Monday, July 6, 2020

शेतमाल डिजिटल मार्केटिंगद्वारे थेट ग्राहकांना ऑनलाइन विक्री करा ..... कुलगुरू मा डॉ अशोक ढवण

वनामकृविच्‍या वतीने आयोजित डिजिटल तंत्रज्ञानाद्वारे शेतकरी महिलांची आत्‍मनिर्भरता या विषयावर राज्यस्तरीय वेबिनारचे उदघाटन

वसंतराव नाईक मराठवाडा कृषि विद्यापीठातील भारतीय कृषी अनुसंधान परिषद, नवी दिल्ली आणि जागतिक बँक पुरस्‍कृत राष्ट्रीय कृषी उच्च शिक्षण प्रकल्प (नाहेप), सेंटर ऑफ एक्सलन्स उत्पादकता वाढीकरता यंत्रमानव, ड्रोन आणि स्वयंचलित यंत्राद्वारे शेती प्रकल्पाच्‍या वतीने डिजिटल तंत्रज्ञानाद्वारे शेतकरी महिलांची आत्‍मनिर्भरता या विषयावर दि. 6 ते 10 जुलै दरम्‍यान राज्यस्तरीय वेबिनारचे आयोजन करण्यात आले असुन वेबीनारचे उदघाटन कार्यक्रम दिनांक 6 जुलै रोजी कुलगुरू मा डॉ अशोक ढवण यांच्‍या अध्‍यक्षतेखाली पार पडलाप्रमुख पाहुणे म्हणून पुणे येथील अटरी संस्‍थेचे  संचालक डॉ. लखनसिंग, प्रमुख व्‍यक्‍त्‍या म्‍हणुन पद्मश्री बीजमाता सौ. राही बाई पोपेरे, दौंड येथील अंबिका मसालेच्‍या  संचालिका सौ. कमलताई परदेशी, शिक्षण संचालक डॉ धर्मराज गोखले, सामुदायिक विज्ञान डॉक्टर जयश्री झेंड,  प्रकल्‍प प्रमुख डॉ गोपाल शिंदे आदींची प्रमुख उपस्थिती होती.

अध्‍यक्षीय भाषणात कुलगुरू मा डॉ अशोक ढवण म्‍हणाले की, शेतकरी महिलांची आत्‍मनिर्भरतावर आधारित नाविन्यपूर्ण वेबिनारचे आयोजन निश्चितच कौतुकास्‍पद आहे. शेतकरी महिलांचे काबाडकष्ट कमी करून त्यांची आर्थिक उन्नती साधण्यासाठी विद्यापीठ प्रयत्‍नशील असुन सामुदायिक विज्ञान महाविद्यालयाच्‍या कृषी अभियांत्रिकी व अन्नतंत्रज्ञान विभागाने अनेक शेतकरी महिलांना उपयुक्‍त तंत्रज्ञान विकसित केले आहे. भाजीपालाव अन्नधान्य यावर केलेल्या साध्या सोप्या प्रक्रियांद्वारे व्यवस्थित व आकर्षक पॅकिंग करून मालाची विक्री करावी. शेतकरी महिला व शेतकऱ्यांनी शेतमाल उत्पादन डिजिटल ऑनलाइन मार्केटिंगद्वारे थेट ग्राहकांना विक्री करावे जेणेकरून आर्थिक लाभ वाढू शकेल. कुटीर उद्योग व शेतीपुरक व्‍यवसायात शेतकरी महिलांन संधी शोधून आत्मनिर्भर व्हावे, असे मत व्यक्त केले

प्रमुख व्‍यक्‍त्‍या बीजमाता पद्मश्री राहीबाई पोपेरे आपली यशोगात कथन करतांना म्‍हणाल्‍या की, पिकांच्‍या अनेक देशी वाण हे मानवास आरोग्‍यदायी असुन शेतकरी महिला, प्रगतिशील शेतकरी यांनी आपल्‍या स्तरावर प्रत्येक ठिकाणी प्रत्येक जिल्ह्यात नैसर्गिकरित्यादेशी बियाणे जतन करावे. शेतीतील अतिरेकी रासायनिक खतांचा व किटकनाशकांच्‍या वापरामुळे अनेक आजार होतांना दिसत आहेत. यामुळे सेंद्रिय शेतीकडे वळावे, नैसर्गिकरित्या पिकवलेला भाजीपाला अन्नधान्य उत्‍पादन करावे, असे त्‍या म्‍हणाल्‍या.

