मौजे धानोरा काळे येथे २६ कर्तृत्ववान महिला शेतकऱ्यांचा सत्‍कार
शेतकरी महिला अनेक आघाडीवर कार्य' करताना शेती कामे सांभाळून कुटुंबामध्ये ही महत्त्वाची भूमिका साकारतात म्हणून शेतकरी महिलांना सदैव सन्मानाने वागणूक मिळावयास हवी असे प्रतिपादन शिक्षण संचालक डॉ धर्मराज गोखले यांनी अध्यक्षीय समारोपात केले. भारतीय स्वातंत्र्याचा अमृत महोत्सव आणि महाराष्ट्र शासनाने जाहीर केलेले शेतकरी महिला सन्मान वर्ष २०२२ यांचे औचित्‍य साधुन १ जुलै रोजी महाराष्ट्राचे माजी मुख्यमंत्री हरित क्रांतीचे प्रणेते स्‍व वसंतराव नाईक यांच्या जयंती निमित्ताने कृषी दिनी वसंतराव नाईक मराठवाडा कृषि विद्यापीठातील सामुदायिक विज्ञान महाविद्यालय, कृषी विभाग, पूर्णा महिला आर्थिक विकास महामंडळ आणि पंचायत समिती पूर्णा यांच्या संयुक्त विद्यमाने मौजे धानोरा (काळे) (ता. पूर्णा) येथील शेतकरी महिला मेळाव्‍याचे आयोजन करण्यात आले होते, कार्यक्रमाच्या अध्यक्षीय स्‍थानावरून ते बोलत होते. कार्यक्रमास आयोजक प्राचार्या डॉ. जया बंगाळे, प्रमुख अतिथी श्रीमती पुर्णा तहसीलदार पल्लवी टेमकर, जिल्हा समन्वयक अधिकारी (माविम) श्री बालाजी झिंजाडे, तालुका कृषी अधिकारी (पूर्णा) श्री. रामचंद्र तांबिले, उद्यान पंडीत श्री. प्रताप काळे, कृषि अधिकारी श्री. दहिवडे आदींची विशेष उपस्थिती होती.
शेतकरी महिला मेळाव्यात कृषि विभाग, महसूल कर्मचारी, प्रगतशील शेतकरी, ग्रामस्थ यांनी सुचविलेल्या २६ कर्तृत्ववान महिला शेतकऱ्यांचा मान्यवरांच्या हस्ते यथोचित गौरव सन्मानपत्र, शाल, फळझाडांचे रोप आणि तंत्रज्ञान पुस्तिका देऊन करण्यात आला. यावेळी सन्मानार्थी महिला शेतकऱ्यांच्या कर्तृत्वाची यशोगाथा उद्यान पंडित श्री प्रताप काळे यांनी सादर केली. यावेळी सन्मानार्थी महिला आणि ग्रामस्थ अतिशय भावूक झाले.
कृषि दिनी शेतकरी महिलांच्या कर्तृत्वाचा सन्मान महिला शेतकऱ्यांच्या गावात येऊन सामुदायिक विज्ञान महाविद्यालयाने साजरा केला याबाबत समाधान व्यक्त करून असे कार्यक्रम अनेक गावात व्हावेत अशी अपेक्षा पूर्णेच्या तहसीलदार श्रीमती पल्लवी टेमकर यांनी आपल्या भाषणात व्यक्त केली. प्राचार्या डॉ जया बंगाळे यांनी शेतीकाम, घरकाम, आर्थिक, सामाजिक व्यवहार सांभाळताना शेतकरी महिलांनी आपले मानसिक स्वास्थ्याची जपणूकही केली पाहिजे असा सल्‍ला दिला.
मनोगतात श्री दिनेश काळे यांनी शेतकरी मातांनी केलेले अपार कष्ट व ते करत असताना आलेल्या अडचणीवर मात करून मिळविलेल्या विजय हा, सन्मान कार्यक्रमाच्या निमित्ताने दिसून आला अशा आपल्या भावना व्यक्त केल्या तर श्री बालासाहेब हिंगे यांनी ग्रामीण भागात शेती किंवा इतर व्यवसाय करून आपले कुटुंब चालवणाऱ्या मुलाबाळांना शिकवणाऱ्या त्यांच्यावर चांगले संस्कार करणाऱ्या महिलांचा सन्मान करून त्यांची उमेद वाढवली याबद्दल आयोजकांचे आभार व्यक्त केले. तांत्रिक सत्रात विविध विषयावर सामुदायिक विज्ञान तंत्रज्ञानावर डॉ. तसनिम नाहिद खान, डॉ. सुनिता काळे, डॉ. विणा भालेराव, डॉ. जयश्री रोडगे, डॉ. शंकर पुरी आदींनी मार्गदर्शन केले.
याप्रसंगी मुलांनाही आपल्या शेतकरी माते विषयी अभिमान वाटावा म्हणून माध्यमिक विद्यालयाच्या विद्यार्थ्यांना सहभागी करून गावामध्ये प्रभात फेरी काढण्यात आली. या दरम्यान शेतकरी महिला सन्मानार्थ विद्यार्थ्यांच्या "शेतात राबते माजी माय, तिच्या कष्टाला तोड नाही," "शेतकरी मातेचा आम्हाला गर्व, तिची काळजी घेऊ आम्ही सर्व," "शेतात राबते आई सतत, घर कामात तिला करू मदत," " घरात शेतात कामच काम, शेतकरी महिलांना आमचा सलाम," "निंदणी खुरपणी करते माझी माय, जणू काही तिच्या हाती जादूच हाय," अशा घोषणांनी सर्व गाव दणाणून गेले.
कार्यक्रमात पूर्णा शेती सेवा ग्रुपचे अमृत राज कदम, गोविंद दुधाटे, बालासाहेब हिंगे, निलेश अडसुळे, प्रवीण काळे, मोतीराम दुधाटे, उद्धव दुधाटे, उपसरपंच संभाजी भोसले, माजी मुख्याध्यापक श्री अशोक रसाळ, मुख्याध्यापक श्री गाडेकर आदींची प्रमुख उपस्थिती होती.
कार्यक्रमाचे आयोजन प्राचार्या डॉ. जया बंगाळे, यांच्या मार्गदर्शनाखाली कार्यक्रमाचे समन्वयक विषय प्रमुख डॉ. शंकर पुरी यांनी केले. कार्यक्रमाचे आभार डॉ. विणा भालेराव यांनी व्यक्त केले. कार्यक्रम यशस्वीतेसाठी प्रताप काळे, जनक काळे, कृष्णा काळे, सुधाकर काळे, श्रीकांत काळे, भगवानराव काळे, बालाजी काळे, प्रकाश काळे या ग्रामस्थ मंडळींनी तसेच आत्माचे श्री जोशी महाविद्यालयाचे प्रल्हाद थोरात, रामा शिंदे आणि अलीम शेख यांनी परिश्रम घेतले. कार्यक्रमास मौजे धानोरा काळे येथील शेतकरी बंधू भगिनींनी उत्स्फूर्त प्रतिसाद दिला.
