यशस्विनी महिला मंचच्या प्रदर्शन व विक्री महोत्सवाला माननीय कुलगुरू प्रा. (डॉ.) इन्द्र मणि व माननीय आमदार डॉ. राहुल पाटील यांची भेट; महिला बचत गटांच्या उत्पादनांचे डिजिटलायझेशन करून विक्री लाखोंच्या घरात पोहोचवावी – माननीय कुलगुरूंचे प्रतिपादन

 बचत गटांच्या उत्पादनांना व्यापक बाजारपेठ उपलब्ध करून दिली जाईल – माननीय आमदार डॉ. राहुल पाटील

यशस्विनी महिला मंचच्या वतीने महिला बचत गट व महिला गृहउद्योगिकांनी उत्पादित केलेल्या वस्तूंचे तीन दिवसीय भव्य प्रदर्शन व विक्री महोत्सव दिनांक ३० व ३१ ऑक्टोबर तसेच १ नोव्हेंबर २०२६ रोजी आयोजित करण्यात आला. या प्रदर्शनाला नागरिकांचा उत्स्फूर्त प्रतिसाद लाभला. दिनांक १ नोव्हेंबर रोजी वसंतराव नाईक मराठवाडा कृषी विद्यापीठाचे माननीय कुलगुरू प्रा. (डॉ.) इन्द्र मणि, माननीय आमदार डॉ. राहुल पाटील आणि डॉ. विवेक नावंदर यांनी प्रदर्शनातील विविध दालनांना भेट देऊन महिला बचत गटांच्या उत्पादनांची पाहणी केली.

यावेळी माननीय कुलगुरू प्रा. (डॉ.) इन्द्र मणि यांनी महिला उत्पादकांशी संवाद साधून त्यांच्या उपक्रमांचे कौतुक केले तसेच भविष्यातील वाटचालीसाठी मार्गदर्शन केले. ते म्हणाले की, या प्रदर्शनाच्या माध्यमातून आतापर्यंत सुमारे ५० हजार रुपयांची विक्री झाल्याचे समजले. ही विक्री भविष्यात लाखोंच्या घरात जावी, अशी अपेक्षा व्यक्त करून त्यांनी आयोजकांना शुभेच्छा दिल्या. महिलांनी स्वतः तयार केलेल्या पदार्थांची व वस्तूंची या प्रदर्शनात विक्री होत असल्याबद्दल त्यांनी समाधान व्यक्त केले. महिला बचत गटांच्या उत्पादनांचे डिजिटलायझेशन होणे अत्यंत आवश्यक असून, त्याद्वारे त्यांच्या उत्पादनांना व्यापक बाजारपेठ उपलब्ध होण्यास मदत होईल, असे त्यांनी नमूद केले. यशस्विनी महिला मंचच्या माध्यमातून जनकल्याण आणि महिला कल्याणाचे मोठे कार्य होत असून, हे कार्य असेच वर्षानुवर्षे सातत्याने सुरू राहावे, अशी सदिच्छाही त्यांनी व्यक्त केली.

माननीय आमदार डॉ. राहुल पाटील यांनी दरवर्षी आयोजित करण्यात येणाऱ्या या भव्य प्रदर्शन व विक्री महोत्सवाची वाढती व्याप्ती आणि सहभागी महिला बचत गटांची वाढती संख्या याबद्दल समाधान व्यक्त केले. ते म्हणाले की, तीन चार वर्षांपूर्वी यशस्विनी महिला मंचने या उपक्रमाची सुरुवात केली, तेव्हा त्याला मर्यादित प्रतिसाद मिळाला होता. मात्र, सातत्यपूर्ण प्रयत्नांमुळे आज या प्रदर्शनात मराठवाड्यातील विविध जिल्ह्यांसह इतर जिल्ह्यांतील महिला बचत गटही मोठ्या संख्येने सहभागी होत आहेत. महिला बचत गटांनी उत्पादित केलेल्या वस्तूंना बाजारपेठ उपलब्ध करून देणे, त्यांच्या उत्पादनांची विक्री वाढविणे आणि महिलांना आर्थिकदृष्ट्या स्वावलंबी बनविणे हा या उपक्रमाचा मुख्य उद्देश असल्याचे त्यांनी स्पष्ट केले.

सर्व महिला बचत गटांनी आपल्या उत्पादनांसाठी स्वतंत्र बारकोड तयार करावेत, असे आवाहन त्यांनी केले. बारकोडच्या माध्यमातून संबंधित बचत गटाचा पत्ता, उपलब्ध उत्पादने आणि त्यांचे विक्री दर यांची माहिती ग्राहकांना सहज उपलब्ध होऊ शकेल. यासाठी यशस्विनी महिला मंचच्या सदस्यांनी पुढाकार घेऊन सर्व बचत गटांना मार्गदर्शन करावे, असेही त्यांनी सुचविले.

परभणी जिल्ह्यातील सर्व महिला बचत गटांच्या उभारणीसाठी आणि त्यांच्या उत्पादनांना व्यापक बाजारपेठ उपलब्ध करून देण्यासाठी यशस्विनी महिला मंचच्या माध्यमातून सर्वतोपरी सहकार्य व प्रोत्साहन दिले जाईल, अशी ग्वाही त्यांनी दिली. भविष्यात या प्रदर्शनाची व्याप्ती अधिक वाढवून परभणी येथील स्टेडियम मैदानावर भव्य प्रदर्शन व विक्री महोत्सव आयोजित करण्याचा मानसही त्यांनी व्यक्त केला.

तसेच, साखर कारखान्याच्या माध्यमातून सध्या सवलतीच्या दरात साखर उपलब्ध करून दिली जात आहे. याच धर्तीवर विविध प्रकारची अन्नधान्ये व कडधान्ये उपलब्ध करून त्यांचे विक्री व्यवस्थापन महिला बचत गटांच्या माध्यमातून करण्यासाठी पुढाकार घेतला जाईल. याशिवाय महिला सूतगिरणी आणि दुग्धव्यवसायाला चालना देऊन जिल्ह्यातील महिला व शेतकऱ्यांच्या आर्थिक सक्षमीकरणासाठी प्रयत्न करण्यात येतील, असेही माननीय आमदार डॉ. राहुल पाटील यांनी सांगितले.

