Friday, November 28, 2025

वसंतराव नाईक मराठवाडा कृषि विद्यापीठात लेदर बॉल अंतर-महाविद्यालयीन क्रिकेट स्पर्धेचे उत्साहपूर्ण उद्घाटन.

 

माननीय कुलगुरू प्रा. (डॉ.) इन्द्र मणि 

माननीय महासंचालिका श्रीमती वर्षा लड्डा- उंटवाल 

वसंतराव नाईक मराठवाडा कृषि विद्यापीठात तब्बल ३० वर्षांनंतर लेदर बॉल क्रिकेट अंतर-महाविद्यालयीन स्पर्धेचे भव्य उद्घाटन दिनांक २७ नोव्हेंबर २०२५ रोजी उत्साहात संपन्न झाले. या स्पर्धेचे उद्घाटन विद्यापीठाचे माननीय कुलगुरू प्रा. (डॉ.) इन्द्र मणि यांच्या हस्ते झाले. यावेळी महाराष्ट्र कृषि शिक्षण व संशोधन परिषद, पुणे यांच्या माननीय महासंचालिका श्रीमती वर्षा लड्डा- उंटवाल प्रमुख अतिथी म्हणून उपस्थित होत्या.

उद्घाटन सोहळ्यास विद्यापीठाचे संचालक विस्तार शिक्षण डॉ. राकेश अहिरे, संशोधन संचालक डॉ. खिजर बेग, कुलसचिव मा. संतोषी वेणीकर, विद्यापीठ अभियंता श्री. दीपक कशाळकर, कृषि परिषदेचे शिक्षण संचालक डॉ. यशवंत साळे, विद्यार्थी कल्याण अधिकारी डॉ. राजेश कदम आदी मान्यवर उपस्थित होते.

उद्घाटनप्रसंगी माननीय कुलगुरू प्रा. (डॉ.) इन्द्र मणि म्हणाले, खेळामुळे विद्यार्थ्यांमध्ये सांघिक भावना, मैत्रीभाव, शारीरिक तंदुरुस्ती आणि संतुलित व्यक्तिमत्व विकास घडतो. अशा स्पर्धांमधून विद्यापीठाचे विद्यार्थी देशाचे सृजनशील, सक्षम आणि निरोगी नागरिक बनतात.

यावेळी आपल्या मनोगतात माननीय महासंचालिका श्रीमती वर्षा लड्डा- उंटवाल म्हणाल्या की, लेदर बॉल क्रिकेट स्पर्धा पुन्हा सुरू करण्याचे कौतुकास्पद पाऊल विद्यापीठाने उचलले आहे. मला माझ्या कार्यकाळातील महसूल विभागातील स्पर्धांची सुंदर आठवण झाली. अशा क्रिडांगण आणि सोयी सुविधांच्या उभारणीसाठी महाराष्ट्र कृषि शिक्षण व संशोधन परिषद, पुणे निश्चितच मदत करेल.

या कार्यक्रमाचे आयोजन विद्यार्थी कल्याण अधिकारी कार्यालय आणि कृषि महाविद्यालय, परभणी यांच्या संयुक्त विद्यमाने करण्यात आले होते. महाविद्यालयाचे सहयोगी अधिष्ठाता डॉ. प्रविण वैद्य यांनी कार्यक्रमाचे प्रास्ताविक करून स्पर्धेची पार्श्वभूमी आणि आयोजनाचा उद्देश मांडला.

कार्यक्रमाचे सूत्रसंचालन शिक्षण प्रभारी डॉ. रणजीत चव्हाण यांनी केले तर आभार प्रदर्शन डॉ. धीरज पाथ्रीकर यांनी केले.

लेदर बॉल क्रिकेट स्पर्धेला विद्यार्थ्यांचा उत्स्फूर्त प्रतिसाद मिळत असून विद्यापीठात खेळ संस्कृतीला नवे बळ मिळाल्याचे समाधान उपस्थितांनी व्यक्त केले.