत असतात. कामाच्या गुण नियंत्रणासाठी विद्यापीठ पातळीवर गुण नियंत्रण समिती गठीत केलेली आहे, त्यांच्याद्वारे कामाचे नियमित निरीक्षण केले जाते. याबरोबरच प्रत्यक्ष कामाच्यास्थळी जावून विद्यापीठाचे माननीय कुलगुरू डॉ. इन्द्र मणि आणि महाराष्ट्र राज्य रस्ते संशोधन संस्था, सार्वजनिक बांधकाम विभाग, नाशिक यांचे गुणनियंत्रण कार्यकारी अभियंता व त्यांचा चमू तसेच विद्यापीठ पातळीवर गठीत केलेल्या गुणनियंत्रण परीक्षण समिती यांनीही यापूर्वी  निरीक्षण केले होते व रस्त्याचे काम मानकाप्रमाणे आणि समाधानकारक होत असल्याची प्रतिक्रिया सर्व सदस्यांनी दिल्या होत्या. तसेच दिनांक १९ मे रोजी प्रत्यक्ष कामाच्यास्थळी जावून विद्यापीठाचे माननीय कुलगुरू डॉ. इन्द्र मणि आणि शिक्षण संचालक डॉ. उदय खोडके, संशोधन संचालक डॉ. खिजर बेग आणि उप-विद्यापीठ अभियंता डॉ. दयानंद टेकाळे यांनी निरीक्षण केले आणि रस्त्याचे काम मानकाप्रमाणे आणि समाधानकारक होत असल्याची प्रतिक्रिया देवून योग्य दिशेने प्रगतीपथावर असल्याचे नमूद केले. 

वनामकृविच्या ५२ व्या वर्धापन दिनानिमित्त आयोजित परिसंवादानंतर शेतकऱ्यांनी घेतला रुचकर मेजवानीचा आनंद

 विद्यापीठाच्या जैवसमृद्ध ज्वार व  बाजरा, गहू, भाजीपाला यांचा मेजवानी तयार करण्यासाठी केला उपयोग

वसंतराव नाईक मराठवाडा कृषि विद्यापीठाच्‍या ५२ व्या वर्धापन दिनानिमित्त विस्‍तार शिक्षण संचालनालय व कृषि विभाग, महाराष्‍ट्र शासन यांच्‍या संयुक्‍त विद्यमाने दिनांक १८ मे रोजी आयोजित खरीप पीक परिसंवाद आणि कृषि प्रदर्शनाचे आयोजन केले होते. या कार्यक्रमाची सुरुवात विद्यापीठ विकसित बियाणांच्या विक्रीने होणार होती. यामुळे शेतकरी सकाळ पासूनच विद्यापीठ परिसरात उपस्थित झाले होते. शेतकऱ्यांनी बियाणांची खरेदी केली आणि कृषि प्रदर्शनाच्या दालनास भेटी देऊन परिसंवादात सहभागी झाले आणि मान्यवरांचे मार्गदर्शन तसेच तज्ज्ञांचा शेती सल्ला घेतला. यानंतर माननीय कुलगुरू डॉ. इन्द्र मणि यांच्या संकल्पनेतून विद्यापीठ विकसित आणि उत्पादित अन्नधान्य तसेच भाजीपाला पिकापासून विद्यापीठ अधिकाऱ्यांच्या निरीक्षणाखाली घरच्यासारखा स्वयंपाक करून सहभागी शेतकरी आणि मान्यवरांना दुपारच्या मेजवानी देण्याचे प्रथमच ठरविण्यात आले होते. त्यासाठी विद्यापीठ विकसित आणि राष्ट्रीय पातळीवर नावाजलेले तसेच शेतकऱ्यांमध्ये लोकप्रिय असलेल्या ज्वार आणि बाजरीचे जैव समृद्ध वाणाच्या भाकरी आणि गव्हाच्या वाणाचा चपात्या आणि भाजीसाठी विद्यापीठ विकसित वांगे, टोमॅटो, लसूण, कांदा यांचा वापर करून 'रुचकर स्वयंपाक' विद्यापीठाने माननीय कुलगुरू डॉ. इन्द्र मणि यांच्या निर्देशानुसार विस्तार शिक्षण संचालक डॉ. धर्मराज गोखले आणि संशोधन संचालक डॉ. खिजर बेग यांच्या मार्गदर्शनाखाली गठीत केलेल्या भोजन समितीचे अध्यक्ष तथा बिजोत्पादन संचालक डॉ. एस. पी. मेहत्रे व सदस्य सचिव डॉ. व्ही.के. खर्गखराटे आणि समिती सदस्यांच्या निगराणीखाली तयार करण्यात आला होता. स्वयंपाक सुरु असताना माननीय कुलगुरू डॉ. इन्द्र मणि आणि संशोधन संचालक डॉ. खिजर बेग यांनी भेट देवून पाहणी केली होती. या रुचकर, स्वादिष्ट आणि पौष्टिक मेजवानीची जवळपास ५००० शेतकरी बांधवासह परिसंवादास उपस्थित मान्यवरांनी आनंद घेतला आणि समाधान व्यक्त केले. मेजवानीमुळे शेतकरी आणि मान्यवरांमध्ये विद्यापीठाप्रती आपुलकीची भावना निर्माण झाली आणि भविष्यासाठी यातून विद्यापीठाच्या कार्याला ऊर्जा मिळाली. या नावीन्य उपक्रमामुळे विद्यापीठांमध्ये आनंदाचे आणि उत्साहाचे वातावरण तयार झाले. शेतकऱ्यांची जवळपास ५००० संख्या आणि त्यांच्यातला उत्साह पाहून माननीय कुलगुरू डॉ. इन्द्र मणि आणि विस्तार शिक्षण संचालक डॉ. धर्मराज गोखले यांनी शेतकऱ्यांचे आभार मानले तसेच शिक्षण संचालक डॉ. उदय खोडके, संशोधक संचालक डॉ. खिजर बेग, बिजोत्पादन संचालक डॉ. देवराव देवसरकर, कुलसचिव श्री पुरभा काळे, नियंत्रक श्री प्रवीण निर्मळ, विद्यापीठ अभियंता इंजी दीपक कशाळकर यांनी भोजन समिती सदस्यांचे अभिनंदन केले. मेजवानी तयार करण्यासाठी प्राचार्य डॉ. व्ही. एस. खंदारे तसेच समितीतील सदस्य डॉ. महेश देशमुख, डॉ. नीता गायकवाड, डॉ. आर. एस. जाधव, डॉ. मेघा जगताप, डॉ. घुगे, श्री कृष्णा जावळे, श्री के एस सांगळे, श्री ए डी खिल्लारे यांनी विशेष महत्त्वाचे कार्य केले