डॉ. विवेक नावंदर यांनी यशस्विनी महिला मंचच्या कार्याची आणि प्रगतीची प्रशंसा केली. ते म्हणाले की, सध्या त्यांच्या दवाखान्यासमोर यशस्विनी महिला मंचचे कार्यालय असून, कार्यालयाच्या पत्त्यामध्ये ‘नावंदर हॉस्पिटलसमोर’ असा उल्लेख केला जातो. मात्र, मंचची अशीच प्रगती होत राहिल्यास भविष्यात ‘यशस्विनी महिला मंचच्या कार्यालयासमोर नावंदर हॉस्पिटल’ असा पत्ता सांगण्याची वेळ येईल, असे गौरवोद्गार त्यांनी काढले. या मंचाच्या कार्याला कोणत्याही मर्यादा नसून, त्याची व्याप्ती दिवसेंदिवस वाढत असल्याचे पाहून आनंद होत असल्याचे त्यांनी नमूद केले. समाजातील तळागाळातील आणि शेवटच्या घटकापर्यंत या उपक्रमाचा लाभ पोहोचत असल्याबद्दल त्यांनी समाधान व्यक्त करून मंचच्या पुढील वाटचालीस शुभेच्छा दिल्या.

सामुदायिक विज्ञान महाविद्यालयाच्या विद्यार्थिनींचे उत्पादन प्रदर्शन

या प्रदर्शनात वसंतराव नाईक मराठवाडा कृषी विद्यापीठाच्या सामुदायिक विज्ञान महाविद्यालयातील आठव्या सत्रातील विद्यार्थिनींनी ‘अनुभवातून शिक्षण’ या उपक्रमांतर्गत स्वतंत्र दालन उभारले होते. अधिष्ठाता डॉ. नीता गायकवाड यांच्या पुढाकारातून आणि शिक्षण प्रभारी डॉ. शंकर पुरी तसेच समन्वयक डॉ. अश्विनी बिडवे आणि डॉ कल्पना लहाडे यांच्या मार्गदर्शनाखाली विद्यार्थिनींनी स्वतः तयार केलेल्या विविध कलाकृती, महिलांसाठी उपयुक्त सौंदर्य व शृंगार साहित्य, विविध खाद्यपदार्थ तसेच कोल्ड कॉफी आदी उत्पादनांचे प्रदर्शन व विक्री केली.

माननीय कुलगुरू प्रा. (डॉ.) इन्द्र मणि यांनी विद्यार्थिनींच्या दालनाला भेट देऊन त्यांच्या सर्जनशीलतेचे, कौशल्याचे आणि उद्योजकीय दृष्टिकोनाचे कौतुक केले. विद्यार्थिनींना प्रत्यक्ष उत्पादन निर्मिती, उत्पादनांचे सादरीकरण आणि विक्री यांचा अनुभव मिळण्याच्या दृष्टीने अशा उपक्रमांचे महत्त्व अनन्यसाधारण असल्याचे त्यांनी अधोरेखित केले.

कार्यक्रमाच्या आयोजिका डॉ. संपप्रिया पाटील यांनी माननीय कुलगुरू प्रा. (डॉ.) इन्द्र मणि, आमदार डॉ. राहुल पाटील आणि डॉ. विवेक नावंदर यांनी प्रदर्शनातील विविध दालनांना भेट देऊन दालनधारकांचा उत्साह वाढविला तसेच भविष्यातील वाटचालीसाठी मार्गदर्शन केले, याबद्दल त्यांचे आभार मानले. कार्यक्रमाचे सूत्रसंचालन श्री. मकरंद कुलकर्णी यांनी केले.

जनहिताची बांधिलकी जपत प्रशासकीय सेवेत उल्लेखनीय कार्य; सेवानिवृत्तीनिमित्त माननीय जिल्हाधिकारी संजयसिंह चव्हाण यांना सन्मानपूर्वक निरोप

 माननीय पालकमंत्री मेघना साकोरे-बोर्डीकर यांच्या हस्ते मानपत्र देऊन गौरव

 माननीय कुलगुरू प्रा. (डॉ.) इन्द्र मणि यांच्याकडून संजयसिंह चव्हाण यांच्या कार्यपद्धतीचे  कौतुक

परभणी जिल्ह्याच्या विकासाला गती देताना विविध प्रलंबित प्रश्न मार्गी लावणे, लोकाभिमुख कामांना प्राधान्य देणे आणि सर्वसामान्य नागरिकांच्या प्रश्नांप्रति संवेदनशील दृष्टिकोन ठेवून प्रशासकीय जबाबदारी पार पाडणारे माननीय जिल्हाधिकारी संजयसिंह चव्हाण यांना सेवानिवृत्तीनिमित्त पालकमंत्री माननीय नामदार मेघना साकोरे-बोर्डीकर यांच्या हस्ते मानपत्र देऊन सन्मानपूर्वक निरोप देण्यात आला. तर नूतन जिल्हाधिकारी माननीय अण्णासाहेब चव्हाण यांचे स्वागत करण्यात आले. यावेळी विविध मान्यवरांनी जिल्हाधिकारी संजयसिंह चव्हाण यांच्या प्रशासकीय सेवेतील योगदानाचा मनोगतातून गौरव केला.

जिल्हाधिकारी कार्यालयाच्या नियोजन सभागृहात जिल्हाधिकारी संजयसिंह चव्हाण यांच्या निरोप समारंभाचा कार्यक्रम दिनांक ३० ऑक्टोबर २०२६ रोजी संपन्न झाला. या समारंभास महापौर माननीय सय्यद इकबाल सय्यद खाजा, वसंतराव नाईक मराठवाडा कृषी विद्यापीठाचे माननीय कुलगुरू प्रा. (डॉ.) इन्द्र मणि, सेलूचे नगराध्यक्ष श्री. मिलिंद सावंत, जिल्हा परिषदेच्या मुख्य कार्यकारी अधिकारी श्रीमती नतिशा माथुर, ज्येष्ठ कवी श्री. इंद्रजित भालेराव, अप्पर जिल्हाधिकारी शोभा जाधव, महापालिका माननीय आयुक्त नितीन नार्वेकर, निवासी उपजिल्हाधिकारी अनुराधा ढालकरी, उपविभागीय अधिकारी उदयसिंह भोसले, जीवराज डापकर, शैलेश लाहोटी तसेच माननीय जिल्हाधिकारी संजयसिंह चव्हाण यांच्या पत्नी संयोगिता चव्हाण व कुटुंबीय यांच्यासह विविध विभागांचे अधिकारी, कर्मचारी, पदाधिकारी, पत्रकार आणि नागरिक उपस्थित होते.

