सहाव्या आंतरराष्ट्रीय कृषिविद्या परिषदेत वनामकृविचे माननीय कुलगुरू प्रा. (डॉ.) इन्द्र मणि यांचे प्रभावी मार्गदर्शन

 स्मार्ट कृषीसाठी सार्वजनिक–खाजगी सहकार्याची गरज अधोरेखित

नवी दिल्ली येथे २४ ते २६ नोव्हेंबर २०२५ दरम्यान आयोजित सहाव्या आंतरराष्ट्रीय कृषिविद्या परिषदेत (6th International Agronomy Congress – IAC) “स्मार्ट कृषी-अन्न प्रणाली आणि पर्यावरणीय संवर्धनासाठी कृषीविद्याशास्त्राची पुनर्रचना” (Re-envisioning Agronomy for Smart Agri-food Systems and Environmental Stewardship) या प्रमुख विषयावर महत्त्वपूर्ण तांत्रिक सत्रांचे आयोजन करण्यात आले.

या अंतर्गत २५ नोव्हेंबर २०२५ रोजी सकाळी १०.०० ते दुपारी १.०० या वेळेत आयोजित ‘कृषिविद्या बळकटीसाठी सार्वजनिक–खाजगी सहकार्य’ (Public–Private Synergies for Strengthening Agronomy) या प्रायोजित तांत्रिक सत्राचे अध्यक्षस्थान वसंतराव नाईक मराठवाडा कृषि विद्यापीठ, परभणीचे माननीय कुलगुरू प्रा. (डॉ.) इन्द्र मणि यांनी भूषविले. या सत्रात ओसीपी न्युट्रीक्रॉप, मोरोक्कोचे श्री. अदम हमझा आणि भाकृअप – आयएएसआआय (ICAR-IASRI) नवी दिल्लीचे माजी संचालक डॉ. राजेंद्र प्रसाद हे सह-अध्यक्ष म्हणून उपस्थित होते.

आपल्या अध्यक्षीय मार्गदर्शनात माननीय कुलगुरू प्रा. (डॉ.) इन्द्र मणि यांनी सार्वजनिक–खाजगी भागीदारीचे वाढते महत्त्व अधोरेखित करताना कृषिविद्या (अॅग्रॉनॉमी) क्षेत्रातील संशोधन, नवोन्मेष, तंत्रज्ञान हस्तांतरण आणि क्षमता वृद्धी यासाठी समन्वित प्रयत्नांची नितांत आवश्यकता स्पष्ट केली. कृषी उत्पादनक्षमता वाढ, जलसंवर्धन, मृदा आरोग्य सुधारणा, संसाधनांचे कार्यक्षम व्यवस्थापन आणि स्मार्ट शेती तंत्रज्ञानाचा प्रभावी वापर या मुद्द्यांवर त्यांनी सविस्तर मार्गदर्शन केले.

या सत्रासाठी भाकृअप – आयएआरआय (ICAR-IARI), नवी दिल्ली येथील वरिष्ठ शास्त्रज्ञ डॉ. अंचल दास आणि डॉ. एस. एल. मीणा यांनी संयोजक म्हणून तर डॉ. ऋषी राज आणि डॉ. प्रवीण उपाध्याय यांनी रॅपोर्टर म्हणून काम पाहिले.

या कार्यक्रमात विद्यापीठाचे शिक्षण संचालक डॉ भगवान आसेवार यांनीही सहभागी होऊन लीड पेपर सादर केला. कार्यक्रमास विद्यापीठाचे कृषी विद्याशास्त्रज्ञ डॉ. सूर्यकांत पवार, डॉ. किरण जाधव तसेच देश-विदेशातील नामवंत वैज्ञानिक, संशोधक, उद्योग प्रतिनिधी आणि विद्यार्थी मोठ्या संख्येने उपस्थित होते. राष्ट्रीय फिजिकल लॅबोरेटरी (NPL), नवी दिल्ली येथे झालेल्या या काँग्रेसमध्ये स्मार्ट अॅग्रो-फूड सिस्टीम्स, हवामान-लक्ष्यित शेती, पर्यावरणपूरक कृषी पद्धती आणि नवीनतम तांत्रिक नवकल्पना यावर उच्चस्तरीय विचारमंथन झाले.

या सत्रामुळे आणि काँग्रेसच्या एकूण चर्चेमुळे भारतातील अॅग्रॉनॉमी संशोधन, नवोन्मेष आणि सार्वजनिक–खाजगी सहकार्यास नवे आयाम व नवी दिशा मिळाल्याची भावना उपस्थित मान्यवरांनी व्यक्त केली.