वनामकृविच्या‍ ५२ व्या वर्धापन दिनानिमित्त खरीप पीक परिसंवाद आणि कृषि प्रदर्शन संपन्न

 

अध्‍यक्षीय भाषण करतांना माननीय कुलगुरू डॉ. इन्द्र मणि

मार्गदर्शन करतांना सचिव माननीय श्री सुनील चव्हाण (भाप्रसे) 

मार्गदर्शन करतांना जिल्हाधिकारी मा. श्री. रघुनाथ गावडे (भाप्रसे),

सर्वांची सेवानिवृत्ती होते परंतु शेतकऱ्यांची सेवानिवृत्ती होत नाही आणि जगाच्या पोशिंदा म्हणून तो सतत कार्यरत राहतो व पावसाची अनियमितता असली तरी शेती उत्पादन विपुल प्रमाणात देतो असे शेतकऱ्यांप्रती गौरवोद्गार महाराष्ट्र राज्याचे मृद व जलसंधारण विभागाचे सचिव माननीय श्री सुनील चव्हाण (भाप्रसे) यांनी काढले. वसंतराव नाईक मराठवाडा कृषि विद्यापीठाच्‍या ५२ व्या वर्धापन दिनानिमित्त विस्‍तार शिक्षण संचालनालय व कृषि विभाग, महाराष्‍ट्र शासन यांच्‍या संयुक्‍त विद्यमाने दिनांक १८ मे रोजी आयोजित खरीप पीक परिसंवाद आणि कृषि प्रदर्शनाच्या उदघाटनाप्रसंगी ते प्रमुख अतिथी म्हणून बोलत होते. कार्यक्रमाच्‍या अध्‍यक्षस्‍थानी माननीय कुलगुरू डॉ. इन्द्र मणि हे होते आणि अकोला येथील डॉ. पंजाबराव देशमुख कृषि विद्यापीठचे माननीय कुलगुरू डॉ. शरद गडाख, महाराष्ट्र कृषि शिक्षण व संशोधन परिषदेचे महासंचालक माननीय श्री. रावसाहेब भागडे (भाप्रसे), परभणीचे जिल्हाधिकारी मा. श्री. रघुनाथ गावडे (भाप्रसे), वनामकृविचे विस्तार शिक्षण संचालक डॉ धर्मराज गोखले, शिक्षण संचालक डॉ. उदय खोडके, संशोधन संचालक डॉ. खिजर बेग, बिजोत्पादन संचालक डॉ. देवराव देवसरकर, कुलसचिव श्री पुरभा काळे, नियंत्रक प्रवीण निर्मळ, पुणे येथील कृषि आयुक्तालयातील आत्माचे संचालक श्री. दशरथ तांभाळे, विभागीय कृषि सहसंचालक डॉ. तुकाराम मोटे, कृषि परिषदेचे संशोधन संचालक डॉ. हरिहर कौसडीकर, जिल्हा अधीक्षक कृषि अधिकारी श्री. अनिल गवळी, प्रकल्प संचालक आत्मा श्री दौलत चव्हाण, फरीदाबाद (हरियाणा) येथील वॉव गो.ग्रीन.एलएलपीचे व्यवस्थापकीय संचालक डॉ. शंकर गोयंका, शास्वत योगीक शेतीचे श्री बाळासाहेब रूगे भाईजी, मुख्‍य शिक्षण विस्‍तार अधिकारी डॉ प्रशांत देशमुख, आणि डॉ पी. आर. झंवर आदींची प्रमुख उपस्थिती होती.

माननीय सचिव श्री सुनील चव्हाण (भाप्रसे) यांनी आपल्या भाषणात पुढे बोलताना म्‍हणाले की, महारष्ट्रातील बहुतांश शेतकरी हे अल्प भूधारक आहेत, या शेतकऱ्यांकरिता विद्यापीठाने केलेल्या कार्याचे कौतुक केले. मराठवाड्यात ८५ ते ८८ टक्के कोरडवाहू शेती असल्यामुळे भविष्यात पाण्याचा ताण सहन करणारे, खोलवर मुळ्या जाणारे आणि कोरडवाहू शेतीस पूरक वाण विकसित करावेत तसेच शेंद्रीय शेतीस उपयुक्त आणि हवामानास अनुकूल शिफारशी द्याव्यात, जैव समृद्ध पिके ज्वार, बाजरा, खाद्य तेल पिके करडई, जवस, दाळवर्गीय पिके यामध्ये प्रामुख्याने तुर यांचे क्षेत्र वाढविण्यासाठी प्रयत्न करावेत असे नमूद केले. शेतकऱ्यांनी कमीत कमी परंतु गुणात्मक दर्जेची शेती करून आपली उन्नती साधावी यासाठी सूक्ष्म सिंचन, तुषार सिंचन, शेततळे तसेच आधुनिक तंत्रज्ञाचा वापर करावा असे आवाहन केले.

