वसंतराव नाईक मराठवाडा कृषि विद्यापीठाचा ‘शेतकरी–शास्त्रज्ञ ऑनलाईन कृषि संवाद’ उपक्रमाचा ७३ वा भाग उत्साहात संपन्न

 

वसंतराव नाईक मराठवाडा कृषि विद्यापीठाचा ‘शेतकरी–शास्त्रज्ञ ऑनलाईन कृषि संवाद’ या मार्गदर्शनपर उपक्रमाचा ७३ वा भाग दिनांक २१ नोव्हेंबर २०२५ रोजी यशस्वीरीत्या पार पडला. विद्यापीठ आणि कृषी विज्ञान केंद्र, सगरोळी (जि. नांदेड) यांच्या संयुक्त विद्यमाने, माननीय कुलगुरू प्रा. (डॉ.) इन्द्र मणि यांच्या प्रेरणेतून व विस्तार शिक्षण संचालक डॉ. राकेश अहिरे यांच्या मार्गदर्शनाखाली हा कार्यक्रम आयोजित करण्यात आला.

या सत्रात ‘चिया लागवड’, ‘आयुर्वेदिक शेती – शेतकऱ्यांचे अनुभव’ व ‘रब्बी पिकांतील कीड व रोग व्यवस्थापन’ या अत्यंत महत्त्वाच्या व सध्याच्या हंगामाला सामोरे जाणाऱ्या शेतकऱ्यांसाठी उपयुक्त अशा विषयांवर विस्तृत मार्गदर्शन करण्यात आले.

कार्यक्रमात कृषी विज्ञान केंद्राचे शास्त्रज्ञ डॉ. कृष्णा अंभुरे यांनी रब्बी पिकांवर नियमितपणे दिसणाऱ्या प्रमुख किडी, रोग, त्यांची लक्षणे, नियंत्रण उपाय आणि एकात्मिक कीड व्यवस्थापन तंत्रज्ञानाची उपयुक्तता याबाबत सविस्तर माहिती दिली. त्यांनी हवामानातील बदलांचा पिकांवर होणारा परिणाम आणि प्रतिबंधात्मक उपाययोजनांवरही प्रकाश टाकला.

चिया उत्पादक प्रगतशील शेतकरी श्री. बालाजी महादवाड यांनी चिया लागवडीचा आपला यशस्वी अनुभव, उत्पादन खर्च–नफा विश्लेषण, बाजारपेठेतील वाढती मागणी आणि आयुर्वेदिक शेती पद्धतीमुळे मिळणारे फायदे याबद्दल समग्र माहिती दिली. त्यांच्या अनुभव कथनामुळे या नव्या पिकाबद्दल उपस्थित शेतकऱ्यांचा उत्साह वाढला.

या उपक्रमाचे प्रभावी संयोजन मुख्य विस्तार शिक्षण अधिकारी डॉ. प्रशांत देशमुख आणि कृषी विज्ञान केंद्राचे डॉ. प्रविण यांनी केले. त्यांनी शेतकरी–शास्त्रज्ञ संवाद अधिक प्रभावी करण्यासाठी आणि आधुनिक तंत्रज्ञान प्रत्येक शेतकऱ्यापर्यंत पोहोचावे यासाठी सातत्याने हा उपक्रम राबविण्याचे आश्वासन दिले.

हा कार्यक्रम आभासी पद्धतीने आयोजित करण्यात आला असून मराठवाड्यातील सर्व जिल्ह्यातील ५० हून अधिक शेतकरी बांधवांनी उत्स्फूर्त सहभाग नोंदवला. शेतकऱ्यांच्या प्रश्नांना तज्ज्ञांनी तत्काळ उत्तरे देत संवाद अधिक परस्परसंवादी करण्यात आला.