वसंतराव नाईक मराठवाडा कृषि विद्यापीठ आणि रिलायन्स फाउंडेशनतर्फे मौजे धार येथे प्रगत तंत्रज्ञानावर आधारित प्रक्षेत्र भेट

 शेतकऱ्यांना पीक संरक्षण, उत्पादनवाढ आणि आधुनिक व्यवस्थापन तंत्रांची तज्ज्ञांद्वारा सविस्तर माहिती

वसंतराव नाईक मराठवाडा कृषि विद्यापीठ, परभणी आणि रिलायन्स फाउंडेशन यांच्या संयुक्त विद्यमाने दिनांक २१ नोव्हेंबर २०२५ रोजी मौजे धार, ता. जि. परभणी येथे शेतकऱ्यांसाठी प्रगत तंत्रज्ञानाधारित प्रक्षेत्र भेटीचे आयोजन करण्यात आले. या उपक्रमाचा उद्देश शेतकऱ्यांना प्रत्यक्ष शेतावर जाऊन पीक समस्या समजून घेणे, शेतकरी–शास्त्रज्ञ संवाद वाढवणे आणि वैज्ञानिक पद्धतींचा अवलंब करण्यास प्रोत्साहित करणे हा होता.

कार्यक्रमादरम्यान कृषि तंत्रज्ञान माहिती केंद्राचे वरिष्ठ शास्त्रज्ञ डॉ. गजानन गडदे आणि वरिष्ठ संशोधन सहायक श्री. मधुकर मांडगे यांनी शेतकऱ्यांच्या शेतावर भेट देऊन विविध पिकांची पिकस्थिती, वाढीची टप्पे आणि विद्यमान समस्या यांचा थेट आढावा घेतला.

यावेळी त्यांनी हरभरा पिकात सूक्ष्म अन्नद्रव्य व्यवस्थापनाचे महत्त्व, पाण्याचे नियोजन, मर रोगाचे नियंत्रण आणि इतर प्रमुख किडींवरील एकात्मिक व्यवस्थापन पद्धतींची सविस्तर माहिती. तर तूर पिकासाठी फायटोप्थोरा मर रोग नियंत्रणासाठी प्रतिबंधात्मक उपाय, प्रतिकारक्षम वाणांचा अवलंब आणि निचरा व्यवस्थापनाची शिफारस केली. याबरोबरच कापूस पिकात आढळणाऱ्या फरदड समस्येवर प्रभावी उपाययोजना, फेरपालट पिक पद्धती आणि योग्य प्रमाणात संतुलित खते वापरण्याचे मार्गदर्शन. तसेच शेतात उपलब्ध संसाधनांचा योग्य वापर, हवामान आधारित कृषी नियोजन आणि खर्च कमी करून उत्पादनवाढ कशी साधता येईल यावरही तज्ज्ञांनी मार्गदर्शन केले.

कार्यक्रमास रिलायन्स फाउंडेशनचे श्री. रामजी राऊत, ग्रामस्थ, आणि परिसरातील २० हून अधिक शेतकरी उत्साहाने उपस्थित होते. शेतकऱ्यांनी या उपक्रमाचे जोरदार स्वागत करत अशा उपयुक्त प्रक्षेत्र भेटींचे नियमित आयोजन व्हावे, अशी अपेक्षा व्यक्त केली.