वनामकृवित महात्मा फुले व डॉ बाबासाहेब आंबेडकर यांच्या संयुक्त जयंती महोत्सवानिमित्त डॉ बबन जोगदंड यांचे व्या‍ख्यान

वसंतराव नाईक मराठवाडा कृषि विद्यापीठातील कास्‍ट्राईक कर्मचारी महासंघ वनामकृवि शाखेच्‍या वतीने महात्‍मा फुले व डॉ बाबासाहेब आंबेडकर यांच्‍या संयुक्‍त जयंती महोत्‍सवानिमित्‍त दिनांक 25 एप्रिल रोजी सायंकाळी 5.00 वाजता परभणी कृषि महाविद्यालयाच्‍या सभागृहात पुणे येथील यशवंतराव चव्‍हाण विकास प्रबोधीनीचे संशोधन अधिकारी (प्रकाशन) डॉ बबन जोगदंड यांच्‍या व्‍याख्‍यानाचे आयोजन करण्‍यात आले आहे. कार्यक्रमाच्‍या अध्‍यक्षस्‍थानी कुलगुरू मा डॉ अशोक ढवण हे लाभणार आहेत, तरी व्‍याख्‍यानास जास्‍तीत जास्‍त संख्‍येने उपस्थित राहण्‍याचे आवाहन महा‍संघाचे अध्‍यक्ष डॉ गजेंद्र लोंढे, महासचिव प्रा ए एम कांबळे आदींनी केले आहे.

मौजे बाभुळगांव येथील श्री बाबासाहेब पारधे यांना क्रीडा संस्‍थेचा उत्‍कृष्‍ट शेतकरी पुरस्‍कार

परभणी तालुक्‍यातील मौजे बाभुळगांव येथील प्रगतशील शेतकरी श्री. बाबासाहेब पारधे यांना भारतीय कृषि अनुसंधान परिषद अंतर्गत असलेल्‍या हैद्राबाद येथील केंद्रीय कोरडवाहू शेती संशोधन संस्‍थेच्‍या (क्रीडा) वतीने 2019 वर्षाचा कोरडवाहु शेतीतील उत्‍कृष्‍ट शेतकरी पुरस्‍काराने सन्‍मानित करण्‍यात आला. केंद्रीय कोरडवाहू शेती संशोधन संस्‍थेच्‍या स्‍थापना दिनीनिमित्‍त हैद्राबाद येथे सदरिल पुरस्‍कार  संस्‍थेचे संचालक मा. डॉ. जी. रविंद्र चारी व प्रो. जयशंकर तेलंगणा कृषि विदयापीठाचे कुलगुरू मा. डॉ. प्रवीण राव यांच्‍या हस्‍ते प्रदान करण्‍यात आला. यावेळी वरीष्‍ठ संशोधन सहयोगी डॉ. हनुमान गरूड हे उपस्थित होते. वसंतराव नाईक मराठवाडा कृषि विदयापीठ, परभणी अंतर्गत अखिल भारतीय समन्‍वयीत संशोधन प्रकल्‍पाच्‍या कोरडवाहू शेती संशोधन केंद्राच्‍या वतीने परभणी तालुक्‍यातील मौजे बाभुळगांव येथे हवामान बदलानुरूप राष्‍ट्रीय कृषि उपक्रम राबविण्‍यात येत असुन श्री बाबासाहेब पारधे यांनी हवामान बदलानुरूप परिस्थितीत अनुकूल कोरडवाहू शेती तंत्रज्ञानाचा अवलंब करून शेतीत शाश्‍वत उत्‍पादन मिळवित आहेत. कोरडवाहू शेतीतील विविध तंत्रज्ञानाबाबत श्री बाबासाहेब पारधे यांना कोरडवाहू शेती संशोधन केंद्राचे मुख्‍य शास्‍त्रज्ञ डॉ. भगवान आसेवार व वरीष्‍ठ शास्‍त्रज्ञ डॉ. मदन पेंडके यांनी वेळोवेळी मार्गदर्शन केले.