महिला उद्योजिका सौ कमलताई परदेशी यांनी शून्यातून सुरुवात करू आज करोडोची ऊलाढाल असलेल्‍या अंबिका मसाला उद्योग यशस्‍वीपणे सांभाळत आहेत, त्‍यांनी आपली अत्यंत प्रेरक यशोगाथा विशद करून  महिलांना उद्योग व्यवसाय करतानां येणाऱ्या अडचणी सोडवण्यासाठी त्यांनी केलेल्या उपाययोजना व  क्लुप्त्या यांनी माहिती दिली.  

अटारीचे संचालक डॉ लखन सिंग यांनी सहभागी शेतकरी महिलांना विविध कृषी उद्योग व्यवसाय मार्केटिंग याद्वारे सक्षम होण्यासाठी उद्यमी महिलांची उदाहरणे देऊन प्रवृत्त केले. अत्यंत उपयुक्त अशा वेबिनारच्या आयोजनाबद्दल विद्यापीठाचे धन्यवाद मानले मानले.

कार्यक्रमाचे प्रास्‍ताविक आयोजन उपसचिव डॉ गोदावरी पवार यांनी केले तर डॉ गोपाळ शिंदे नाहेप प्रकल्‍पाबाबत माहिती दिली. सुत्रसंचालन वेबिनार आयोजन सचिव डॉ विना भालेराव यांनी केले तर आभार डॉ मेघा जगताप यांनी मानलेकार्यक्रम यशस्‍वीतेसाठी डॉ अविनाश काकडे, डॉ रश्मी, डॉ अपूर्वा यांनी विशेष परिश्रम घेतले. ऑनलाईन वेबिनार मध्‍ये दिडशे पेक्षा जास्‍त महिला सहभागी झाल्‍या होत्‍या.

रेशीम उद्योगातुन आत्मनिर्भरतेकडे या विषयीवर वेबिनार संपन्न

वसंतराव नाईक मराठवाडा कृषि विद्यापीठ, परभणी येथील पशुशकतीचा योग्य वापर व रेशीम संशोधन योजना यांच्या सयुक्त विद्यमाने दिनांक 27 जुन रोजी शेतकरी, विद्यार्थी व शास्त्रज्ञ यांच्यासाठी एक दिवसीय प्रशिक्षण  वेबिनारचे रेशीम उद्योग एक पाऊल आत्मनिर्भरतेकडेयाविषयीवर संपन्‍न झाला. प्रशिक्षणात रेशीम किटकाचा जीवनक्रम, निर्जतुकीकरण, रेशीम कोष निर्मीती आणि काढणी तंत्रज्ञान या विषयीवर प्रभारी अधिकारी डॉ. सी. बी.लटपटे यांनी मार्गदर्शन केले. डॉ. राहूल रामटेके यांनी रेशीम उद्योगामध्ये सौर उर्जेचा वापरयाविषयी तर डॉ. स्मिता सोळंकी यांनी तुती लागवडीमध्ये यांत्रीकीकरणया विषयी मार्गदर्शन केले. कार्यक्रमास राज्यातील यतमाळ जिल्हा रेशीम विकास अधिकारी श्री. पी.एम.चौगुले, अमरावती जिल्हा श्री. संजय पांढरे, रेशीमरत्न श्री.सोपानराव शिंदे, रोहित शिंदे, एम.डी.देसाई चुडावा ता.पुर्णा, अजय कुलकर्णी, अपर्णा भालेराव, सुलोचना बोंढे, दिपक, राहुल बाबर, विश्वनाथ दहे, नितीन पवार, शिवकुमार, महेश कडासने, अशोक खुपसे आदीसह 130 जणांनी सहभाग नोंदवला.


