Wednesday, January 7, 2015

प्राचार्य डॉ विलास पाटील हे शिक्षण महर्षी वसंतराव काळे शिक्षण सेवागौरव पुरस्कारांनी सन्‍मानित


वसंतराव नाईक मराठवाडा कृषि विद्यापीठातंर्गत असलेल्‍या गोळेगाव येथील कृषी महाविद्यालयाचे प्राचार्य डॉ. विलास पाटील यांना शिक्षण महर्षी वसंतराव काळे प्रतिष्ठानचा विभागीय स्तरावरील सन २०१४-१५ चा शिक्षण महर्षी वसंतराव काळे शिक्षण सेवागौरव पुरस्कारांनी दि ३ जानेवारी रोजी औरंगाबाद येथे पुरस्‍कार वितरण सोहळात विधान परिषदचे उपसभापती मा ना वसंतरावजी डावखरे यांच्‍या हस्‍ते सन्‍मानित करण्‍यात आले. या कार्यक्रमाच्‍या अध्‍यक्षस्थानी माजी उच्‍च व तंत्र शिक्षण मंत्री मा आ राजेश टोपे होते तर मा आ सतिश चव्‍हाण, मा आ विक्रम काळे, डॉ बाबासाहेब आंबडेकर मराठवाडा विद्यापीठाचे कुलसचिव डॉ डी आर माने, डॉ सुधीर गव्‍हाणे यांची प्रमुख उपस्थिती होती.
कृषी आणि मृदविज्ञानातील मागील २५ वर्षात केलेल्‍या योगदानाबद्दल डॉ विलास पाटील यांना हा पुरस्कार देण्‍यात आला असुन त्यांनी माती परीक्षण, दूरस्थसंवेदन, जमिनीचे आरोग्य व्यवस्थापन यावर विशेष संशोधन केले आहे. विविध राष्ट्रीय आणि आंतरराष्ट्रीय परिषदेत अनेक संशोधन लेख त्यांनी सादर केले असुन अनेक पुरस्काराने त्यांना सन्मानित केलेले आहे. त्‍यांनी जर्मनी, फ्रांस, नेदरलँ, बेल्जियम, तुर्की, इस्रायल, इंग्लंड, थायलंड आदी देशाचे अभ्‍यासदौरे केले असून या देशातील वैज्ञानिकाबरोबर काम केले आहे. जमिनीची सुपीकता पिक उत्पादन या विषयाचे महाराष्ट्र राज्यातील कृषी विद्यापीठाचे संयुक्त संशोधन समितीचे समन्वयक म्हणून शेतक-यांसाठी उपयुक्‍त अशा त्‍यांच्‍या १५ पेक्षा जास्त कृषी तंत्रज्ञानाच्या शिफारशी केल्या आहेत. जमिनीचे आरोग्य, अन्नद्रव्ये व्यवस्थापन, कृषीमध्ये दूरस्थ संवेदनाचा उपयोग, पिक उत्पादन, जमिनीची उत्पती तिचे गुणधर्म विषयावर १५० पेक्षा जास्त लेख लिहून प्रसिध्‍द केले असुन अनेक कार्यक्रमात त्‍यांनी शेतकऱ्यांना मार्गदर्शन केले आहे. सामाजिक जाणीव ठेवून विद्यापीठातील विद्यार्थ्यांत व समाजामहात्मा गांधीजीचे विचार पोचविण्याचे कार्य त्‍यांनी केले आहे. त्याच्या या कार्याचे माजी पंतप्रधान मा श्री अटलबिहारी वाजपेयी यांनी कौतुक करून प्रषतीपत्र देवून गौरविले आहे.