अध्‍यक्षीय भाषणात कुलगुरू मा. डॉ. इन्द्र मणि म्‍हणाले की, या विद्यापीठाने शेतकरी आणि समाजसेवेसाठी अनेक विद्यार्थी, शास्त्रज्ञ, प्रशासकीय अधिकारी यांची निर्मिती केली आणि त्यांचे जन्मदात्या मातेप्रमानेच संगोपन केले. विद्यापीठ शेतकरी देवो भवो या संकल्पनेतून पुढे जात असुन शेतकऱ्यांच्या कल्याणाकरिता विविध योजना राबवीत आहे. शेतकऱ्यांना गुणवत्तापूर्ण विद्यापीठ विकसित बियाणे मिळण्याच्या दृष्टिने यावर्षी प्रथमच ११७८ क्विंटल खरीप पिकांचे सत्‍यतादर्शक बियाणे (७९५७ बॅग) उपलब्ध करून देण्यात आलेले आहे. विद्यापीठाची परभणी येथील मध्यवर्ती प्रक्षेत्राची जमीन पेरणी योग्य केल्यामुळे बीजोत्‍पादनात वाढ झाली. पुढील वर्षात यामध्ये ५ पट वाढ करण्याचे उद्धिष्ठ ठेवून विद्यापीठ कार्य करणार असल्याचे त्यांनी नमूद केले. तसेच विद्यापीठाने ज्वार,बाजरा, सोयाबीन, कापूस, तुर, मुग यामध्ये राष्ट्रीय पातळीवर नावाजलेले वाण विकसित केले आहेत आणि त्याची शेतकऱ्यांमध्येही लोकप्रियता आहे. विद्यापीठाच्या संशोधनासाठी शेतकऱ्यांचे प्रत्याभरणे विचारात घेतली जातील आणि भविष्यात हवामान संबंधित संशोधनावर भर देवून शेतकऱ्यांना हवामानाचा अचूक अंदाज देण्यासाठी सर्वोतोपरीने प्रयत्न केला जाईल. यासाठी राज्य आणि केंद्र शासनाच्या सहकार्याची अपेक्षा व्यक्त केली आणि यापुर्वी मिळालेल्या सहकार्याबद्दल आभार व्यक्त केले. याबरोबरच ड्रोन हाताळणी प्रशिक्षण, नवीन शैक्षणिक धोरण २०२० ची अंमलबजावणी करून कौशल्य विकासावर भर देण्यात येईल असे प्रतिपादन केले.

कार्यक्रमात डॉ. पंजाबराव देशमुख कृषि विद्यापीठचे माननीय कुलगुरू डॉ. शरद गडाख यांनी वसंतराव नाईक मराठवाडा कृषि विद्यापीठाने केलेल्या कार्याचा गौरव केला आणि या कार्यात सहभागी सर्वांचे अभिनंदन केले. तसेच शेतकऱ्यांनी एकात्मिक शेती पद्धतीचा अवलंब करावा असे नमूद केले.

परभणीचे जिल्हाधिकारी मा. श्री. रघुनाथ गावडे यांनी विद्यापीठ शेतकऱ्यांच्या हितासाठी सदैव तत्पर असते आणि त्यांच्या सोबत शेतकऱ्यांचेही प्रयत्न चांगले असल्याचे नमूद करून त्यांनी विक्री व्यवस्थापण कौशल्य शिकावे असे आवाहन केले.

महाराष्ट्र कृषि शिक्षण व संशोधन परिषदेचे महासंचालक माननीय श्री. रावसाहेब भागडे (भाप्रसे) हे बोलताना म्हणाले की, विद्यापीठाने राष्ट्रीय पातळीवरील वाण विकसित करून शेतकऱ्यांमध्ये लोकप्रियता मिळविली हे विद्यापीठातील बियाणे विक्री केंद्रावरील गर्दीवरुनच स्पष्ट होत आहे. विद्यापीठाचे कार्य असेच पुढे चालू राहो यासाठी सर्वोतोपारीने सहकार्य करण्यासाठी तत्पर राहू असे सांगितले.

पुणे येथील कृषि आयुक्तालयातील आत्माचे संचालक श्री. दशरथ तांभाळे यांनी व फरीदाबाद (हरियाणा) येथील वॉव गो.ग्रीन.एलएलपीचे व्यवस्थापकीय संचालक डॉ. शंकर गोयंका यांनी शेतकऱ्यांना आणि विद्यापीठास शुभेच्छा दिल्या. शास्वत योगीक शेतीचे श्री बाळासाहेब रूगे भाईजी यांनी आधुनिक आणि आध्यात्मिक शेती यावर मार्गदर्शन केले

कार्यक्रमाच्‍या प्रास्‍ताविकात विस्तार शिक्षण संचालक डॉ धर्मराज गोखले यांनी विद्यापीठाच्या विस्तार कार्याचा आढावा सांगून भविष्यात शेतकऱ्यांच्या हितासाठी प्रभावी विस्तार कार्य आणि माझा एक दिवस माझ्या बळीराजासोबत सारखे अभिनव उपक्रम राबवून विद्यापीठाचे उपयुक्त तंत्रज्ञान शेतकर्यापर्यंत पोहचवले जाईल असे नमूद केले.