प्रलंबित प्रश्न मार्गी लावण्यात श्री. चव्हाण यांचे योगदान महत्त्वाचे – पालकमंत्री

माननीय पालकमंत्री मेघना साकोरे-बोर्डीकर म्हणाल्या की, जिल्हाधिकारी संजयसिंह चव्हाण यांनी आपल्या कार्यकाळात परभणी जिल्ह्यातील अनेक प्रलंबित प्रश्न कौशल्यपूर्ण पद्धतीने मार्गी लावले. जिल्ह्याच्या विकासाला गती देण्यासोबतच अनेक लोकाभिमुख कामे त्यांनी प्रभावीपणे पूर्ण केली. प्रशासकीय अनुभव, निर्णयक्षमता आणि कामाप्रती असलेली बांधिलकी यांमुळे जिल्ह्यातील विविध कामांना गती मिळाली. त्यांच्या प्रभावी कार्याचा जिल्ह्याच्या प्रशासकीय वाटचालीत महत्त्वाचा ठसा उमटला आहे.

संवेदनशील आणि सरळ व्यक्तिमत्त्वाचे अधिकारी

वसंतराव नाईक मराठवाडा कृषी विद्यापीठाचे माननीय कुलगुरू प्रा. (डॉ.) इन्द्र मणि यांनी संजयसिंह चव्हाण यांच्या कार्यपद्धतीचे कौतुक केले. ते सरळ, संवेदनशील आणि सहकार्याची भावना जपणारे व्यक्तिमत्त्व असल्याचे सांगत त्यांच्या कार्यकाळात विद्यापीठाशी संबंधित महत्त्वाची कामे मार्गी लागल्याचे त्यांनी नमूद केले. त्यांच्यासोबत काम करण्याचा अनुभव मूल्यवान असल्याचेही त्यांनी सांगितले.

जिल्हा परिषदेच्या मुख्य कार्यकारी अधिकारी नतिशा माथुर यांनी श्री. चव्हाण यांच्या प्रशासकीय कार्यशैलीचे कौतुक केले. विविध विषयांवर तातडीने निर्णय घेऊन कामे मार्गी लावण्याची त्यांची हातोटी उल्लेखनीय होती. त्यांच्या कार्यपद्धतीतून प्रशासनातील तत्परता आणि कर्तव्यनिष्ठेचे दर्शन घडल्याचे त्यांनी सांगितले.

 

ज्येष्ठ कवी इंद्रजित भालेराव यांनी संजयसिंह चव्हाण यांच्या सुसंस्कृत आणि संवेदनशील कार्यपद्धतीचा गौरव केला. त्यांच्या सहवासातील अनुभव कथन करताना त्यांनी श्री. चव्हाण यांच्या व्यक्तिमत्त्वातील आपुलकी आणि प्रशासकीय कामातील सकारात्मक दृष्टिकोन अधोरेखित केला.

३६ वर्षांच्या सेवेत जनहिताला दिले प्राधान्य

सत्काराला उत्तर देताना जिल्हाधिकारी संजयसिंह चव्हाण भावुक झाले. प्रशासकीय सेवेत आपल्यावर सोपविण्यात आलेली जबाबदारी प्रामाणिकपणे पार पाडण्याचा प्रयत्न केला, याचे मनस्वी समाधान असल्याचे त्यांनी सांगितले. आपल्या ३६ वर्षांच्या सेवाकाळात प्रशासनाच्या माध्यमातून सर्वसामान्य नागरिक, गोरगरीब आणि गरजू व्यक्तींची कामे करता आली, हीच आपल्यासाठी मोठी उपलब्धी असल्याचे त्यांनी नमूद केले. परभणी जिल्ह्यातील कार्यकाळात अनेक आव्हानात्मक परिस्थितींना सामोरे जावे लागले. मात्र, सर्व अधिकारी, कर्मचारी आणि सहकाऱ्यांच्या मदतीने विविध कामे सचोटीने पूर्ण करता आली. प्रशासकीय कामकाज करताना सामान्य माणूस हाच केंद्रबिंदू असला पाहिजे. प्रत्येक नागरिकाचे प्रश्न संवेदनशीलतेने समजून घेत त्यांना न्याय देण्याचा प्रयत्न प्रशासनातील प्रत्येक घटकाने करावा, असा संदेशही त्यांनी यावेळी दिला.

नूतन जिल्हाधिकारी अण्णासाहेब चव्हाण यांनी परभणी जिल्ह्याच्या विकासकामांना अधिक गती देतानाच नागरिकांच्या अपेक्षा पूर्ण करण्यासाठी आणि विविध प्रश्न मार्गी लावण्यासाठी प्रशासनाच्या माध्यमातून प्रयत्न केले जातील. जिल्ह्याच्या सर्वांगीण प्रगतीसाठी समन्वयाने आणि सकारात्मक दृष्टिकोनातून काम करण्यावर भर राहील, असे सांगितले.

कार्यक्रमात विविध अधिकारी व मान्यवरांनी जिल्हाधिकारी संजयसिंह चव्हाण यांच्या कार्यशैलीचे आणि प्रशासकीय योगदानाचे स्मरण करत त्यांना पुढील आयुष्यासाठी शुभेच्छा दिल्या.

अनुकंपाधारकांना नियुक्तीपत्रांचे वितरण

यावेळी पालकमंत्री मेघना साकोरे-बोर्डीकर यांच्या हस्ते वीस अनुकंपाधारकांना नियुक्तीपत्रे तसेच शिफारसपत्रांचे वितरण करण्यात आले.

कार्यक्रमाची प्रस्तावना उपविभागीय अधिकारी उदयसिंह भोसले यांनी केली. मानपत्र देऊन करण्यात आलेला सन्मान, मान्यवरांनी व्यक्त केलेल्या भावना आणि सहकाऱ्यांनी व्यक्त केलेला आदर यांमुळे निरोप समारंभाला विशेष महत्त्व प्राप्त झाले.