वनामकृवित भारतरत्‍न डॉ बाबासाहेब आंबेडकर यांची 128 वी जयंती उत्‍साहात साजरी

लोकशाही अधिक भक्कम करण्‍यासाठी मतदानाचा हक्‍क बजावा.....कुलगुरू मा डॉ अशोक ढवण 

वसंतराव नाईक मराठवाडा कृषि विद्यापीठातील विद्यार्थ्‍यी कल्‍याण अधिकारी कार्यालयाच्‍या वतीने भारतरत्‍न डॉ बाबासाहेब आंबेडकर यांची 128 वी जयंती दिनांक 14 एप्रिल रोजी उत्‍साहात साजरी करण्‍यात आली. भारतरत्‍न डॉ बाबासाहेब आंबेडकर यांच्‍या प्रतिमेचे कुलगुरू मा डॉ अशोक ढवण यांच्‍या हस्‍ते पुजन करून विनम्र अभिवादन करण्‍यात आले. यावेळी प्राचार्य डॉ धर्मराज गोखले, प्राचार्य डॉ उद्य खोडके, विद्यार्थ्‍यी कल्‍याण अधिकारी डॉ महेश देशमुख, विभाग प्रमुख डॉ गजेंद्र लोंढे, डॉ डब्‍लु एन नारखेडे, विद्यार्थ्‍यी प्रतिनिधी राहुल आरकडे, गुलाब इंगळे आदींची प्रमुख उपस्थिती होती.

मार्गदर्शन करतांना कुलगुरू मा डॉ अशोक ढवण म्‍हणाले की, डॉ बाबासाहेब आंबेडकरांनी जगातील अनेक देशांच्‍या संविधानाचा बारकाईने अभ्‍यास करून भारतीय परिस्थितीस अनूकुल अशी जगातील सर्वश्रेष्‍ठ संविधानाची निर्मिती केली. ताठरता व ठिसुळता असे दोन्‍ही गुण या संविधानात आहेत. याच संविधानाच्‍या आधारे जगातील सर्वात मोठया लोकशाही देशातील कारभार चालतो. आपल्‍या देशाची लोकशाही अधिक भक्कम करण्‍यासाठी सर्वांनी मतदानाचा हक्‍क बजावला पाहिजे, असा सल्‍लाही त्‍यांनी दिला. यावेळी डॉ बाबासाहेब आंबेडकर यांच्‍या प्रतिमेचे ढोलताशाच्‍या गजरात विद्यापीठ परिसरात मिरवणुक काढण्‍यात आली. कार्यक्रमाचे सुत्रसंचालन प्रज्ञशिल वाघमारे यांनी केले तर आभार राहुल कन्‍हेरकर यांनी मानले. कार्यक्रमास विद्यापीठातील अधिकारी, प्राध्‍यापक, कर्मचारी व विद्यार्थ्‍यी मोठया संख्‍येने उपस्थित होते.

डॉ बाबासाहेब आंबेडकरांनी सर्वांना समानतेचा हक्‍क मिळवुन दिला......डॉ प्रकाश हसनाळकर

वनामकृवितील परभणी कृषि महाविद्यालयात डॉ बाबासाहेब आंबेडकर यांच्‍या जयंती महोत्‍सवानिमित्‍त आयोजीत व्‍याख्‍यानात प्रतिपादन

इतिहासापासुन आपण धडा घेतला पाहिजे महापुरूषाच्‍या केवळ जयंती महोत्‍सव साजरी करून न थांबता, त्‍यांच्‍या विचारांचा आपल्‍या जीवनात अवलंब केला पाहिजे. भारतीय संविधानाची निर्मिती करून डॉ बाबासाहेब आंबेडकरांनी शिक्षण, स्‍वांतत्र्याचा सर्वांना समान हक्‍क प्राप्‍त करून दिला, असे प्रतिपादन पुणे येथील पशुसंवर्धन विभागाचे विभागीय उपायुक्‍त डॉ प्रकाश हसनाळकर यांनी केले. वसंतराव नाईक मराठवाडा कृषि विद्यापीठातील परभणी येथील कृषि महाविद्यालयाच्‍या वतीने भारतरत्‍न डॉ बाबासाहेब आंबेडकर यांच्‍या 128 व्‍या जयंती निमित्‍त दिनांक 13 एप्रिल रोजी आयोजित व्‍याख्‍यानाच्‍या प्रसंगी ते बोलत होते. कार्यक्रमाच्‍या अध्‍यक्षस्‍थानी कुलगुरू मा डॉ अशोक ढवण हे होते तर व्‍यासपीठावर प्राचार्य डॉ धर्मराज गोखले, प्राचार्य डॉ उदय खोडके, विभाग प्रमुख डॉ गजेंद्र लोंढे, डॉ डब्‍लु एन नारखेडे, विद्यार्थ्‍यी प्रतिनिधी राहुल आरकडे, गुलाब इंगळे आदींची प्रमुख उपस्थिती होती.

डॉ प्रकाश हसनाळकर पुढे म्‍हणाले की, डॉ बाबासाहेब आंबेडकरांनी वंचित समाजास मुख्‍य प्रवाहात आणले, लेखणीने क्रांती घडवुन आणली. आज समाजात मोठे मतपरिवर्तन दिसते ते समाज सुधारकांच्‍या कार्यामुळे, सामाजिक कार्यामुळे अनेक समाज सुधारकांना समाजात गुरूतत्‍व प्राप्‍त झाले, असे प्रतिपादन त्‍यांनी केले.

