वनामकृविच्या कृषि महाविद्यालयात नव्या शैक्षणिक वर्षाची उत्साहपूर्ण सुरुवात

 शेतकऱ्यांच्या जीवनात बदल घडवण्याचे ध्येय म्हणजे कृषि शिक्षण.... माननीय कुलगुरू प्रा. (डॉ.) इन्द्र मणि

वसंतराव नाईक मराठवाडा कृषि विद्यापीठाच्या परभणी येथील कृषि महाविद्यालयाच्या पदवी अभ्यासक्रमात नव्याने प्रवेश घेतलेल्या विद्यार्थ्यांसाठी दिनांक २५ नोव्हेंबर २०२५ रोजी स्वागत समारंभ कार्यक्रमाचे आयोजन करण्यात आले. कार्यक्रमाच्या उद्घाटन प्रसंगी विद्यापीठाचे माननीय कुलगुरू प्रा. (डॉ.) इन्द्र मणि हे ऑनलाईन पद्धतीने अध्यक्षस्थानी होते. तसेच विद्यापीठाचे शिक्षण संचालक डॉ. भगवान आसेवार हे देखील ऑनलाईन पद्धतीने प्रमुख अतिथी म्हणून उपस्थित होते. कार्यक्रमाच्या व्यासपीठावर महाविद्यालयाचे सहयोगी अधिष्ठाता डॉ. प्रविण वैद्य, विभाग प्रमुख डॉ. हरिहर कौसडीकर, डॉ पुरुषोत्तम नेहरकर, डॉ. एम जी जाधव,  जिमखाना उपाध्यक्ष डॉ. रावसाहेब भाग्यवंत, शिक्षण प्रभारी डॉ. रणजीत चव्हाण तसेच सर्व विभाग प्रमुख उपस्थित होते.

कार्यक्रमाच्या उद्घाटन प्रसंगी विद्यापीठाचे माननीय कुलगुरू प्रा. (डॉ.) इन्द्र मणि हे ऑनलाईन पद्धतीने अध्यक्षस्थानी होते. आपल्या प्रभावी आणि प्रेरणादायी मार्गदर्शनात त्यांनी कृषिक्षेत्रातील नवोन्मेष, तंत्रज्ञानाचा वापर, विद्यार्थी-केद्रित शिक्षणपद्धती आणि शैक्षणिक शिस्तीचे महत्त्व विद्यार्थ्यांना अतिशय समर्पकपणे समजावून सांगितले. त्यांनी असे स्पष्ट केले की कृषि शिक्षण म्हणजे केवळ पदवी न मिळवता “शेतकऱ्यांच्या जीवनात बदल घडवण्याचे ध्येय” आत्मसात करणे होय. कठोर परिश्रम, वेळेचे नियोजन, नैतिक मूल्ये आणि संशोधनाभिमुख दृष्टिकोन हीच विद्यार्थ्यांची खरी ताकद असल्याचे ते विशेषत्वाने नमूद केले. विद्यार्थ्यांच्या भविष्यातील संधींबद्दल बोलताना त्यांनी त्यांना नवीन संकल्पना आत्मसात करून उद्योजकतेकडे वाटचाल करण्याचे आवाहन केले.

शिक्षण संचालक डॉ. भगवान आसेवार यांनी नवीन शैक्षणिक धोरणातील मूलभूत तत्त्वांची सविस्तर माहिती देत विद्यार्थ्यांनी केवळ अभ्यासक्रमापुरते मर्यादित न राहता कौशल्य विकास, नवोपक्रम आणि उद्योजकता यांना प्राधान्य द्यावे असे स्पष्टपणे नमूद केले. त्यांनी सांगितले की, बदलत्या जागतिक परिस्थितीत बहुविध कौशल्ये आत्मसात करणे ही काळाची गरज असून विद्यापीठाचे विद्यार्थी या क्षेत्रात मोठी कामगिरी करू शकतात. यासाठी सर्व विभागांनी विद्यार्थी–केंद्री उपक्रम, प्रयोगात्मक शिक्षण आणि उद्योगसंलग्न प्रशिक्षणाला अधिक गती द्यावी, असेही त्यांनी आवर्जून म्हटले.

सहयोगी अधिष्ठाता डॉ. प्रविण वैद्य, विभाग प्रमुख डॉ. हरिहर कौसडीकर आणि शिक्षण प्रभारी डॉ. रणजीत चव्हाण यांनीही विद्यार्थ्यांना मार्गदर्शन केले. कार्यक्रमाचे प्रस्ताविक डॉ. रावसाहेब भाग्यवंत यांनी केले.

या प्रसंगी महाविद्यालयातील सर्व प्राध्यापकवर्ग, कर्मचारी आणि विद्यार्थी मोठ्या संख्येने उपस्थित होते. द्वितीय वर्षाच्या विद्यार्थ्यांनी प्रथम वर्षाच्या विद्यार्थ्यांसाठी विविध कलागुणांचे उत्कृष्ट सादरीकरण करून नवीन विद्यार्थ्यांचा स्वागत समारंभ रंगतदार केला.