यावेळी जिल्हाधिकारी संजयसिंह चव्हाण यांच्या प्रशासकीय कार्याचा आणि जिल्ह्याच्या विकासातील योगदानाचा प्रवास उलगडणारी चित्रफीत दाखविण्यात आली. त्यांच्या कार्यकर्तृत्वाचा वेध घेणाऱ्या या चित्रफितीतून त्यांच्या सेवाकार्याच्या आठवणींना उजाळा मिळाला.

प्रशासकीय सेवेत केलेल्या कामाचा ठसा आणि सहकाऱ्यांच्या मनात निर्माण केलेला विश्वास यांची आठवण जपत जिल्हाधिकारी संजयसिंह चव्हाण यांना सन्मानपूर्वक निरोप देण्यात आला, तर नूतन जिल्हाधिकारी अण्णासाहेब चव्हाण यांचे स्वागत करण्यात आले.

सौजन्य – जिल्हा माहिती केंद्र, परभणी  

 

मौखिक सादरीकरणात प्रथम, तर पोस्टर सादरीकरणात द्वितीय पारितोषिक; डॉ. डी. डी. टेकाळे व सहकाऱ्यांची दुहेरी यशाला गवसणी

 

महाराष्ट्र पशू व मत्स्य विज्ञान विद्यापीठ, नागपूर अंतर्गत महाविद्यालय पशुवैद्यक व पशुविज्ञान, परभणी येथे २९ ते ३१ ऑक्टोबर २०२६ या कालावधीत आयोजित करण्यात आलेल्या असोसिएशन ऑफ मीट सायंटिस्ट्स अँड टेक्नॉलॉजिस्ट्स (AMST) यांच्या आठव्या वार्षिक अधिवेशनात व राष्ट्रीय परिषदेत वसंतराव नाईक मराठवाडा कृषि विद्यापीठाच्या अखिल भारतीय समन्वित संशोधन प्रकल्प - पशुसंवर्धनाचे यांत्रिकीकरण या योजनेचे प्रमुख डॉ. दयानंद टेकाळे (संशोधन अभियंता) व त्यांच्या सहकाऱ्यांनी उल्लेखनीय यश संपादन केले. या परिषदेत मौखिक शोधनिबंध सादरीकरणात प्रथम क्रमांक, तर पोस्टर सादरीकरणात द्वितीय क्रमांकाचे पारितोषिक मिळवून त्यांनी दुहेरी यश संपादन केले.

या राष्ट्रीय परिषदेत 'Sustainable and Innovative Food and Meat System: A One Health Approach for Safety, Nutrition and Resilience for Viksit Bharat' ही संकल्पना केंद्रस्थानी होती. मौखिक सादरीकरणासाठी 'Design and Development of Grooming Unit for Welfare and Performance of Cattle' या विषयावर सादर केलेल्या संशोधनाला प्रथम पारितोषिक मिळाले. तसेच 'Development of Mechanized Washing Unit for Cattle' या विषयावरील पोस्टर सादरीकरणाला द्वितीय पारितोषिक प्रदान करण्यात आले.

या दोन्ही संशोधन कार्यांमध्ये डॉ. डी. डी. टेकाळे, डॉ. पी. डी. राठोड, डॉ. ए. ए. वाघमारे आणि डॉ. एस. देशमुख यांचा सहभाग होता. या परिषदेत मिळालेल्या यशाबद्दल आयोजकांनी संशोधन कार्याचे कौतुक केले. पशुधनाचे आरोग्य, स्वच्छता, कल्याण आणि कार्यक्षमता वाढविण्यासाठी विकसित करण्यात आलेल्या या तंत्रज्ञानाचे विशेष महत्त्व अधोरेखित झाले आहे. या यशामुळे संबंधित संशोधकांचे सर्व स्तरांतून अभिनंदन होत असून पशुवैद्यकीय व पशुसंवर्धन क्षेत्रातील संशोधनाला नवी प्रेरणा मिळाली आहे.

आपल्याकडे सर्व काही असले, तरी शेवटी माणुसकीचा विचार केला पाहिजे : माननीय कुलगुरू प्रा (डॉ.) इन्द्र मणि

 

आपल्याकडे धन, ऐश्वर्य, बळ, विद्या, शिक्षण आणि मनुष्यबळ यांसह सर्व काही उपलब्ध असले, तरी शेवटी माणुसकीचा विचार करणे अत्यंत आवश्यक आहे. माणुसकीचा विचार झालाच पाहिजे, ही काळाची गरज आहे, असे प्रतिपादन परभणी येथील वसंतराव नाईक मराठवाडा कृषी विद्यापीठाचे माननीय कुलगुरू प्रा (डॉ.) इन्द्र मणि यांनी केले.

मानवत जिल्हा परभणी येथील देवी मंदिर सभागृहात दिनांक २९ ऑक्टोबर २०२६ रोजी आयोजित शारदोत्सव व्याख्यानमालेच्या तिसऱ्या व अंतिम पुष्पात प्रमुख पाहुणे म्हणून ते बोलत होते. या कार्यक्रमाच्या अध्यक्षस्थानी योगगुरू विलास मिटकरी होते, तर प्रमुख पाहुणे म्हणून ज्येष्ठ शेतकरी संघटनेचे नेते गोविंदभाऊ जोशी उपस्थित होते.

यावेळी पुढे बोलताना माननीय कुलगुरू प्रा (डॉ.) इन्द्र मणि म्हणाले की, आपल्याकडे विद्या, शिक्षण, मनुष्यबळ आणि विविध सोयी-सुविधा उपलब्ध असल्या, तरी सर्वप्रथम माणुसकीचा विचार करणे महत्त्वाचे आहे. समाजाचे आपण काहीतरी देणे लागतो, ही भावना मनात ठेवून समाजाच्या सर्वांगीण उन्नतीसाठी व विकासासाठी प्रत्येकाने योगदान दिले पाहिजे. परभणी जिल्ह्यातील शेतकरी बांधवांनी तसेच नागरिकांनी कृषी विद्यापीठाच्या विविध उपक्रमांची व कार्याची माहिती घेण्यासाठी प्रत्यक्ष विद्यापीठाला भेट द्यावी, असे आवाहनही त्यांनी केले. आपल्या भाषणातून त्यांनी वसंतराव नाईक मराठवाडा कृषी विद्यापीठाच्या विविध कार्यांचा आढावाही मांडला.