यावेळी प्रातिनिधिक स्वरुपात शेतकरी श्री भरत टोनपी यांचा तर विस्तार कार्यासाठी कृषि विद्यावेत्ता डॉ. अरुण गुट्टे, कृषि विज्ञान केंद्राचे कार्यक्रम समन्वयक डॉ. प्रशांत भोसले, डॉ. दीप्ती पाटगावकर, विषय विशेषज्ञ प्रा. वर्षा मारवळीकर आणि आत्माच्या स्वाती घोडके यांचा सत्कार मान्यवरांच्या हस्ते करण्यात आला. 

मेळाव्‍यात आयोजित खरीप पिक परिसंवादात विविध विषयावर विद्यापीठ शास्‍त्रज्ञांनी मार्गदर्शन केले. याप्रसंगी आयोजित कृषि प्रदर्शनास मोठा प्रतिसाद दिला. मान्‍यवरांच्‍या हस्‍ते विद्यापीठ विकसित बियाणे विक्रीचे उदघाटन करण्‍यात आले. कार्यक्रमाचे सुत्रसंचालन डॉ वीणा भालेराव, डॉ. ए. के. गोरे आणि डॉ. सुनिता पवार यांनी केले तर आभार मुख्‍य विस्‍तार शिक्षणाधिकारी डॉ प्रशांत देशमुख यांनी मानले. मेळाव्‍यास शेतकरी बांधव, महिला शेतकरी, कृषी विस्‍तारक, विद्यापीठातील प्राध्‍यापक, शास्‍त्रज्ञ, अधिकारी, कर्मचारी आदी मोठया संख्‍येने उपस्थित होते.

मार्गदर्शन करतांना डॉ. पंदेकृविचे माननीय कुलगुरू डॉ. शरद गडाख

मार्गदर्शन करतांना महासंचालक माननीय श्री. रावसाहेब भागडे (भाप्रसे)

मान्‍यवरांच्‍या हस्‍ते विद्यापीठ विकसित बियाणे विक्री

प्रास्‍ताविक करताना विस्तार शिक्षण संचालक डॉ धर्मराज गोखले

मार्गदर्शन करतांना आत्माचे संचालक श्री. दशरथ तांभाळे

कृषी प्रदर्शनात ड्रोन प्रात्यक्षिक पाहताना मान्‍यवर

जीवन अभियान जनजागृती कार्यक्रम मौजे बाभुळगाव येथे संपन्न

 पर्यावरणपुरक शेती काळाची गरज – डॉ वासुदेव नारखेडे

खरीप हंगामातील पिकांचे अवशेष न जाळता त्याचा उपयोग खत निर्माण करण्याकरीता करावा तसेच आंतरपीक पध्दती तसेच एकात्मिक शेती पध्दती, एकात्मिक अन्नद्रव्ये व्यवस्थापन आणि आपतकालीन पीक नियोजन याचा वापर शाश्वत शेतीसाठी करावा असे प्रतिपादन वसंतराव नाईक मराठवाडा कृषि विद्यापीठातील कोरडवाहू संशोधन केंद्राचे मुख्यशास्त्रज्ञ डॉ. वासुदेव नारखेडे यांनी केले. ते जीवन अभियान (पर्यावरणाकरीता जीवन पध्दती) या जनजागृती कार्यक्रमाअंतर्गत मौजे बाभुळगाव ता. जि. परभणी येथे दिनांक १३ मे रोजी घेण्यात आलेल्या कार्यशाळेतील उपस्थित शेतकऱ्यांना बोलत होते. हरित वायुचे उत्सर्जन व खनीज तेलाचे योग्य प्रमाणावर ज्वलन होवून त्याचे कर्ब उत्सर्जन मोठ्या प्रमाणावर होत आहे. त्यामुळे पृथ्वीवरील तापमानात वाढ होत आहे. तसेच पावसमानामध्ये कमी कालावधीमध्ये अतिशय जोरदार वृष्टी आणि पावसाचे असंतुलीत वितरण यामुळे पीक कालावधीमध्ये मध्यम ते जास्त कालावधीचा ताण येतो. आणखी महत्वाचा म्हणजे मुलस्थानी जलसंधारण, कोरडवाहू शेतीमध्ये उपलब्ध असलेल्या मुलस्थानी जल व्यवस्थापनासाठी जसे रुंद वरंबा सरी पध्दतीमध्ये सोयाबीन, कापूस, तुर लागवड तंत्रज्ञान, पावसाचा १२ ते १५ दिवसाचा ताण पडल्यास पहीली पोटॅशियम नायट्रेटची फवारणी १ % ४० ते ४५ दिवसांनी आणि दुसरी फवारणी ७० ते ७५ दिवसांनी, हवामान बदलानुरुप विद्यापीठानी विकसित केलेले सोयाबीन वाण एमएयुएस-१५८, एमएयुएस-७१, एमएयुएस-१६२, एमएयुएस-७२५, तुर बीडीएन-७११, बीडीएन-७१६, बीडीएन-२०१३-४१, रब्बी ज्वार वाण परभणी मोती, परभणी ज्योती, परभणी सुपर मोती, या जातीचा अधिक उत्पादनासाठी अवलंब करावा. शेतीमध्ये शेणखताबरोबर शिफारस केलेली रासायनिक खताची मात्रेचा वापर करुन जमिनीची सुपिकता टिकवावी असेही त्यांनी यावेळी नमूद केले.

