वनामकृविच्या सामुदायिक विज्ञान महाविद्यालयात संविधान दिनानिमित्त उद्देशिकेचे सामूहिक वाचन व विविध उपक्रम

 

भारतीय संविधान आणि संविधानाचे शिल्पकार भारतरत्न डॉ. बाबासाहेब आंबेडकर यांच्या सन्मानार्थ देशभरात दरवर्षी संविधान दिन उत्साहात साजरा केला जातो. त्यानुसार “हमारा संविधान – माझे संविधान” या संकल्पनेच्या आधारे वसंतराव नाईक मराठवाडा कृषि विद्यापीठाच्या सामुदायिक विज्ञान महाविद्यालयात दिनांक २६ नोव्हेंबर २०२५ रोजी संविधान दिन मोठ्या उत्साहात साजरा करण्यात आला.

कार्यक्रमाच्या प्रारंभी भारतीय संविधानाच्या उद्देशिकेचे सामूहिक वाचन करण्यात आले. यानिमित्त सहयोगी अधिष्ठाता डॉ. राहुल रामटेके यांनी संविधान दिनाचे महत्त्व स्पष्ट करत व्यापक मार्गदर्शन केले. आपल्या मार्गदर्शनात त्यांनी भारतीय संविधानाची निर्मिती प्रक्रिया, त्यामागील दूरदृष्टी, नागरिकांचे मूलभूत हक्क–कर्तव्ये, तसेच आधुनिक भारताच्या विकासात युवा पिढीची भूमिका या महत्त्वपूर्ण मुद्द्यांवर सविस्तर प्रकाश टाकला. त्यांनी विद्यार्थ्यांना संविधानाचे मूल्य आत्मसात करून आदर्श नागरिकत्वाची वाटचाल करण्याचे आवाहनही केले.

कार्यक्रमाचे प्रास्ताविक राष्ट्रीय सेवा योजनेचे कार्यक्रम अधिकारी डॉ. शंकर पुरी यांनी केले. त्यांनी संविधान दिनाचे ऐतिहासिक व सामाजिक महत्त्व अधोरेखित करत विद्यार्थी–शिक्षक यांच्या सक्रिय सहभागाचे कौतुक केले.

या वेळी महाविद्यालयाच्या विभागप्रमुख डॉ. नीता गायकवाड, डॉ. वीणा भालेराव, विविध विभागातील प्राध्यापक, अधिकारी, कर्मचारी आणि विद्यार्थी मोठ्या संख्येने उपस्थित होते. कार्यक्रमात सिद्धार्थ वाहणे  याने भारतीय संविधानाच्या उद्देशिकेचे वाचन केले, त्याचे अनुकरण सर्वांनी केले.   

संविधान दिनानिमित्त महाविद्यालयात निबंध स्पर्धा, प्रश्नमंजुषा, संविधान मूल्य प्रसार उपक्रम, तसेच विद्यार्थ्यांमध्ये संविधानिक मूल्ये दृढ करण्यासाठी जनजागृती कार्यक्रमांचे आयोजन करण्यात आले. विद्यार्थ्यांनी उत्स्फूर्त सहभाग नोंदवत कार्यक्रमाला विशेष यश मिळवून दिले.