Sunday, July 5, 2020

अधिक उत्पादनक्षम वाण विकसित करतांना अजैविक ताण सहनशील क्षमतेचा अंतर्भाव करावा..... कुलगुरु मा डॉ. अशोक ढवण

वसंतराव नाईक मराठवाडा कृषि विद्यापीठ आणि जागतिक बँक पुरस्कृत राष्ट्रीय कृषी उच्य शिक्षण प्रकल्प (नाहेप), भारतीय कृषी अनुसंधान परिषद नवी दिल्ली यांच्या संयुक्त विद्यमाने २९ जून ते 3 जुलै दरम्‍यान आयोजित डिजिटल साधनांच्या माध्यमातून पिकांचे अजैविक ताण व्यवस्थापन या विषयावरील ऑनलाईन प्रशिक्षणाचा समारोप दि. ३ जुलै रोजी कुलगुरू मा. डॉ. अशोक ढवण अध्‍यक्षतेखाली संपन्‍न झाला. कार्यक्रमास प्रमुख पाहुणे म्हणून राहुरी येथील महात्मा फुले कृषी विद्यापीठाचे कुलगूरू मा. डॉ के. पी. विश्वनाथा तर भारतीय कृषी अनुसंधान परिषदेतील वनस्पती शरीरक्रियाशास्त्राचे विभाग प्रमुख डॉ. व्ही चिन्नुसामी, संचालक शिक्षण डॉ. धर्मराज गोखले यांची प्रमुख उपस्थिती होती.

समारोप प्रसंगी मा डॉ. के. पी विश्वनाथा म्हणाले की, विविध विषयातील शास्त्रज्ञांनी एकत्र येऊन शेतकऱ्यांसाठी डिजिटल तंत्रज्ञानाचा ऊपयोग करुन अजैविक ताण सहन करणाऱ्या वाणांची निर्मिती करण्याचा प्रयत्न कराव. तसेच शास्त्रज्ञांनी नवनिर्मित संशोधन करुन शेतक-र्यांना डिजिटल शेती करण्यासाठी प्रोत्साहित करावे. 

अध्यक्षीय समारोपात मा डॉ. अशोक ढवण म्‍हणाले की, अधिक उत्पादन देणाऱ्या वाणांची निर्मिती करत असताना अजैविक ताण सहन करणाऱ्या घटकांचा समावेश संशोधनात करावा. राज्‍यातील कृषि शास्त्रज्ञांनी राज्यस्तरावर संशोधनाची दिशा ठरवून अभ्यास करावा.   

पाच दिवसीय प्रशिक्षणात ऑस्ट्रेलिया येथील वेस्टर्न युनीव्हर्सीटीचे संचालक प्रा. कदमबोट सिद्धीक, अमेरीका येथील कान्स स्टेट युनीव्हर्सीटीचे डॉ. पी. व्ही. वरप्रसाद, अमेरिकास्थित भारतीय कृषि अनुसंधान परिषदे माजी विभाग प्रमुख डॉ पी. एस. देशमुख, केरळ येथील सीपीसीआरआयचे निवृत्त संचालक डॉ. वेलामुर राजगोपाल, भारतीय कृषी अनुसंधान परिषद नवी दिल्ली येथील डॉ. व्ही. चीन्नुस्वामी, विभाग प्रमुख, वनस्पती शरीरक्रियाशास्त्र आनुवंशिकी विभागाचे प्रमुख शास्त्रज्ञ डॉ. सी. भारव्दाज, हैद्राबाद येथील केंद्रीय कोरडवाहु शेती संशोधन संस्थेचे डॉ. एम. माहेश्वरी, युनिव्हरसीटी ऑफ इलीनीऑस (अमेरीका) चे शास्‍त्रज्ञ डॉ. नितीन कदम, डॉ. पुसा (बिहार) येथील राजेंद्र प्रसाद केंद्रीय कृषी विद्यापिठाचे डॉ राजीव बहुगुना, जपान येथील वरिष्ठ संशोधक डॉ. व्ही. देशमुख आदींनी विविध विषयावर मार्गदर्शन करुन प्रशिक्षण घेणाऱ्याचे शंकानिरण केले. सदरील ऑनलाइन प्रशिक्षणात भारत, अमेरिका, जपान, ब्राझील, नेपाळ, पाकिस्तान, पोर्तुगाल, फिलिपिन्स, व्हींतनाम, नायजेरिया अन्य देश येथून कृषी शास्त्राशी निगडीत संशोधक, प्राध्यापक व आचार्य विद्यार्थी असे एकूण ५०० प्रशिक्षणार्थी सहभागी होते.