याप्रसंगी वरिष्ठ शास्त्रज्ञ (कृषिविद्या) डॉ. आनंद गोरे यांनी जमिनीचा योग्य वापर व दुष्काळ निवारण याबाबत शेतकऱ्यांना मार्गदर्शन केले. वरिष्ठ शास्त्रज्ञ (कृषि अभियांत्रिकी) डॉ. मदन पेंडके यांनी विहीर व कुपनलिका पुनर्भरण, शेततळे याविषयी शेतकऱ्यांना माहीती दिली. सहाय्यक प्राध्यापक (मृदशास्त्र) डॉ. पपिता गौरखेडे यांनी शेतकऱ्यांना माती परिक्षणाचे महत्त्व व माती परिक्षण नुसार खतांचे नियोजन याबद्दल उपस्थित शेतकऱ्यांना मार्गदर्शन केले. कार्यक्रमास श्री. रामदास दळवे, सरपंच बाभुळगाव, श्री माऊली पारधे तसेच गावातील शेतकरी मोठ्या संख्येने उपस्थित होते.

खरीप हंगामासाठी वनामकृवि विकसीत बियाणे विक्रीस १८ मे पासून प्रारंभ

सोयाबीन, तुर, ज्वार, मुग पिकांचे बियाणे उपलब्ध

वसंतराव नाईक मराठवाडा कृषि विद्यापीठाच्या ५२ व्या वर्धापन दिनानिमित्त विस्तार शिक्षण संचालनालय आणि कृषि विभाग महाराष्ट्र शासन यांच्या संयुक्त विद्यमाने खरीप पीक परिसंवाद व कृषि प्रदर्शनीचे आयोजन शनिवार दिनांक १८ मे रोजी सकाळी ११.०० वाजता कृषि महाविद्यालय परभणी येथील सभागृहात करण्यात आले आहे. कार्यक्रमाची सुरवात विद्यापीठ विकसित आणि शेतकऱ्यांसाठी उपलब्ध केलेल्या सत्यतादर्शक बियाणे विक्रीने होणार आहे. सदरील बियाणांची विक्री १८ मे पासून विद्यापीठातील बीज प्रक्रिया केंद्रावरून करण्यात येणार असुन विद्यापीठातील इतर विक्री केंद्रावर दिनांक २५ मे पासून विक्रीसाठी ठेवण्यात येणार आहे, अशी माहिती विद्यापीठाच्‍या बीज प्रक्रिया केंद्राव्‍दारे देण्‍यात आली आहे. यावर्षी प्रथमच ११७८ क्विंटल खरीप पिकांचे सत्‍यतादर्शक बियाणे (७९५७ बॅग) उपलब्ध करून देण्यात आलेले आहे. विद्यापीठाची परभणी येथील मध्यवर्ती प्रक्षेत्राची जमीन पेरणी योग्य केल्यामुळे बीजोत्‍पादनात वाढ झाली.

विक्रीसाठी उपलब्ध बियाणे व दर पुढील प्रमाणे

तुरीचे वाण - बीडीएन-७१६ (लाल), बीडीएन-७११ (पांढरी), ६ किलोच्या बॅगमध्ये तर बीडीएन-१३-४१ गोदावरी (पांढरी) हे वाण ६ आणि २ किलोच्या बॅगमध्ये उपलब्ध असून प्रती किलो दर रु २५०/- आहे या बियाणाच्या उपलब्धता बीडीएन-७१६ – (८०० बॅग), बीडीएन-७११ – (३६६ बॅग), बीडीएन-१३-४१ गोदावरी ६ किलोच्या ७०० बॅग व २ किलोच्या ३०० बॅग अशी आहे.

सोयाबीनचे वाण - एमएयुएस-१६२, एमएयुएस-१५८, एमएयुएस-७१, एमएयुएस-६१२ हे वाण २६ किलोच्या बॅगमध्ये तर एमएयुएस- ७२५ हा वाण ५ किलोच्या बॅगमध्ये उपलब्ध असुन सर्व वाणाचा प्रती किलो दर हा रु १००/- असुन याची उपलब्धता एमएयुएस-१६२ (१००० बॅग), एमएयुएस-१५८(१५०० बॅग), एमएयुएस-७१ (१७५ बॅग), एमएयुएस-६१२ (१००० बॅग) आणि एमएयुएस- ७२५ (१६०० बॅग) अशी आहे.

ज्वारीचा वाण - परभणी शक्ती हा वाण ४ किलोच्या बॅगमध्ये उपलब्ध असून या वाणाचा प्रती किलो दर रु १२५/- आहे व या वाणाच्या ३०० बॅगची उपलब्धता आहे.

मुगाचा वाण - बीएम -२००३-२ हा वाण ६ किलोच्या बॅगमध्ये उपलब्ध असून या वाणाचा प्रती किलो दर रु २२०/- आहे व या वाणाच्या २१६ बॅगची उपलब्धता आहे.