या व्याख्यानमालेत दुसरे प्रमुख पाहुणे म्हणून उपस्थित असलेले ज्येष्ठ शेतकरी संघटनेचे नेते गोविंदभाऊ जोशी यांनीही आपले मनोगत व्यक्त केले. सर्वसामान्य जनतेने शेतकऱ्यांच्या समस्या समजून घेणे आवश्यक असल्याचे मत त्यांनी व्यक्त केले. तसेच शासनाकडून मिळणारा निधी आणि शेतकरीविषयक धोरणांचा उल्लेख करून त्यांनी यासंदर्भात आपले विचार मांडले.

यावेळी सरिता बारहाते यांनी स्वतःच्या अनुभवांच्या आधारे सेंद्रिय शेतीविषयक अनुभव कथन करून उपस्थितांना मार्गदर्शन केले. कार्यक्रमाचे सूत्रसंचालन किशोर तुपसागर यांनी केले.

वनामकृवित ‘रन फॉर युनिटी’ एकता दौड उत्साहात संपन्न

माननीय कुलगुरू प्रा. (डॉ.) इन्द्र मणि व माननीय पोलीस अधीक्षक श्री. पंकज कुमावत यांच्या हस्ते हिरवी झेंडी दाखवून रॅलीचा शुभारंभ

 

भारताचे लोहपुरुष सरदार वल्लभभाई पटेल यांच्या १५१ व्या जयंतीनिमित्त राष्ट्रीय एकता दिवसाचे औचित्य साधून वसंतराव नाईक मराठवाडा कृषी विद्यापीठ, परभणी येथे ‘रन फॉर युनिटी’ अर्थात ‘एकता दौड’ रॅलीचे दिनांक ३१ ऑक्टोबर २०२६ रोजी आयोजन करण्यात आले. या रॅलीचा शुभारंभ विद्यापीठाचे माननीय कुलगुरू प्रा. (डॉ.) इन्द्र मणि आणि परभणीचे व माननीय पोलीस अधीक्षक श्री. पंकज कुमावत (भापोसे) यांच्या हस्ते हिरवी झेंडी दाखवून करण्यात आला.

यावेळी माननीय कुलगुरू प्रा. (डॉ.) इन्द्र मणि यांनी राष्ट्रीय एकता दिवसानिमित्त आयोजित या रॅलीचे विशेष महत्त्व विशद केले. ते म्हणाले की, या एकता दौडमध्ये लहान मुले, ज्येष्ठ नागरिक, विद्यापीठाचे अधिकारी व कर्मचारी तसेच पोलीस प्रशासनातील अधिकारी व कर्मचाऱ्यांनी उत्स्फूर्तपणे सहभाग नोंदविला, ही आनंदाची आणि अभिमानाची बाब आहे. अशा उपक्रमांमधून समाजात राष्ट्रीय एकात्मता, बंधुभाव आणि सामाजिक सलोख्याची भावना अधिक दृढ होते.

पुढे बोलताना त्यांनी सरदार वल्लभभाई पटेल यांच्या कार्याचा गौरव करताना सांगितले की, सरदार पटेल यांच्या जन्मस्थानी भेट देण्याचे भाग्य मला लाभले. त्या ठिकाणी अनुभवलेले वातावरण आणि जाणवलेली ऊर्जा अत्यंत विलक्षण व प्रेरणादायी होती. खरोखरच या भूमीत एका महान लोहपुरुषाचा जन्म झाला, याची जाणीव तेथे प्रकर्षाने झाली. सरदार वल्लभभाई पटेल यांचे मराठवाडा मुक्तिसंग्रामातील योगदानही त्यांनी यावेळी अधोरेखित केले.

या कार्यक्रमास विद्यापीठाचे शिक्षण संचालक डॉ. बाबासाहेब ठोंबरे, अधिष्ठाता डॉ. प्रवीण वैद्य, विद्यार्थी कल्याण अधिकारी डॉ. राजेश कदम, विभागप्रमुख डॉ. हिराकांत काळबांडे यांच्यासह विद्यापीठाचे अधिकारी, कर्मचारी, पोलीस प्रशासनाचे अधिकारी व कर्मचारी, विद्यार्थी, युवक आणि ज्येष्ठ नागरिक मोठ्या संख्येने उपस्थित होते.

हिरवी झेंडी दाखविल्यानंतर विद्यापीठ परिसरातून एकता दौड रॅली काढण्यात आली. यावेळी सहभागी नागरिकांनी विविध घोषणांद्वारे राष्ट्रीय एकात्मता, सामाजिक ऐक्य आणि देशभक्तीचा संदेश दिला. उत्स्फूर्त सहभागामुळे संपूर्ण विद्यापीठ परिसर देशभक्तीच्या वातावरणाने दुमदुमून गेला.

राष्ट्रीय एकात्मतेची भावना दृढ करण्यासोबतच सरदार वल्लभभाई पटेल यांच्या राष्ट्रउभारणीतील योगदानाचे स्मरण करून देणारा हा उपक्रम उत्साहात पार पडला.

डीजीसीएच्या मध्यम श्रेणी ड्रोन वैमानिक प्रशिक्षक परीक्षेत वनामकृविचे डॉ. गोपाल शिंदे यांचे यश

नागरी विमान वाहतूक महासंचालनालय (डीजीसीए), नवी दिल्ली यांच्यामार्फत घेण्यात आलेल्या रिमोट पायलट इन्स्ट्रक्टर (आरपीआय) – मध्यम श्रेणी (रोटरक्राफ्ट/व्हीएलओएस) या परीक्षेत वसंतराव नाईक मराठवाडा कृषी विद्यापीठ, परभणी येथील नाहेप – डिजिटल फार्मिंग सेंटर ऑफ एक्सलन्सचे प्रा. (डॉ.) गोपाल उत्तमराव शिंदे यांनी उल्लेखनीय यश संपादन केले आहे. या यशामुळे त्यांना आता १५० किलोपर्यंत वजन क्षमतेच्या मध्यम श्रेणीतील ड्रोनसाठी वैमानिक प्रशिक्षण देण्याची पात्रता प्राप्त झाली आहे. विशेष म्हणजे, यापूर्वीच त्यांनी लघु श्रेणीतील ड्रोनसाठी आरपीआय पात्रताही संपादन केली आहे.