प्रशिक्षाण सहभागी प्रशिक्षणार्थींनी प्रशिक्षणाबाबत आपले मनोगत व्‍यक्‍त केले. प्रमुख अन्वेषक डॉ. गोपाळ शिंदे यांनी नाहेप प्रकल्पाबाबत माहिती दिली तर कार्यक्रम सचिव डॉ. गोदावरी पवार यांनी प्रशिक्षणाचा आढावा सादर केला. सूत्रसंचालन डॉ. रश्मी बंगाळे यांनी तर विस्तार शिक्षण विभागाचे विभाग प्रमुख डॉ. राजेश कदम यांनी आभार मानले. कार्यक्रम यशस्‍वीतेसाठी इंजि. शैलेश शिंदे , डॉ. हेमंत रोकडे, रहिम खान, डॉ. स्वाती मुंडे , इंजि. गोपाळ रनेर, श्री जगदीश माने आदींनी परिश्रम घेतले.

Saturday, July 4, 2020

पिक लागवडीवरील खर्च कमी करणारे कृषी तंत्रज्ञान अवलंब करावा ..... विस्‍तार शिक्षण संचालक डॉ देवराव देवसरकर

मौजे भाटेगांव (ता कळमनुरी) येथे शेतक-यांच्‍या प्रक्षेत्रास भेट व मार्गदर्शन

कृषि संजीवनी सप्‍ताहांतर्गत वसंतराव नाईक मराठवाडा कृषि विद्यापीठ व तोंडापुर (जि हिंगोली) येथील कृषि विज्ञान केंद्र यांच्‍या संयुक्‍त विद्यमाने दिनांक 3 जुलै रोजी मौजे भाटेगांव (ता कळमनुरी) येथे शेतक-यांना मार्गदर्शन करण्‍यात आले. कार्यक्रमास मुख्‍य मार्गदर्शक विस्‍तार शिक्षण संचालक डॉ देवराव देवसरकर यांनी मार्गदर्शन केले तर कार्यक्रमाच्‍या अध्‍यक्षस्‍थानी कयाधु शेतकरी उत्‍पादक कंपनीचे संचालक श्री आबासाहेब कदम हे होते व वरिष्‍ठ शास्‍त्रज्ञ डॉ प्रमोद शेळके, विषय विशेषतज्ञ डॉ अनिल ओळंबे, डॉ अजय सुगावे, रोहीणी शिंदे आदींची उपस्थिती होती.

मार्गदर्शन करतांना डॉ देवराव देवसरकर म्‍हणाले की, पिक लागवडीवरील खर्च कमी करून उत्‍पादन वाढीसाठी शेतक-यांनी स्‍वत: चे बियाणे स्‍वत: तयार करावे व घरीच लिबोळीं अर्क तयार करून वापरावे. उत्‍पादन वाढीसाठी सोयाबीनची पेरणी रूंद वरंबा व सरी पध्‍दतीने करावी, जेणे करून जास्‍त पाऊस झाल्‍यास सरीवाटे पाण्‍याचा निचरा होईल व कमी पाऊसात सरीमधील पाण्‍याचा पिक वाढीसाठी उपयोग होईल. हळद पिकासाठी लागवडी अगोदर रासायनिक व जैविक बेणे प्रक्रिया करून लागवड करावी, ज्‍यामुळे रोगाचा प्रादुर्भाव होणार नाही.

कार्यक्रमात शेतक-यांना कीड व्‍यवस्‍थापनाकरिता कामगंध सापळयाचा वापर यावर डॉ अजय सुगावे यांनी माहिती दिली तर सुरक्षित बियाणे साठवणुक यावर डॉ रोहणी शिंदे यांनी माहिती दिली. प्रास्‍ताविक डॉ प्रमोद शेळके यांनी केले तर सुत्रसंचालन डॉ अनिल ओळंबे यांनी केले. प्रगतशील शेतकरी श्री चंद्रशेखर गावंडे यांच्‍या शेतीस देऊन बीबीएफ पध्‍दतीने पेरणी केलेल्‍या व ठिंबक सिंचन पध्‍दतीचा वापर केलेल्‍या हळदीच्‍या प्रक्षेत्रास भेट दिली. कार्यक्रमास गावातील शेतकरी उपस्थित होते.