अध्‍यक्षीय भाषणात कुलगुरू मा डॉ अशोक ढवण यांनी जयंती महोत्‍सवानिमित्‍त थोर महापुरूषांनी केलेल्‍या कार्याच्‍या विविध पैलुचा अभ्‍यास विद्यार्थ्‍यीं करावा असा सल्‍ला त्‍यांनी दिला. कार्यक्रमाचे प्रास्‍ताविक प्राचार्य डॉ धर्मराज गोखले यांनी केले तर सुत्रसंचालन प्रा संदिप बडगुजर यांनी केले. कार्यक्रमास महाविद्यालयातील प्राध्‍यापक, कर्मचारी व विद्यार्थ्‍यी मोठया संख्‍येने उपस्थित होते.

अपयशातुन धडा घेत यशाचा निर्धार केला पाहिजे.....कुलगुरू मा डॉ अशोक ढवण

कृषि पदव्‍युत्‍तर अभ्‍यासक्रमाच्‍या सामाईक प्र‍वेश परिक्षेत परभणी कृषि महाविद्यालयाचा सुशांत धनवडे राज्‍यात प्रथम

महाराष्‍ट्र कृषि विद्यापीठ परीक्षा मंडळाच्‍या वतीने घेण्‍यात आलेल्‍या कृषि पदव्‍युत्‍तर अभ्‍यासक्रमासाठीच्‍या सन 2019 सामाईक प्र‍वेश परिक्षेत वसंतराव नाईक मराठवाडा कृषि विद्यापीठांतर्गत असलेल्‍या परभणी कृषि महाविद्यालयाचा विद्या‍र्थ्‍यी सुशांत धनवडे राज्‍यात प्रथम आला असुन महाविद्यालयाचे 17 विद्यार्थ्‍यांचा पहिल्‍या शंभर मध्‍ये समावेश आहे. या यशस्‍वी विद्यार्थ्‍यांचा सत्‍कार व अंतिम सत्राच्‍या विद्यार्थ्‍यांचा निरोप समारोपाचा कार्यक्रमाचे आयोजन दिनांक 9 एप्रिल रोजी महाविद्यालयात करण्‍यात आले होते. कार्यक्रमाच्‍या अध्‍यक्षस्‍थानी कुलगुरू मा डॉ अशोक ढवण हे होते तर प्राचार्य डॉ धर्मराज गोखले, डॉ डी एन धुतराज, डॉ राकेश आहिरे, डॉ डब्‍लु एन नारखेडे, प्रा संदीप बडगुजर आदींची व्‍यासपीठावर प्रमुख उपस्थिती होती.

अध्‍यक्षीय भाषणात कुलगुरू मा डॉ अशोक ढवण म्‍हणाले की, कृषि पदवीधरांना सरकारी नौक-यात कमी संधी असल्‍या तरी कॉर्पोरेट क्षेत्र व कृ‍षी प्रक्रिया उद्योगात मोठया संधी असुन त्‍यांचा शोध घ्‍यावा. एखाद्या परीक्षेत आलेल्‍या अपयशाने नाउमेद न होता, प्रत्‍येक अपयशातुन धडा घेत यशाचा निर्धार केला पाहिजे, असे मत व्‍यक्‍त करून या परिक्षेतील विद्यार्थ्‍यांचे यश हे प्राचार्य डॉ धर्मराज गोखले यांच्‍या मार्गदर्शनाखाली सर्व प्राध्‍यापकवृंदाच्‍या परिश्रमामुळे हे शक्‍य झाले, असे गौरवोद्गारही त्‍यांनी काढले.

कार्यक्रमात यशस्‍वी विद्यार्थ्‍यांना कुलगुरूच्‍या हस्‍ते गौरविण्‍यात आले. कार्यक्रमाच्या प्रास्‍ताविकात प्राचार्य डॉ धर्मराज गोखले यांनी गेल्‍या वर्षीही या परिक्षेत परभणी महाविद्यालयाचा विद्यार्थ्‍यी राज्‍यात प्रथम होता, यावर्षी ही परंपरा राखली असल्‍याचे सांगितले. कार्यक्रमाचे सुत्रसंचालन प्रा विजयकुमार जाधव, सपना डोडे, अच्‍युत पिल्‍लेवाड यांनी केले तर आभार केशव सुर्यवंशी यांनी मानले. कार्यक्रमास महाविद्यालयातील प्राध्‍यापक, कर्मचारी व विद्यार्थ्‍यी मोठया संख्‍येने उपस्थित होते.