देशभरातील दिल्ली, चेन्नई, मुंबई, हैदराबाद आणि बंगळुरू या पाच परीक्षा केंद्रांवर दि. २८ ते ३० सप्टेंबर २०२६ या कालावधीत ही मौखिक परीक्षा घेण्यात आली. या परीक्षेसाठी एकूण १७६ उमेदवारांनी अर्ज केला होता. त्यापैकी केवळ ६८ उमेदवार (३८.६ टक्के) उत्तीर्ण झाले, ४४ उमेदवार अनुत्तीर्ण झाले, तर ६४ उमेदवार अनुपस्थित राहिले. दिनांक २९ ऑक्टोबर २०२६ रोजी जाहीर झालेल्या निकालानुसार, डॉ. शिंदे यांनी मुंबई परीक्षा केंद्रावरून पहिल्याच प्रयत्नात ही परीक्षा यशस्वीरीत्या उत्तीर्ण केली. याबाबतची माहिती डॉ. शिंदे यांनी दिली.

कृषी क्षेत्रात फवारणी, पेरणी तसेच कृषी निविष्ठा व मालवाहतुकीसाठी मध्यम श्रेणीतील ड्रोनचा वापर वाढत आहे. मात्र, या श्रेणीतील ड्रोनसाठी प्रशिक्षित व प्रमाणित प्रशिक्षकांची संख्या देशात मर्यादित आहे. डॉ. शिंदे यांच्या या दुहेरी पात्रतेमुळे विद्यापीठाच्या माध्यमातून मराठवाड्यातील शेतकरी, कृषी पदवीधर आणि ग्रामीण युवकांना आधुनिक ड्रोन तंत्रज्ञानाचे प्रशिक्षण घेण्याची संधी उपलब्ध होणार आहे. तसेच कृषी क्षेत्रातील ड्रोन तंत्रज्ञानाचा विस्तार आणि कुशल मनुष्यबळ निर्मितीला चालना मिळणार आहे.

या उल्लेखनीय यशाबद्दल विद्यापीठाचे माननीय कुलगुरू प्रा. (डॉ.) इन्द्र मणि यांनी डॉ. शिंदे यांचे अभिनंदन करून त्यांना पुढील वाटचालीसाठी शुभेच्छा दिल्या. विद्यापीठातील सर्व संचालक, अधिष्ठाता आणि विभागप्रमुख यांनीही त्यांचे अभिनंदन केले.

 

वनामकृवित सरदार वल्लभभाई पटेल जयंती व इंदिरा गांधी पुण्यतिथीनिमित्त अभिवादन; राष्ट्रीय एकता दिवस व संकल्प दिवस साजरा

 

भारताचे लोहपुरुष सरदार वल्लभभाई पटेल यांच्या जयंतीनिमित्त तसेच भारताच्या माजी पंतप्रधान स्व. इंदिरा गांधी यांच्या पुण्यतिथीनिमित्त वसंतराव नाईक मराठवाडा कृषि विद्यापीठ, परभणी येथे अभिवादन कार्यक्रमाचे दिनांक ३१ ऑक्टोबर २०२६ रोजी आयोजन करण्यात आले. यावेळी विद्यापीठाचे माननीय कुलगुरू प्रा. (डॉ.) इन्द्र मणि यांनी सरदार वल्लभभाई पटेल व स्व. इंदिरा गांधी यांच्या प्रतिमेस पुष्पहार अर्पण करून अभिवादन केले.

याप्रसंगी ३१ ऑक्टोबर हा दिवस राष्ट्रीय एकता दिवस व संकल्प दिवस म्हणून साजरा करण्यात आला. कार्यक्रमात विद्यापीठाचे संशोधन संचालक डॉ. भगवान आसेवार, कुलसचिव श्री. पुरभा काळे, अधिष्ठाता डॉ. राजेश क्षीरसागर, डॉ. रावसाहेब भाग्यवंत आदी मान्यवर उपस्थित होते.

कार्यक्रमात उपकुलसचिव (सामान्य प्रशासन) श्री. पद्माकर पाटील यांनी सरदार वल्लभभाई पटेल यांच्या जीवनकार्याचा, स्वातंत्र्यलढ्यातील योगदानाचा तसेच स्वतंत्र भारताच्या एकात्मतेसाठी त्यांनी केलेल्या ऐतिहासिक कार्याचा परिचय करून दिला. तर विद्यापीठाच्या सामान्य प्रशासन विभागातील कक्ष अधिकारी श्रीमती यमुना मदनराव घांडगे यांनी भारताच्या माजी पंतप्रधान स्व. इंदिरा गांधी यांच्या जीवनकार्याचा व देशाच्या विकासातील योगदानाचा आढावा घेतला.

यावेळी उपस्थित अधिकारी व कर्मचाऱ्यांनी राष्ट्रीय एकात्मता, अखंडता व सुरक्षितता जपण्याची शपथ घेतली. तसेच सरदार वल्लभभाई पटेल व स्व. इंदिरा गांधी यांच्या कार्याचे स्मरण करून त्यांच्या स्मृतींना आदरांजली अर्पण केली.

कार्यक्रमास विद्यापीठाच्या प्रशासकीय इमारतीतील विविध विभागांचे अधिकारी व कर्मचारी मोठ्या संख्येने उपस्थित होते. कार्यक्रमाचे आयोजन विद्यापीठ प्रशासनाच्या वतीने करण्यात आले.

निर्यातक्षम फलोत्पादनासाठी गुणवत्तापूर्ण उत्पादन, मूल्यवर्धन व प्रक्रिया तंत्रज्ञानावर भर द्यावा – माननीय कुलगुरू प्रा. (डॉ.) इन्द्र मणि

 वनामकृवित ‘उद्यानविद्या पिकांच्या निर्यातक्षम उत्पादनातील संभावना, संधी व आव्हाने’ विषयावर विचारमंथन

फलोत्पादन क्षेत्रात निर्यातक्षम उत्पादन निर्मितीसाठी शास्त्रज्ञांनी शेतकऱ्यांच्या शेतावर जाऊन त्यांच्या समस्या, गरजा व स्थानिक परिस्थिती समजून घेत संशोधन व तंत्रज्ञान विकास करावा. शेतकऱ्यांचे कल्याण हेच शास्त्रज्ञांनी आपल्या कार्याचे प्रमुख उद्दिष्ट मानावे, असे प्रतिपादन वसंतराव नाईक मराठवाडा कृषि विद्यापीठाचे माननीय कुलगुरू प्रा. (डॉ.) इन्द्र मणि यांनी केले.

