वनामकृवितील प्रायोगिक पूर्व प्राथमिक शाळेत पालक कार्यशाळेचे आयोजन

 

वसंतराव नाईक मराठवाडा कृषि विद्यापीठाच्या सामुदायिक विज्ञान महाविद्यालयातील मानव विकास व कौटुंबिक अभ्यास विभागांतर्गत चालणाऱ्या प्रायोगिक पूर्व प्राथमिक शाळेत पालक कार्यशाळेचे आयोजन दिनांक २८ नोव्हेंबर २०२५ रोजी करण्यात आले. कार्यशाळेच्या उद्घाटनप्रसंगी महाविद्यालयाचे सहयोगी अधिष्ठाता डॉ. राहुल रामटेके यांनी पालकांना मार्गदर्शन करताना सांगितले की, बालकांच्या सर्वांगीण विकासासाठी त्यांच्या कोवळ्या वयातील क्षमता, कल आणि आवडी ओळखून आनंददायी वातावरणात शिक्षण देणे अत्यंत आवश्यक आहे.

कार्यशाळेच्या मार्गदर्शिका व मानव विकास व कौटुंबिक अभ्यास विभागाच्या प्रमुख तसेच शाळेच्या समन्वयिका डॉ. वीणा भालेराव यांनी नवीन राष्ट्रीय शैक्षणिक धोरणानुसार ३ ते ६ वयोगटातील बालकांसाठी साक्षरता, संख्याज्ञान आणि मूलभूत संकल्पना दृढ करण्यासाठी मातृभाषेचा अधिकाधिक वापर किती महत्त्वाचा आहे यावर प्रकाश टाकला. पुढे त्यांनी बालविकासाबाबत पालकांनी विचारलेल्या प्रश्नांची समर्पक उत्तरे देत त्यांच्या शंकांचे निरसनही केले.

महाविद्यालयातील सहयोगी प्राध्यापक तथा कृषिरत महिला केंद्राच्या समन्वयिका डॉ. नीता गायकवाड यांनी बालकांच्या सर्वांगीण विकासात कुटुंबीयांची भूमिका किती महत्त्वपूर्ण आहे याची सविस्तर माहिती पालकांना दिली.

या कार्यशाळेला पालकांचा उत्स्फूर्त प्रतिसाद मिळाला असून शाळेतील सर्व शिक्षिका, शिक्षकेतर कर्मचारी तसेच महाविद्यालयातील विद्यार्थी–विद्यार्थिनी मोठ्या संख्येने उपस्थित होते. कार्यक्रमाचे सुबक सूत्रसंचालन शिक्षिका श्रुती औंढेकर यांनी केले.