वरील बियाणामधील सोयाबीन वाण एमएयुएस- ७२५ हा नुकताच प्रसारीत झालेला वाण आहे. या वाणाचे उपलब्ध बियाणाची जास्तीत जास्त शेतकऱ्यांपर्यंत प्रसार करण्याच्या उद्देशाने ५ किलोच्या बॅगची पॅकिंग करण्यात आली आहे. आणि तुर वाण बीडीएन-१३-४१ (गोदावरी) या वाणाची शेतकऱ्यांद्वारे अंतर पीक पद्धतीने लागवडीसाठी बियाणे मागणी असल्यामुळे २ किलोच्या बॅगची पॅकिंग करण्यात आली आहे. उर्वरित बॅगची पॅकिंग या एक एकर प्रक्षेत्रासाठी आहे. बियाणे खरेदीसाठी रोख रक्कम स्विकारण्यात येईल तसेच एका व्यक्तीस एक बियाणे बॅग याप्रमाणे विक्री करण्यात येईल.

पेरणीपूर्वी सोयाबीनची उगवण शक्ती तपासणे गरजेचे - डॉ.गजानन गडदे

खरीप पूर्व नियोजनाच्या अनुषंगाने वसंतराव नाईक मराठवाडा कृषि विद्यापीठ परभणी अंतर्गत कृषि तंत्रज्ञान माहिती केंद्र ,परभणी रिलायन्स फाउंडेशन आणि महिला आर्थिक विकास महामंडळ (माविम) यांच्या संयुक्त विद्यमाने ब्राह्मणगाव ता. जि. परभणी येथे महिला शेतकऱ्यांकरिता सोयाबीन बियाणांची उगवण शक्ती तपासण्याच्या प्रात्यक्षिकाचे दिनांक १४ मे रोजी आयोजन करण्यात आले होते. याप्रसंगी माहिती केंद्राचे विस्तार कृषि विद्यावेता डॉ.गजानन गडदे, यांनी सोयाबीन उगवण शक्तीचे प्रात्यक्षिक प्रत्यक्ष करून दाखविले आणि सोयाबीन बियाणाची उगवण शक्ती 70 टक्के पेक्षा जास्त असणे आवश्यक आहे असल्याचे नमूद करून सोयाबीन लागवड तंत्रज्ञानाविषयी त्यांनी महिला शेतकऱ्यांना मार्गदर्शन केले. तद्नंतर माविमचे जिल्हा समन्वयक श्री बाळासाहेब झिंगार्डे यांनी महिला शेतकऱ्यांना बचत गट सक्षम करणे तसेच कृषिशी निगडीत जोडधंदे उभारण्यामध्ये महिलांनी पुढाकार घेण्याचे आवाहन केले. यावेळी गावचे तंटामुक्तीचे अध्यक्ष श्री काळदाते यांची प्रमुख उपस्थिती होती. कार्यक्रमाचे सूत्रसंचालन  माविमच्या सौ. भालेराव मॅडम यांनी केले तर आभार प्रदर्शन रिलायन्स फाउंडेशन चे श्री रामा राऊत यांनी मानले. कार्यक्रमास गावातील ५५ महिला शेतकऱ्यांनी सहभागी होवून उत्स्फूर्त प्रतिसाद नोंदविला. कार्यक्रम यशस्वीतेसाठी रिलायन्स फाउंडेशनच्या श्री शेळके यांनी प्रयत्न केले.

ॲग्रीपीव्ही तंत्रज्ञान संशोधन प्रशिक्षणाचे वनामकृवित आयोजन

वसंतराव नाईक मराठवाडा कृषि विद्यापीठ येथे ॲग्री-फोटोव्होल्टेईक संशोधन प्रकल्पांतर्गत विद्यापीठातील संशोधक आणि आचार्य पदवी विद्यार्थ्यांना ॲग्री-फोटोव्होल्टेईक या विषयीवर नवीन उपकरणाच्या उपयुक्तता आणि हाताळणी बाबत दिनांक १३ ते १६ मे दरम्यान चार दिवशीय प्रशिक्षणाचे आयोजन करण्यात आले आहे. या प्रशिक्षणाचे उद्घाटन दिनांक १३ मे रोजी विद्यापीठाचे माननीय कुलगुरू डॉ. इन्द्र मणि यांच्या शुभहस्ते करण्यात आले. यावेळी प्रकल्पाचे समन्वयक आणि शिक्षण संचालक डॉ. उदय खोडके, विस्तार शिक्षण संचालक डॉ. धर्मराज गोखले, संशोधन संचालक डॉ. खिजर बेग, सहयोगी अधिष्ठाता डॉ. सय्यद इस्माईल, डॉ. आर. बी. क्षीरसागर आदींची प्रमुख उपस्थिती होती.

अध्यक्षीय भाषणात बोलताना माननीय कुलगुरू डॉ. इन्द्र मणि म्हणाले सौर ऊर्जा निर्मितीस भारतात मोठया प्रमाणात वाव असुन संशोधनाच्‍या माध्‍यमातुन कोणते पीक अॅग्रीपीव्‍ही तंत्रज्ञानात किफायतीशीर राहील हे पाहणे आवश्यक आहे. यासाठी संशोधक आणि आचार्य पदवी विद्यार्थ्यांना ॲग्री-फोटोव्होल्टेईक तंत्रज्ञान उपकरणाची प्रभावी उपयुक्तता आणि हाताळणी करता येणे आवश्यक असून या उपकरणाचा आपल्या संशोधनामध्ये उपयोग करून संशोधन प्रभावी करावे आणि यासंशोधनाद्वारे राष्ट्रीय आणि आंतरराष्ट्रीय पातळीवरील संशोधन लेख प्रकाशीत करावेते असे आवाहन केले.