अर्धापुर तालुक्‍यातील मौजे मेंढल व लहान येथील शेतक-यांच्‍या बांधावर जाऊन विस्‍तार शिक्षण संचालक यांचे मार्गदर्शन

कृषि संजीवनी सप्‍ताहांतर्गत वसंतराव नाईक मराठवाडा कृषि विद्यापीठ व कृषि विभाग, महाराष्‍ट्र शासन यांचे संयुक्‍त विद्यमाने दिनांक 2 जुलै रोजी अर्धापुर (जि नांदेड) तालुक्‍यातील मौजे मेंढल व मौजे लहान येथील शेतक-यांच्‍या बांधावर जाऊन विस्‍तार शिक्षण संचालक डॉ देवराव देवसरकर यांनी मार्गदर्शन केले, यावेळी उपविभागीय कृषि अधिकारी श्री सुखदेव यांची उपस्थिती होती. मार्गदर्शनात डॉ देवराव देवसरकर म्‍हणाले की, शेतकरी बांधवानी कीड व्‍यवस्‍थापनाकरिता कमी खर्चात घरीच 5 टक्के निंबोळी अर्क तयार करून फवारणी करावी. तसेच त्‍यांनी कपाशीतील कीड व खत व्‍यवस्‍थापन, सोयाबीन पिकातील तणनाशकाबाबत मार्गदर्शन केले. मौजे लहान येथे केळी काढणी, केळीचे विविध वाण व त्‍याकरिता लागणा-या खतांच्‍या मात्रा बाबत शेतक-यांना बांधावर जावुन मार्गदर्शन केले. यावेळी परिसरातील शेतकरी उपस्थित होते.

वनामकृविच्‍या वतीने शेतकरी महिलांसाठी डिजिटल तंत्रज्ञानाद्वारे शेतकरी महिलांची आत्‍मनिर्भरता यावर राज्यस्तरीय वेबिनार


वसंतराव नाईक मराठवाडा कृषि विद्यापीठातील भारतीय कृषी अनुसंधान परिषद, नवी दिल्ली आणि जागतिक बँक पुरस्‍कृत राष्ट्रीय कृषी उच्च शिक्षण प्रकल्प (नाहेप), सेंटर ऑफ एक्सलन्स उत्पादकता वाढीकरता यंत्रमानव, ड्रोन आणि स्वयंचलित यंत्राद्वारे शेती प्रकल्पाच्‍या वतीने डिजिटल तंत्रज्ञानाद्वारे शेतकरी महिलांची आत्‍मनिर्भरता या विषयावर दि. 6 ते 10 जुलै दरम्‍यान राज्यस्तरीय वेबिनारचे आयोजन करण्यात आले आहे. वेबीनारचे उदघाटन दिनांक 6 जुलै रोजी कुलगुरू मा डॉ अशोक ढवण यांच्‍या अध्‍यक्षतेखाली पार पडणार असून प्रमुख पाहुणे म्हणून पुणे येथील अटरी संस्‍थेचे  संचालक डॉ. लखनसिंग, पद्मश्री बीजमाता सौ. राही बाई पोपेरे, दौंड येथील अंबिका मसालेच्‍या  संचालिका सौ. कमलताई परदेशी आदी उपस्थित राहणार आहेत.
पाच दिवस चालणा-या वेबिनार मध्ये औरंगाबाद विभागीय कृषी सहसंचालक डॉ. दिनकर  जाधवप्राचार्या डॉ. जयश्री झेंड, एम.सी.इ.डी. औरंगाबाद चे माजी सहसंचालक श्री दीपक भिंगारदेव, मानसोपचार तज्ञ डॉ. साधना देशमुख, मुंबई हॉस्पिटलचे अली यावर जंग, बायफ पुणेचे श्री संजय पाटील, पुणे येथील कृषी आणि पाणी संवर्धन विभागाचे विभाग प्रमुख श्री प्रीतम वंजारी आदींचे मार्गदर्शन लाभनार आहे. तसेच समारोप कार्यक्रमास भारतीय कृषी अनुसंधान परिषदेतील नाहेप प्रकल्‍पाचे राष्ट्रीय संचालक डॉ. आर. सी. अग्रवाल, अभिनव फार्मर्स क्लब पुणेचे अध्यक्ष श्री ज्ञानेश्वर बोडके, सर्वोत्कृष्ट भारतीय महिला किसान पुरस्कार विजेत्या व ऑरगॅनिक फर्मिंग बारामतीच्या अध्यक्षा श्रीमती स्वाती शिंगाडे यांचे मार्गदर्शन लाभणार आहे.
वेबिनार मध्ये शेतकरी महिलाना श्रम कमी करणाऱ्या, कमी किमतीच्या साधनांचा उपयोग विषयी, शेतकरी महिलांसाठी शासकीय योजनां, कृषि उद्योगाद्वारे महिलांचे आर्थिक सक्षमीकरण, मानसिक आरोग्याची काळजी, बीज शास्त्रोक्त संवर्धन पद्धतीडिजिटल तंत्रज्ञानाचा अवलंब, शेती तंत्रज्ञानाचा अवलंब करण्यामध्ये महिलांची भूमिका, महिलांची गटशेती व फायदे, महिलांसाठी कृषि आधारित गृहउद्योग आदी विषयावर अनुभवी व तज्ञ मार्गदर्शन करणार आहेत. अधिकाधिक महिलांच्या सहभागा करिता दुपारी 12.00 ते 3.00 दरम्यान हा वेबिनार असून यासाठी शेतकरी महिलांनी, युवतींनी  नोंदणी  करावी. प्रथम नोंदणी करणाऱ्या प्राधान्य असल्यामूळे नोंदणी करून या संधीचा लाभ घ्यावा.   जास्तीत जास्त 450 महिलांना झुम मीटिंग द्वारे लाभ घेता येईल. यू ट्यूब लिंक nahep-vnmkv-dfsrda द्वारे वेबिणार चा लाभ घेता येईल. वेबिनरचे आयोजन डॉ वीणा भालेराव, प्रमुख संशोधक डॉ गोपाळ शिंदे, डॉ गोदावरी पवार, डॉ मेघा जगताप आदीसह कोअर टीम मेंबर यांनी केले.


