Sunday, January 26, 2020

वनामकृवित प्रजासत्‍ताक दिन साजरा

वसंतराव नाईक मराठवाडा कृषि विद्यापीठाच्‍या मुख्‍य प्रांगणात कुलगुरू मा डॉ अशोक ढवण यांच्‍या हस्‍ते ध्‍वजारोहण करून प्रजासत्‍ताक दिन साजरा करण्‍यात आला. यावेळी कुलसचिव श्री रणजित पाटील, संशोधन संचालक डॉ दत्‍तप्रसाद वासकर, शिक्षण संचालक डॉ धर्मराज गोखले आदीसह विविध महाविद्यालयाचे प्राचार्य, विद्यापीठातील अधिकारी, कर्मचारी व विद्यार्थ्‍यी मोठया संख्‍येने उपस्थित होते. यावेळी भारताच्‍या संविधानामधील उद्देशिकेचे कुल‍सचिव श्री रणजित पाटील यांच्‍या मार्गदर्शनाखाली सामुहिकरित्‍या वाचन करण्‍यात आले.
कुलगुरू मा डॉ अशोक ढवण यांनी प्रजासत्‍ताक दिनांच्‍या सर्वांना शुभेच्‍छा देऊन देशाला कल्‍याणकारी राष्‍ट्र निर्मितीसाठी अन्‍न सुरक्षा व पोषण सुरक्षेची गरज असुन हे उद्देष्‍ट साध्‍य करण्‍यासाठी कृषि विद्यापीठाची निर्णायक भुमिका आहे, यासाठी आपणास सर्वांना आपले योगदान द्यावे लागेल असे ते म्‍हणाले. याप्रसंगी छात्रसेना अधिकारी डॉ जयकुमार देशमुख यांच्‍या मार्गदर्शनाखाली छात्रसैनिकांनी मान्‍यवरांना मानवंदना दिली. कार्यक्रमाचे सुत्रसंचालन श्री उदय वाईकर यांनी केले.