विद्यापीठाच्या उद्यानविद्या विभाग आणि एकात्मिक फलोत्पादन विकास अभियान यांच्या संयुक्त विद्यमाने दिनांक ३० ऑक्टोबर २०२६ रोजी ‘Export-Oriented Horticulture: Prospects, Opportunities and Emerging Challenges’ अर्थात ‘उद्यानविद्या पिकांच्या निर्यातक्षम उत्पादनातील संभावना, संधी व आव्हाने’ या विषयावर आयोजित एक दिवसीय विचारमंथन कार्यक्रमाच्या उद्घाटनप्रसंगी ते अध्यक्षस्थानावरून बोलत होते.

कार्यक्रमाच्या व्यासपीठावर संशोधन संचालक डॉ. भगवान आसेवार, शिक्षण संचालक डॉ. बाबासाहेब  ठोंबरे, विस्तार शिक्षण संचालक डॉ. राकेश आहिरे, नवी दिल्ली येथील भारतीय कृषी अनुसंधान परिषद (ICAR) अंतर्गत भारतीय कृषी संशोधन संस्था (IARI) येथील फळे व फलोत्पादन तंत्रज्ञान विभागाचे प्रमुख तथा मुख्य शास्त्रज्ञ डॉ. ओ. पी. अवस्थी,  अधिष्ठाता डॉ. विश्वनाथ खंदारे प्रगतिशील शेतकरी श्री. चंद्रकांत वरपूडकर, उद्यान पंडित डॉ. भगवानराव ठोंबरे आदी मान्यवर उपस्थित होते.

अध्यक्षीय मार्गदर्शनात माननीय कुलगुरू प्रा. (डॉ.) इन्द्र मणि यांनी शास्त्रज्ञांनी शेतकऱ्यांच्या शेतावर व घरी जाऊन त्यांच्या अडचणी, समस्या आणि त्यांनी अवलंबिलेल्या तंत्रज्ञानाची प्रत्यक्ष माहिती घेण्याची सवय लावावी. हे आपले कर्तव्य व धर्म समजून समर्पित भावनेने कार्य करावे, असे आवाहन केले. श्री. चंद्रकांत वरपूडकर आणि श्री. नंदकिशोर गायकवाड यांसारख्या प्रगतिशील शेतकऱ्यांच्या प्रक्षेत्रांना भेट देऊन त्यांच्या यशोगाथा समजून घेतल्यास शेतकऱ्यांना अधिक सक्षम करण्यासाठी उपयुक्त दिशा मिळू शकते, असे त्यांनी सांगितले. योग्य मार्गदर्शन व प्रोत्साहनाच्या बळावर शेतकरी निर्यातदार बनू शकतात, असेही ते म्हणाले.

शास्त्रज्ञांनी काम करताना नैतिक मूल्यांचे पालन करावे, काम टाळण्याची कारणे देण्याऐवजी सकारात्मक दृष्टिकोन ठेवून जबाबदारीने कार्य करावे. आपल्या सेवाकाळात संस्थेमध्ये आणि समाजामध्ये आपण किती सकारात्मक बदल घडवून आणला, याचे आत्मपरीक्षण प्रत्येकाने करणे आवश्यक आहे, असेही माननीय कुलगुरूंनी नमूद केले. मराठवाड्यातील शेतकरी कष्टाळू व जिद्दी असून, त्यांच्या प्रगतीसाठी कार्य करण्याच्या मोठ्या संधी उपलब्ध आहेत. विद्यापीठाचा कुलगुरू म्हणून २२ जुलै २०२२ रोजी पदभार स्वीकारल्यानंतर पहिल्याच भाषणात आपण ‘शेतकरी देवो भव:’ हा विचार मांडला होता, असे त्यांनी आवर्जून सांगितले.

सद्यस्थितीत मराठवाड्यात दुष्काळी परिस्थिती असल्याने शेतकऱ्यांना धीर देण्याबरोबरच शेतीतून उत्पन्नाचे विविध पर्याय उपलब्ध करून देणे गरजेचे आहे. बीज, मृदा आणि हंगाम या शेतीच्या प्रमुख आधारांवर लक्ष केंद्रित करून शेतकऱ्यांना प्राधान्याने उपयुक्त तंत्रज्ञान उपलब्ध करून द्यावे. यामध्ये उद्यानविद्या क्षेत्राला अधिक महत्त्व देण्याची गरज असल्याचे त्यांनी सांगितले. पूर्वी फळे आणल्यावर घरात कोणी आजारी आहे का, अशी विचारणा केली जात असे; मात्र आज फळांचे सेवन व खरेदी ही सर्वसामान्य बाब झाली आहे. त्यामुळे समाजाचे आरोग्य सुदृढ होण्यास मदत झाली असून, यामध्ये उद्यानविद्या क्षेत्राचे मोठे योगदान असल्याचे सांगत त्यांनी या क्षेत्रात कार्य करणाऱ्या शास्त्रज्ञांचे व संबंधित सर्वांचे अभिनंदन केले.

यावेळी संशोधन संचालक डॉ. भगवानराव असेवार यांनी सांगितले की, आंबा, हळद व भाजीपाला पिकांचे उत्पादन मोठ्या प्रमाणात होत असले, तरी केवळ उत्पादन वाढविणे पुरेसे नाही. उत्पादित मालाचे मूल्यवर्धन, प्रक्रिया, गुणवत्तापूर्ण उत्पादन आणि निर्यातीच्या निकषांनुसार उत्पादन घेणे अत्यंत आवश्यक आहे. या विचारमंथनातून शास्त्रज्ञ व शेतकऱ्यांमध्ये विचारांची देवाणघेवाण होऊन निर्यातक्षम उत्पादनासाठी उपयुक्त शिफारशी पुढे येतील, असा विश्वास त्यांनी व्यक्त केला. निर्यातीच्या दृष्टीने अवशेष मुक्त (रेसिड्यू फ्री) उत्पादनाला विशेष महत्त्व असून, शेतकऱ्यांनी विद्यापीठात स्थापित कीडनाशक अवशेष तपासणी प्रयोगशाळेचा लाभ घ्यावा, असे आवाहनही त्यांनी केले. निर्यातक्षम उत्पादनासाठी असलेल्या विविध आव्हानांचा सखोल अभ्यास करून त्यावर उपाययोजना करणे, नैसर्गिक साधनसंपत्तीचा काटेकोर वापर, पाण्याचे योग्य नियोजन आणि शेतकरी उत्पादक कंपन्यांची स्थापना यावरही त्यांनी भर दिला.