महिला शेतक-यांनी आधुनिक तंत्रज्ञानाची कास धरावी ...... कुलगुरू मा डॉ.अशोक ढवण

मौजे हिंगळजवाडी (जि उस्‍मानाबाद) येथे आयोजित महिला मेळाव्‍यात मार्गदर्शन

माजी मुख्‍यमंत्री तथा हरित क्रांतीचे प्रणेते स्‍व. वसंतराव नाईक यांच्‍या जयंती निमित्‍त वसंतराव नाईक मराठवाडा कृषि विद्यापीठाच्‍या वतीने कृषि संजीवनी सप्‍ताहाचे आयोजन करण्‍यात आले असुन दिनांक 2 जुलै रोजी उस्‍मानाबाद येथील कृषि महाविद्यालय व कृषि विभाग यांचे संयुक्त विद्यमाने मौजे हिंगळजवाडी महिला शेती शाळेचे आयोजन करण्‍यात आले होते. मेळाव्‍याच्‍या अध्‍यक्षस्‍थानी कुलगुरू मा डॉ. अशोक ढवण हे होते, तर प्राचार्य डॉ राकेश अहिरे, तालुका कृषि अधिकारी ज्ञानेश्‍वर जाधव, तुळजापुर कृषी विज्ञान केंद्राचे कार्यक्रम समन्‍वयक डॉ सचिन सुर्यवंशी आदींची प्रमुख उपस्थिती होती.

मार्गदर्शनात कुलगुरू मा डॉ अशोक ढवण म्‍हणाले की, ग्रामीण भागातील महिला शेतक-यांनी कुटुंबाची आर्थिक परिस्थिती सुधारण्‍याकरिता बचत गट स्‍थापन करून शेती पुरक व्‍यवसाय सुरू करावा. महिलांनी आपल्‍या परसबागेत विषमुक्‍त भाजीपाला पिकवावा. महिलांनी आधुनिक तंत्रज्ञान आत्मसात करून त्याचा वापर कृषि क्षेत्रात करावा असे आवाहन केले.

कृषि सहाय्यक वैभव लेणेकर यांनी महिला शेती शाळेची माहिती दिली तर डॉ आरबाड यांनी सोयाबीन लागवड तंत्रज्ञानावर मार्गदर्शन केले. प्रास्‍ताविक कृषि सहाय्यक श्री देशमुख यांनी केले. सुत्रसंचालन डॉ प्रविण चव्‍हाण यांनी केले तर आभार डॉ किरण थोरात यांनी मानले. कार्यक्रमास महिला शेतकरी, कृषि महाविद्यालया व कृषि विभागातील अधिकारी व कर्मचारी उपस्थित होते. कार्यक्रमाच्‍या वेळेस कोरोना विषाणु रोगाच्‍या पार्श्‍वभुमीवर सर्व प्रतिबंधात्‍मक दक्षता घेण्‍यात आली होती.

