वसंतराव नाईक मराठवाडा कृषि विद्यापीठाच्या सामुदायिक विज्ञान महाविद्यालयात नवप्रवेशित विद्यार्थ्यांचे स्वागत

 चार वर्षांची मेहनत संपूर्ण आयुष्याची दिशा ठरवते : सहयोगी अधिष्ठाता डॉ. राहुल रामटेके

वसंतराव नाईक मराठवाडा कृषि विद्यापीठाच्या सामुदायिक विज्ञान महाविद्यालयात शैक्षणिक वर्ष २०२५-२६ करिता पदवी आणि पदव्युत्तर अभ्यासक्रमाच्या नवप्रवेशित विद्यार्थ्यांचा स्वागत समारंभ दिनांक २४ नोव्हेंबर २०२५ रोजी उत्साहात पार पडला. या कार्यक्रमाच्या अध्यक्षस्थानी सहयोगी अधिष्ठाता डॉ. राहुल रामटेके होते. व्यासपीठावर विभाग प्रमुख डॉ. विजया पवार, डॉ. नीता गायकवाड, डॉ. वीणा भालेराव, डॉ. शंकर पुरी तसेच विषय शिक्षिका श्रीमती अंजली खेडेकर यांची उपस्थिती होती.

यावेळी मार्गदर्शन करताना सहयोगी अधिष्ठाता डॉ. राहुल रामटेके म्हणाले की, विद्यार्थ्यांनी महाविद्यालयात प्रवेश घेतल्याच्या पहिल्या दिवसापासूनच आपल्या स्वप्नांची उभारणी सुरू होते. त्यामुळे कठोर परिश्रम, अभ्यासू वृत्ती आणि वेळेचे योग्य नियोजन ही यशाची महत्त्वपूर्ण तीन स्तंभे आहेत. ते पुढे म्हणाले की, या चार वर्षांत घेतलेली मेहनत पुढील चाळीस वर्षांनाच नव्हे तर संपूर्ण आयुष्याला दिशा देणारी ठरते. शैक्षणिक ज्ञानाबरोबरच शिस्त, टीमवर्क, संवादकौशल्य, नेतृत्वगुण आणि सामाजिक जबाबदारी या सर्व गोष्टींचे शिक्षण येथे मिळते.महाविद्यालय हे केवळ पदवी मिळविण्याचे केंद्र नसून, व्यक्तिमत्त्व घडविण्याचे आणि आयुष्य घडविण्याचे गुरुकुल आहे, असे त्यांनी स्पष्ट केले. समाजाशी घट्ट नाते जोडत, नव्या संधी स्वीकारण्यासाठी विद्यार्थ्यांनी स्वतःला सदैव सज्ज ठेवावे, संशोधन–नवोन्मेषाची दिशा धरावी आणि उत्तम विद्यार्थी ते जबाबदार नागरिक असा प्रवास प्रत्येकाने निश्चित करावा, असे आवाहन त्यांनी केले.

कार्यक्रमाचे प्रस्ताविक जिमखाना उपाध्यक्ष व विभाग प्रमुख डॉ. शंकर पुरी यांनी केले. त्यांनी सांगितले की, या वर्षी महाराष्ट्रासह देशातील विविध राज्यांमधून विद्यार्थ्यांनी सामुदायिक विज्ञान अभ्यासक्रमास प्रवेश घेतला आहे. यात राजस्थानमधून ५, बिहारमधून २, तसेच उत्तर प्रदेश, तेलंगणा, मध्य प्रदेश आणि पश्चिम बंगालमधून प्रत्येकी १ अशा एकूण १२ विद्यार्थ्यांचा समावेश आहे. यामध्ये ७ मुली व ५ मुलांचा समावेश असून, सामुदायिक विज्ञान महाविद्यालयाची लोकप्रियता महाराष्ट्रासह बाहेरही वाढत असल्याचे यावरून स्पष्ट होते.

कार्यक्रमात पदवी अभ्यासक्रमातील नवप्रवेशित विद्यार्थ्यांचे स्वागत तृतीय वर्षातील विद्यार्थ्यांनी, तर पदव्युत्तर विद्यार्थ्यांचे स्वागत द्वितीय वर्षातील विद्यार्थ्यांनी केले.

विद्यार्थ्यांच्या कलागुणांना वाव मिळावा आणि त्यांच्या अंगी असलेल्या विविध कला ओळखता याव्यात, यासाठी विविध सांस्कृतिक कार्यक्रमांचे आयोजन करण्यात आले. या कार्यक्रमांना विद्यार्थी–विद्यार्थिनींनी उत्स्फूर्त प्रतिसाद देत आपल्या कलांचा उत्कृष्ट प्रकारे सादर केल्या. सादर केलेल्या कलागुणांचे मूल्यमापन करून नवप्रवेशित विद्यार्थ्यांमधून श्रावणी डोके हिला ‘मिस फ्रेशर’, तर यश काळे आणि शिवम राज यांची ‘मिस्टर फ्रेशर’ म्हणून निवड करण्यात आली.

या कार्यक्रमाचे आयोजन सहयोगी अधिष्ठाता डॉ. राहुल रामटेके यांच्या मार्गदर्शनाखाली जिमखाना उपाध्यक्ष डॉ. शंकर पुरी आणि तृतीय वर्षातील विद्यार्थ्यांनी केले. कार्यक्रम यशस्वी करण्यासाठी श्री रमेश शिंदे, श्री अलीम तसेच इतर विद्यार्थ्यांनीही उत्स्फूर्त सहकार्य केले.