वसंतराव नाईक मराठवाडा कृषि विद्यापीठातील कृषि किटकशास्त्र विभाग व कृषि विभाग, महाराष्ट्र शासन यांच्या संयुक्त विद्यमाने पिकावरील कीड-रोग सर्वेक्षण व सल्ला प्रकल्प (क्रॉपसॅप) २०२०-२१ अंतर्गत" हिंगोली जिल्हयातील कृषि विभागातील अधिकारी व क्षेत्रीय कर्मचारी यांच्यासाठी कोरोना रोगाच्या पार्श्वभुमीवर डिजीटल प्रशिक्षणाचे आयोजन दिनांक १६ जुलै रोजी करण्यात आले होते. या प्रशिक्षणाच्या उद्घाटन कार्यक्रमाच्या अध्यक्षस्थानी क्रॉपसॅप प्रकल्पाचे राज्यस्तरीय सकाणू समिती सदस्य विभाग प्रमुख डॉ. संजीव बंटेवाड हे होते तर उपविभागीय हिंगोलीचे कृषि अधिकारी श्री. बी. एस. कच्छवे यांची प्रमुख उपस्थिती होती.
मार्गदर्शनात श्री. बी. एस. कच्छवे यांनी सांगितले की, हिंगोली जिल्ह्यामध्ये सोयाबीन खालील क्षेत्र मोठ्या प्रमाणावर असून दिवसेंदिवस सोयाबीन मध्ये नवनवीन किड रोगाचे प्रश्न निर्माण होत आहेत, त्यासाठी क्षेत्रीय कर्मचा-यांनी जबाबदारीने सर्वेक्षनाचे काम करावे. तर कार्यक्रमाचे अध्यक्ष डॉ. संजीव बंटेवाड म्हणाले की, क्रॉपसॅप हा महाराष्ट्र शासनाचा अभिनव प्रकल्प असून या मध्ये कृषि विभाग राज्यातील चारही कृषि विद्यापीठा सोबतच राष्ट्रीय स्तरावरील आठ संशोधन संस्था अत्यंत समन्वयाने काम करत आहेत. अचूक व वेळेवर सल्ला मिळाल्यास किड रोगाचे वेळीच प्रभावीपणे व्यवस्थापन करने शक्य होइल. किड व्यवस्थापना बाबत तांत्रिक मार्गदर्शन करण्यासाठी कृषि किटकशास्त्र विभाग सदैव तत्पर आहे.
तांत्रिक प्रशिक्षणात टोळधाड किड व्यवस्थापनावर डॉ. संजीव बंटेवाड, सोयाबिन पिकावरील प्रमुख किडींचे सर्वेक्षण व व्यवस्थापनावर डॉ. बस्वराज भेदे, कापुस पिकावरील प्रमुख कीडींचे सर्वेक्षण व व्यवस्थापनावर डॉ.अनंत बडगुजर, मका, ज्वारी पिकावरील नवीन लष्करी अळी चे व्यवस्थापनावर डॉ. धीरज कदम, तर उस पिकावरील हुमणी अळीचे सर्वेक्षण व व्यवस्थापनावर डॉ. पुरूषोत्तम नेहरकर यांनी मार्गदर्शन केले. प्रास्ताविक क्रॉपसॅप प्रकल्पाचे समन्वय अधिकारी डॉ.अनंत बडगुजर यांनी केले. प्रशिक्षणास हिंगोली जिल्ह्यातील कृषि विभागाचे जवळपास १८५ अधिकारी कर्मचा-यांनी सहभाग नोंदविला.