कार्यक्रमाचे प्रस्ताविक प्रकल्पाचे अन्वेषक डॉ.गोदावरी पवार यांनी केले. प्रशिक्षणार्थींना प्रशिक्षण देण्यासाठी प्रशिक्षक म्हणून सन सीड कंपनीचे इं. निमेश आणि इं. रवी हे उपस्थित होते तसेच यावेळी विद्यापीठातील विविध विभागाचे विभाग प्रमुख, प्राध्यापक यांचीही उपस्थित होती. कार्यक्रमाचे सूत्रसंचालन डॉ. विशाल इंगळे यांनी केले तर आभार डॉ. विक्रम घोळवे यांनी मानले. कार्यक्रम यशस्वी करण्यासाठी डॉ. रामटेके, डॉ कलालबंडी, डॉ शिराळे, डॉ सुनिता पवार यांनी विशेष परिश्रम घेतले.

वनामकृवित खरीप पीक परिसंवाद व कृषि प्रदर्शनीचे आयोजन

वसंतराव नाईक मराठवाडा कृषि विद्यापीठाच्या ५२ व्या वर्धापन दिनानिमित्त विस्तार शिक्षण संचालनालय आणि कृषि विभाग महाराष्ट्र शासन यांच्या संयुक्त विद्यमाने खरीप पीक परिसंवाद व कृषि प्रदर्शनीचे आयोजन शनिवार दिनांक १८ मे रोजी सकाळी ११.०० वाजता कृषि महाविद्यालय परभणी येथील सभागृहात करण्यात आले आहे. कार्यक्रमाच्या अध्यक्षस्थानी माननीय कुलगुरू डॉ. इन्द्र मणि हे राहणार असुन प्रमुख अतिथी म्हणून महाराष्ट्र राज्याचे मृद व जलसंधारण विभागाचे सचिव माननीय श्री सुनील चव्हाण (भाप्रसे) हे उपस्थित राहणार आहेत तर अकोला येथील डॉ. पंजाबराव देशमुख कृषि विद्यापीठचे माननीय कुलगुरू डॉ. शरद गडाख, महाराष्ट्र कृषि शिक्षण व संशोधन परिषदेचे महासंचालक माननीय श्री. रावसाहेब भागडे (भाप्रसे), परभणीचे जिल्हाधिकारी मा. श्री. रघुनाथ गावडे (भाप्रसे) आणि मुंबई येथील साविदा कृषि कं. प्रा. लि.चे अध्यक्ष मा. श्री. विवेक दामले हे विशेष अतिथी म्हणून उपस्थित राहणार आहेत आणि वनामकृविचे शिक्षण संचालक डॉ. उदय खोडके, संशोधन संचालक डॉ. खिजर बेग, बिजोत्पादन संचालक डॉ. देवराव देवसरकर, पुणे येथील कृषि आयुक्तालयातील आत्माचे संचालक श्री. दशरथ तांभाळे, विभागीय कृषि सहसंचालक श्री. साहेबराव दिवेकर, डॉ. तुकाराम मोटे, कृषि परिषदेचे संशोधन संचालक डॉ. हरिहर कौसडीकर आणि फरीदाबाद (हरियाणा) येथील वॉव गो.ग्रीन.एलएलपीचे व्यवस्थापकीय संचालक डॉ. शंकर गोयंका आदींची प्रमुख उपस्थिती लाभणार आहे.

परिसंवादात विद्यापीठ शास्त्रज्ञ विविध खरीप पीक लागवड तंत्रज्ञान, सोयाबीन, कापुस, ज्वार, बाजरी, कडधान्य लागवड, भरड धान्याचे महत्व, किड – रोग व्यवस्थारपन आदी विषयावर मार्गदर्शन करणार असुन शेतकरी बांधवाच्या व कृषि विषयक विविध शंकाचे निरासरण करणार आहेत. यावेळी मान्यवरांच्या हस्ते विद्यापीठ शास्त्रज्ञ लिखित विविध घडीपत्रिका, पुस्तिका, शेतीभाती मासिकांचे विमोचन करण्या‍त येणार आहे. यासह विद्यापीठ विकसित तंत्रज्ञान तसेच कंपन्याच्या आणि बचतगटाचे साहित्याचे कृषि प्रदर्शनीचे आयोजन करण्यात आले. कार्यक्रमाची सुरवात विद्यापीठ निर्मित बियाणे विक्रीने होणार आहे. विक्रीसाठी उपलब्ध बियाणे व त्याचे दर पुढील प्रमाणे आहेत.

तुरीचे बीडीएन-७१६ (लाल), बीडीएन-७११ (पांढरी), ६ किलोच्या बॅगमध्ये तर बीडीएन-१३-४१ गोदावरी (पांढरी) हे वाण ६ आणि २ किलोच्या बॅगमध्ये उपलब्ध असून प्रती किलो दर रु २५०/- आहे या बियाणाच्या उपलब्धता बीडीएन-७१६ – (८०० बॅग), बीडीएन-७११ – (३६६ बॅग), बीडीएन-१३-४१ गोदावरी ६ किलोच्या ७०० बॅग व २ किलोच्या ३०० बॅग अशी आहे.

सोयाबीनचे एमएयुएस-१६२, एमएयुएस-१५८, एमएयुएस-७१, एमएयुएस-६१२ हे वाण २६ किलोच्या बॅगमध्ये तर एमएयुएस- ७२५ हा वाण ५ किलोच्या बॅगमध्ये उपलब्ध असुन सर्व वाणाचा प्रती किलो दर हा रु १००/- असुन याची उपलब्धता एमएयुएस-१६२ (१००० बॅग), एमएयुएस-१५८(१५०० बॅग), एमएयुएस-७१ (१७५ बॅग), एमएयुएस-६१२ (१००० बॅग) आणि एमएयुएस- ७२५ (१६०० बॅग) अशी आहे.

