वनामकृविच्‍या वतीने जागतिक मधमाशी दिन साजरा
वसंतराव नाईक मराठवाडा कृषि विद्यापीठातील कृषि किटकशास्‍त्र विभाग व औरंगाबाद येथील कृषि विज्ञान केंद्, पैठण रोड, औरंगाबाद यांच्‍या संयुक्‍त विद्यमाने दिनांक २० मे रोजी जागतिक मधमाशी दिन ऑफलाईन व ऑनलाईन पध्‍दतीने साजरा करण्‍यात आला. कार्यक्रमाच्‍या अध्‍यक्षस्‍थानी कुलगुरू मा डॉ अशोक ढवण हे होते तर पुणे येथील अटारी संस्‍थेचे संचालक डॉ लाखन सिंग, शिक्षण संचालक डॉ धर्मराज गोखले, विस्तार शिक्षण संचालक डॉ देवराव देवसरकर, प्राचार्य डॉ सय्यद ईस्‍माईल, विभाग प्रमुख डॉ संजीव बंटेवाड, औरंगाबाद विभागीय कृषि सहसंचालक डॉ दिनकर जाधव, राष्‍ट्रीय कृषि संशोधन प्रकल्‍पाचे प्रमुख डॉ सुर्यकांत पवार, पुणे येथील केंद्रीय मक्षिकापालन प्रशिक्षण संस्‍थेचे माजी विकास अधिकारी डॉ डी एम वाखळे, डॉ पुरूषोत्‍तम नेहरकर, औरंगाबाद कृषि विज्ञान केंद्राचे प्रमुख डॉ किशोर झाडे आदींची प्रमुख सहभाग होता.
अध्‍यक्षीय भाषणात कुलगुरू मा डॉ अशोक ढवण म्‍हणाले की, पर्यावरण संतुलनात व जैवविविधता टिकविण्‍यात मधमाशांचा महत्‍वाचा भाग आहे. मनुष्‍याला मधुमक्षिक हया सतत कार्यमग्‍न राहतात तसेच एकोप्‍याने समुहाने राहतात, हे गुण मनुष्‍यास शिकण्‍यासारखा आहे. मधमाशांचे नैसर्गिक अधिवास वाढविणे गरजेचे असुन यासाठी विद्यापीठ शास्‍त्रज्ञांनी मधुमक्षिकापालनाबाबत जागृती करणे महत्‍वाचे आहे. विद्यापीठ परिसरात वृक्षलागवड करतांना मधुमक्षिकांच्‍या अधिवास वाढविण्‍याचाही विचार करण्‍यात आला. किमान २० टक्के क्षेत्रावर विविध वृक्षांची लागवड करावी. शेतकरी बांधवानीही मधुमक्षिकांच्‍या अधिवास वाढविण्‍याच्‍या दृष्‍टीने आपल्‍या शेतात विविध प्रकारच्‍या वृक्षांची लागवड करण्‍याचा त्‍यांनी सल्‍ला दिला.
मार्गदर्शनात डॉ लाखन सिंग म्‍हणाले की, मधमाशा या संपुर्णपणे समर्पक भावनेने आपणाला नेहमी काही ना काही देत असतात, त्‍यांचे संवर्धन करणे महत्‍वाचे आहे. मधुमक्षिकापालकांची एक साखळी तयार करण्‍याची गरज असल्‍याचे ते म्‍हणाले. डॉ धर्मराज गोखले यांनी मधुमक्षिकाचे शेतीत विविध पिकावरील परागीकरणात महत्‍व असुन पिकांना चांगल्‍या प्रकारे फळधारणा होण्‍यास मदत होते असे सांगितले तर डॉ देवराव देवसरकर यांनी मधुमक्षिकापालनातुन शेतीव्‍यतिरिक्‍त उत्‍पादन मिळु शकते असे सांगितले.
मधमाशांपासुन बहुगुणी मध व इतर उत्‍पादने यावर डॉ डी एम वाखळे यांनी तर डॉ पुरूषोत्‍तम नेहरकर यांनी मधमाशांच्‍या प्रजाती, कुटुंब व मधमाशी पालनात घ्‍यावयाची दक्षता, शुध्‍द मधाची चाचणी यावर मार्गदर्शन केले.
कार्यक्रमाचे प्रास्‍ताविक डॉ संजीव बंटेवाड यांनी केले. सुत्रसंचालन डॉ किशोर झाडे यांनी तर आभार डॉ बसवराज भेदे यांनी मानले. कार्यक्रम यशस्‍वीतेसाठी डॉ पी आर झंवर, डॉ एस एस गोसलवाड, डॉ डी आर कदम, डॉ एम एम सोनकांबळे, डॉ ए जी लाड, डॉ एफ एस खान, डॉ धुरगुडे, डॉ बोकण, श्री ए एस खंदारे, श्री बदाले, टी जी शेंगुळे, अली अहमद, हारके आदींनी नियोजन केले. कार्यक्रमात औरंगाबाद जिल्‍हयातील व राज्‍यातील शेतकरी मोठया संख्‍यनेने ऑनलाईन पध्‍दतीने सहभागी झाले होते.