कार्यक्रमाचे प्रास्ताविक अधिष्ठाता तथा उद्यानविद्या विभागप्रमुख डॉ. विश्वनाथ खंदारे यांनी केले. त्यांनी विद्यापीठातील उद्यानविद्या तंत्रज्ञान, फलोत्पादन विकासासाठी सुरू असलेले संशोधन व विविध उपक्रमांची माहिती दिली. तसेच सदर विचारमंथन कार्यक्रमाच्या आयोजनामागील भूमिका स्पष्ट केली.

कार्यक्रमाच्या तांत्रिक सत्रात प्रगतशील शेतकरी आणि राष्ट्रीय स्तरावरील शास्त्रज्ञांनी फलोत्पादन पिकांची निर्यातक्षमता वाढविण्यासाठी विविध तंत्रज्ञान व संधींवर मार्गदर्शन केले.

पुणे येथील पुष्पोत्पादन संचालनालयाचे डॉ. गणेश कदम यांनी मराठवाड्यातील जागतिक बाजारपेठेसाठी संभाव्य फुलपिकांच्या संधी विशद केल्या. अन्नतंत्रज्ञान महाविद्यालयाचे अधिष्ठाता डॉ. आर. बी. क्षीरसागर यांनी काढणीपश्चात व्यवस्थापन, मूल्यसाखळी व शीतसाखळी पायाभूत सुविधांचे महत्त्व सांगितले. कृषी अर्थशास्त्र विभागप्रमुख डॉ. सचिन मोरे यांनी आंबा व केळी निर्यातीतील आव्हाने आणि संधी यांवर प्रकाश टाकला.

बीड येथील प्रगतशील शेतकरी श्री. भगवानराव ठोंबरे यांनी सीताफळाचे काढणीपश्चात व्यवस्थापन व प्रक्रिया उद्योगातील संधी, तर परभणी येथील प्रगतशील शेतकरी श्री. चंद्रकांत वरपूडकर यांनी आंबा उत्पादनातील आपल्या अनुभवांच्या आधारे प्रगत तंत्रज्ञानाची माहिती दिली. केशर आंब्यापेक्षा लवकर उत्पादन देणाऱ्या शंभरहून अधिक स्थानिक जातींची लागवड केल्याचे त्यांनी सांगितले. आंब्याच्या कलम निर्मितीमध्ये खुंटाची (रूटस्टॉक) निवड महत्त्वाची असून, याबाबत केलेल्या अभ्यासातून त्यांना चांगले यश मिळाल्याचे त्यांनी नमूद केले. तसेच विदेशातील विविध आंबा जातींची लागवड करून उष्णता, पाण्याचा ताण व स्थानिक हवामानास अनुकूल असलेल्या जातींची निवड केल्याचे सांगितले. आंब्याचे लवकर म्हणजेच १५ ते ३० मार्चदरम्यान बाजारात येणारे उत्पादन अधिक आर्थिक लाभ मिळवून देत असल्याने अशा लवकर उत्पादन देणाऱ्या जातींच्या लागवडीवर भर देण्याची गरज त्यांनी व्यक्त केली.

महाराष्ट्र शेतकरी उत्पादक संस्था महासंघाचे कार्यकारी संचालक डॉ. संजय पांढरे यांनी शेतकरी उत्पादक कंपन्या, कृषी निर्यात धोरण आणि सार्वजनिक-खासगी भागीदारीद्वारे बाजारपेठ जोडणी याविषयी मार्गदर्शन केले. भारतीय कृषी संशोधन संस्था, नवी दिल्ली येथील डॉ. ओ. पी. अवस्थी यांनी निर्यातक्षम फळ उत्पादनासाठी मुळखोडाचे महत्त्व, तर डॉ. सतीश लांडे यांनी फलोत्पादनातील यांत्रिकीकरणाची भूमिका स्पष्ट केली.

या विचारमंथनातून निर्यातक्षम उत्पादन, आधुनिक तंत्रज्ञान, मुळखोड व्यवस्थापन, यांत्रिकीकरण, प्रक्रिया उद्योग, शीतसाखळी आणि बाजारपेठ जोडणी या विषयांवर उपयुक्त चर्चा झाली. शास्त्रज्ञांचे संशोधन, प्रगतशील शेतकऱ्यांचे अनुभव आणि बाजारपेठेतील संधी यांची सांगड घालून मराठवाड्यातील फलोत्पादनाला जागतिक बाजारपेठ उपलब्ध करून देण्याचा या उपक्रमाचा उद्देश अधोरेखित झाला.

कार्यक्रमाच्या यशस्वी आयोजनासाठी डॉ. डॉ. बसवलिंगप्पा कलालबंडी, डॉ. अंशुल लोहकरे, डॉ. वैशाली भगत, डॉ. संतोष बरकुले, डॉ. अमोल भोसले, डॉ. राहुल भालेराव, डॉ. राहुल बघेले, डॉ. शबनम सय्यद, डॉ. सचिन पव्हणे, डॉ. सुबोध खंडागळे, डॉ. पुरुषोत्तम देशमुख, डॉ. अपूर्वा, डॉ. महेश, श्री. रोहन पाटील तसेच उद्यानविद्या विभागातील अधिकारी, कर्मचारी व विद्यार्थ्यांनी सहकार्य केले.

कार्यक्रमाचे सूत्रसंचालन डॉ. आशा सातपुते यांनी केले, तर आभार प्रदर्शन डॉ. कल्याणी देशमुख यांनी केले. यावेळी शेतकरी, विद्यापीठातील अधिकारी, कर्मचारी, शास्त्रज्ञ व विद्यार्थी मोठ्या संख्येने उपस्थित होते.