ज्वारीचा परभणी शक्ती हा वाण ४ किलोच्या बॅगमध्ये उपलब्ध असून या वाणाचा प्रती किलो दर रु १२५/- आहे व या वाणाच्या ३०० बॅगची उपलब्धता आहे. तसेच मुगाचा बीएम -२००३-२ हा वाण ६ किलोच्या बॅगमध्ये उपलब्ध असून या वाणाचा प्रती किलो दर रु २२०/- आहे व या वाणाच्या २१६ बॅगची उपलब्धता आहे. बियाणे खरेदीसाठी रोख रक्कम स्विकारण्यात येईल तसेच एका व्यक्तीस एक बियाणे बॅग याप्रमाणे विक्री करण्यात येईल.

सदर परिसंवादाचे थेट प्रक्षेपण https://www.youtube.com/@VNMKV विद्यापीठ युटयुब चॅनेलवर करण्यात येणार आहे. तरी परिसंवादाचा लाभ जास्तीत जास्ते शेतकरी बांधवांनी घ्यावा, असे आवाहन विस्तार शिक्षण संचालक डॉ धर्मराज गोखले आणि जिल्हा अधीक्षक कृषि अधिकारी श्री अनिल गवळी यांनी केले आहे.

बालकांसाठी आयोजित उन्हाळी शिबिरास उत्स्फूर्त प्रतिसाद

 वनामकृवितील प्रायोगिक पूर्व प्राथमिक शाळेचा उपक्रम

वसंतराव नाईक मराठवाडा कृषि विद्यापीठ परभणी येथील सामुदायिक विज्ञान महाविद्यायातील मानव विकास व कौटुंबिक अभ्यास विभागात असणाऱ्या प्रायोगिक पूर्व प्राथमिक शाळेतर्फे  नुकतेच उन्हाळी शिबिराचे आयोजन करण्यात आले. या शिबीरामध्ये सहभागी विद्यार्थ्यांना नावीन्यपूर्ण कार्यांचा अनुभव देत असतांना व्यायाम, योगा, मनोरंजक खेळ, जीवन कौशल्ये विकसन, विज्ञान अनुभव, सृजनात्मक कार्ये, सामान्य ज्ञान, नैतिक कथा, गाणे, नृत्य, पाककृती इत्यादी कृती घेण्यात आल्या. सर्व विद्यार्थ्यांनी या विविध कृतींमध्ये अत्यंत उत्स्फूर्तपणे सहभाग घेतला.

या शिबिरादरम्यान संचालक शिक्षण डॉ. उदय खोडके आणि  छत्रपती संभाजीनगर येथील एम.जी.एम. विद्यापीठाचे माननीय कुलगुरु  डॉ. विलास सपकाळ तथा इतर अधिकाऱ्यांनी भेट दिली असता त्यांनी या शिबिराचा आढावा घेत विद्यार्थ्यांनी तयार केलेल्या कलाकृती भेटवस्तू म्हणून दिल्यानंतर त्यांनी या उपक्रमाची प्रशंसा केली. 

या शिबिराअंतर्गत सामुदायिक विज्ञान महाविद्यालयाच्या प्राचार्या डॉ. जया बंगाळे यांच्यासोबत शिबीरातील विद्यार्थ्यांनी सकाळच्या रम्य वातावरणात निसर्ग सहलीचा आनंद घेतला. तसेच त्यांनी जागतिक वसुंधरा दिनानिमित्त शिबिरार्थींना पर्यावरण संवर्धनाचे धडे दिले. आपली पृथ्वी प्लॅस्टिकमुक्त, कचरामुक्त करण्यासाठी प्रत्येकाने वस्तूंचा किमान वापर, पुनर्वापर व पुनर्निर्मिती यांचा अवलंब करण्याचे आवाहन केले. प्रत्येकाने प्लास्टिकच्या पिशव्या वापरण्याऐवजी कापडी पिशव्यांचा वापर करुन पर्यावरणाचे रक्षण करावे असेही यावेळी त्यांनी सांगितले. तसेच बालकांना कागदी पिशव्या बनवण्याची कला अवगत करुन दिली. राष्ट्रीय पुस्तक दिनानिमित्त विद्यार्थ्यांना वाचनाची आवड निर्माण व्हावी यासाठी डॉ. वीणा भालेराव यांनी विद्यार्थ्यांची विभागातील बालवाचनालयास भेट आयोजित करुन त्यांना विविध प्रकारची पुस्तके दाखवून मार्गदर्शन  केले व आपली प्रगती साधण्यासाठी वाचनाचे महत्व पटवून दिले.

या शिबिराच्या आयोजक प्राचार्या डॉ. जया बंगाळे यांच्या हस्ते सहभागी विद्यार्थ्यांना प्रमाणपत्रे प्रदान करण्यात आली. यावेळी या शिबिराच्या समन्वयक डॉ. वीणा भालेराव व   डॉ. नीता गायकवाड यांच्यासह विभागातील प्रा. प्रियांका स्वामी तसेच शाळेतील शिक्षिका उपस्थित होत्या. सदरील शिबिराच्या आयोजनात या शाळेतील शिक्षिका श्रुति औंढेकर, वैशाली जोशी, मिनाक्षी सालगोडे, संध्या देशपांडे, रेवती हिस्वनकर, दिपाली करभाजने, मनिषा गाडगे व मदतनीस यांचे सहकार्य लाभले.