Friday, July 3, 2020

वनामकृविच्‍या वतीने वसमत तालुक्‍यातील मौजे चिखली व मौजे सति पांगरा ये‍थे शिवार फेरीचे आयोजन

मा.कुलगुरु डॉ.अशोक ढवण यांची शिवार फेरीत सहभाग व मार्गदर्शन

दिनांक 1 जुलै रोजी माजी मुख्‍यमंत्री तथा हरित क्रांतीचे प्रणेते स्व.वसंतरावजी नाईक यांचा जन्म दिवस कृषि दिन म्हणून साजरा करण्यात येतो. यावर्षी वसंतराव नाईक मराठवाडा कृषि विद्यापीठ व कृषि विभाग यांच्‍या वतीने संपुर्ण मराठवाडयात दिनांक 1 जुलै ते 7 जुलै दरम्‍यान कृ‍षि संजीवनी सप्‍ताह अभियान राबविण्‍यात येत असुन दिनांक 1 जुलै रोजी वसमत तालुक्‍यातील मौजे चिखली व मौजे सति पांगरा येथे शिवार फेरीचे आयोजन करण्‍यात आले होते. शिवार फेरी कुलगुरू मा डॉ अशोक ढवण यांची विशेष उपस्थिती होती तर संचालक विस्तार शिक्षण डॉ. डी. बी. देवसरकर, मुख्य विस्तार शिक्षण अधिकारी डॉ.पी.आर.देमुख, विस्तार कृषि विद्यावेत्ता डॉ. यु. एन. आळसे, उपविभागीय कृषि अधिकारी हिंगोली श्री. बी. एस. कच्छवे, तालुका कृषि अधिकारी श्री.कल्याणपाड आदींची उपस्थिती होती. कोविड-19 विषाणुच्‍या प्रादुर्भावात सर्व नियमांचे पालन करून शिवार फेरी घेण्यात आली.

मौजे चिखली येथील शिवार फेरी दरम्‍यान मा. कुलगुरू डॉ.अशोक ढवण यांनी तिफणीवर सोयबीनची पेरणी केली व शेतक-यांशी संवाद साधला. मौ.सति पांगरा येथे कुलगुरू मा. डॉ. शोक ढवण वृक्षारोपन करण्‍यता आले. सध्या परिसरात सोयबीन, कापुस, हळद आदी पीके बहरली असून पाऊस समाधानकारक आहे. वाटेत सोयबीन कोळपणी चालू असतांना मा.कुलगुरु व संचालक विस्तार शिक्षण यांना कोळपेच्‍या सहाय्याने शेतक-यांसोबत कोळपणी केली.

वसमत तालुक्यात करवंद हे एक नविन फळपीक म्हणून पुढे येत असुन जवळपास शंभर एकर क्षेत्रावर करवंदाची व पेरुची लागवड झाली आहे. श्री.संजय लोंढे यांचे शेतात दहा एकर क्षेत्रावर करवंद पेरू आंतरपीक घेण्यात आले आहे, याची पाहणी मान्‍यवरांनी केली. तालुक्यात ओवा लागवडही मोठया प्रमाणावर होणार असल्याचे शेतक-यांनी सांगितले. कुलगुरु मा.डॉ अशोक ढवण यांनी फळपिकांचे विपणन, आकर्षक पॅकींग, प्रक्रिया आदी विषयांवर शेतक-यांना सविस्तर मार्गदर्शन केले. डॉ.देवसरकर यांनी शेतक-यांना ओवा, करवंद, पेरू पीकांवर एक दिवसाचे प्रशिक्षण विद्यापीठस्तरावर आयोजित करण्यात येईल असे सांगितले. श्री.कच्छवे यांनी कृषि विभागातील योजनांची तर श्री.कल्याणपाड यांनी लॉकडाऊनच्या काळात गटामार्फत थेट विक्री केल्याची माहिती दिली.

शेतकरी श्री.बालाजी यवंते, श्री.कदम, श्री.संजय शिंदे यांनी करवंद पीकाला फळपिक म्हणून मान्यता मिळावी व प्रक्रिया उद्योगासाठी विद्यापीठाने सहकार्य करावे अशी मागणी केली. हिंगोली जिल्हयातील शेतक-यांनी केलेल्या नाविन्यपुर्ण उपक्रमांची मा कुलगुरू यांनी  प्रशंसा करून इतर शेतक-यांनी त्याच्या आदर्श घेण्‍याचा सल्‍ला दिला.