एआययू सेंट्रल झोन युथ फेस्टिव्हल २०२५ मध्ये वनामकृवीचे उल्लेखनीय यश

 माननीय कुलगुरू प्रा. (डॉ.) इन्द्र मणि यांनी सर्व विजेत्या विद्यार्थ्यांचे केले अभिनंदन

छत्रपती संभाजीनगर येथील एमजीएममध्ये दिनांक २५ ते २९ नोव्हेंबर २०२५ दरम्यान आयोजित एआययूच्या सेंट्रल झोन युथ फेस्टिव्हल (UNIFEST) २०२५ मध्ये वसंतराव नाईक मराठवाडा कृषि विद्यापीठाने उत्कृष्ट कलाकौशल्य, सादरीकरण आणि स्पर्धात्मक क्षमतेचे प्रभावी प्रदर्शन करून विविध स्पर्धांत उल्लेखनीय यश संपादन केले.

माननीय कुलगुरू प्रा. (डॉ.) इन्द्र मणि यांनी स्पर्धेपूर्वी विद्यार्थ्यांना दिलेल्या प्रेरणादायी मार्गदर्शनाद्वारे त्यांचा आत्मविश्वास दृढ केला. फेस्टिव्हलमध्ये उत्कृष्ट कामगिरी करण्यासाठी त्यांनी सर्व स्पर्धक विद्यार्थ्यांना मनःपूर्वक शुभेच्छा देऊन उत्साहाने पुढे पाठविले होते.

विद्यापीठाच्या संघाने विद्यार्थी कल्याण अधिकारी डॉ. राजेश कदम यांच्या नेतृत्वाखाली शिस्तबद्ध पूर्वतयारी, प्रात्यक्षिक सराव आणि नियोजनाद्वारे सहभाग नोंदविला. योग्य प्रशिक्षण घेतलेल्या या विद्यार्थी-कलाकारांनी सांस्कृतिक, कलात्मक आणि बौद्धिक क्षेत्रात प्रभावी सादरीकरण करीत एकूण ७ प्रमुख स्पर्धांमध्ये विजेतेपदे मिळवून विद्यापीठाचा मान उंचावला.

प्राप्त पारितोषिके पुढीलप्रमाणे— 

कोलाज आर्ट – द्वितीय क्रमांक

 रॅली प्रोसेशन – द्वितीय क्रमांक

 लोकनृत्य (फोक/ट्रायबल डान्स) – चौथा क्रमांक

कार्टून स्पर्धा – चौथा क्रमांक

रांगोळी – चौथा क्रमांक

समूहगायन – पाचवा क्रमांक

सुगम गायन - पाचवा क्रमांक 

इंग्रजी वादविवाद – पाचवा क्रमांक

या स्पर्धांमध्ये विद्यार्थ्यांनी प्रदर्शित केलेली सर्जनशीलता, समर्पण, शिस्त आणि टीमवर्क अतिशय कौतुकास्पद असून विद्यापीठाच्या सांस्कृतिक उन्नतीचे द्योतक आहे. वसंतराव नाईक मराठवाडा कृषि विद्यापीठाचे विद्यार्थी सांस्कृतिक व कलात्मक क्षेत्रात सातत्यपूर्ण यश प्राप्त करून राष्ट्रीय पातळीवर आपली ओळख अधिक बळकट करत आहेत.

माननीय कुलगुरू प्रा. (डॉ.) इन्द्र मणि यांनी सर्व विजेत्या विद्यार्थ्यांचे मनःपूर्वक अभिनंदन करून आगामी राष्ट्रीय स्पर्धांसाठी शुभेच्छा दिल्या. विद्यार्थी कल्याण उपक्रमांतर्गत दिल्या जाणाऱ्या सर्वांगीण संधी, मार्गदर्शन आणि प्रोत्साहनामुळे हे यश साध्य झाल्याचे त्यांनी नमूद केले.

विद्यार्थी कल्याण अधिकारी डॉ. राजेश कदम यांनी फलदायी मार्गदर्शन, नियोजन आणि सातत्यपूर्ण पाठिंब्याबद्दल विद्यापीठ प्रशासन, विभाग प्रमुख, मार्गदर्शक शिक्षक तसेच सर्व सहभागी विद्यार्थ्यांचे आभार मानले. विद्यार्थ्यांच्या संघासोबत विद्यापीठाचे क्रीडा अधिकारी डॉ. संघर्ष शृंगारे आणि फाइन आर्ट्स प्रभारी श्री. अमोल सोनकांबळे यांनी उपस्थित राहून विद्यार्थ्यांना योग्य मार्गदर्शन केले.

या उल्लेखनीय कामगिरीमुळे वसंतराव नाईक मराठवाडा कृषि विद्यापीठाने सेंट्रल झोनमध्ये सांस्कृतिक क्षेत्रातील आपली भक्कम छाप अधिक दृढ केली आहे.