महाराष्‍ट्र कृषि विद्यापीठ परीक्षा मंडळाच्‍या वतीने घेण्‍यात आलेल्‍या कृषि पदव्‍युत्‍तर अभ्‍यासक्रमासाठीच्‍या सन 2019 सामाईक प्र‍वेश परिक्षेत वसंतराव नाईक मराठवाडा कृषि विद्यापीठांतर्गत असलेल्‍या परभणी कृषि महाविद्यालयाचा विद्या‍र्थ्‍यी सुशांत धनवडे राज्‍यात प्रथम आला असुन ऋषिकेश बोधवड हा पाचव्‍या क्रमांकाने उत्‍तीर्ण झाला आहे. तसेच विनोद ओसावर, कृ‍ष्‍णा हरकळ, प्रिया मगर, स्‍वप्‍नाली भापकर, मोहीनी थिटे, शितल नावडे, शुभांगी कदम, सी अनंथु, लक्ष्‍मण कदम, रवि जाधव, आरती शिकारी, कल्‍पना देशमुख, कार्तिक जाधव, स्‍नेहल इंगले आदी 17 विद्यार्थ्‍यांचा पहिल्‍या शंभर मध्‍ये समावेश आहे.

वनामकृविच्‍या सामुदायिक विज्ञान महाविद्यालयात व्यक्तिमत्व विकास कार्यशाळा संपन्‍न

वसंतराव नाईक मराठवाडा कृषि विद्यापीठांतर्गत असलेल्‍या सामुदायिक विज्ञान महाविद्यालयात विद्यार्थ्‍यांकरिता दोन दिवसीय कार्यशाळाचे नुकतेच आयोजन करण्‍यात आले होते. कार्यशाळेचे उदघाटन सहयोगी अधिष्ठाता व प्राचार्या डॉ. हेमांगिनी सरंबेकर यांच्‍या हस्‍ते करण्‍यात आले. महाविद्यालयात आयोजित विविध व्‍यक्तिमत्‍व विकासा कार्यक्रमाचा लाभ विद्यार्थ्‍यांनी घेऊन स्वत:चे व्यक्तिमत्व फूलवावे, याचा उपयोग भविष्यात चांगल्या प्रकारच्या उद्योग व्यवसाय किंवा नोकरीमध्ये निश्चितच होईल असे मत व्‍यक्‍त केले. कार्यशाळेत संवाद कौशल्ये, निर्णय क्षमता, सकारात्मकता, ध्येयनिश्चिती, वेळेचे व ताणतणाव व्यवस्थापन, मुलाखत कौशल्य, व्यक्तीपरस्पर सबंध आदी विषयांवर पुणे येथील कम्युनिकेअर संस्‍थेचे प्रा. कुशल राऊत आणि प्रा. संजीव राणे यांनी मार्गदर्शन केले. कार्यशाळेच्‍या प्रमाणपत्र वितरण कार्यक्रमात सहभागी विद्यार्थ्‍यांनी कार्यशाळेतील मार्गदर्शनाचा वैयक्तिक व प्रोफेशनल जीवनात यशाकरिता निश्चित होणार असल्याचे मत व्यक्त केले. या कार्यशाळा आयोजनाकरीता डॉ. वीणा भालेराव, जिमखाना उपाध्यक्षा डॉ. सुनिता काळे यांनी विशेष परिश्रम घेतले.

वनामकृविच्या औरंगाबाद येथील राष्ट्रीय कृषि संशोधन प्रकल्पास समृध्दी अवार्ड

वसंतराव नाईक मराठवाडा कृषि विद्यापीठांतर्गत असलेल्‍या औरंगाबाद येथील राष्ट्रीय कृषि संशोधन प्रकल्पास बाजरी व मका पिकांतील संशोधनाबाबत महिंद्रा आणि महिंद्रा समृध्दी अवार्ड 2019 चा कृषि संस्थान सन्मानाने दिनांक 18 मार्च रोजी नवी दिल्ली येथे निती आयोगाचे मुख्य कार्यकारी अधिकारी मा. श्री. अमिताभ कांत, महिंद्रा आणि महिंद्राचे मॅनेजिंग डायरेक्टर श्री पवन कुमार यांचे हस्ते देण्यात आला. कार्यक्रमाला प्रमुख पाहूणे म्हणुन भारतीय कृषि अनुसंधान परिषदेचे महासंचालक डॉ. त्रिलोचन महापात्रा, राष्ट्रीय कृषि कोरडवाहू प्राधिकरणाचे श्री अशोक दलवाई आदीसह कृषि क्षेत्रातील मान्यवर उपस्थित होते.

सद्यपरिस्थीतीत पिक पध्दतीत बदलाने खाद्य संस्कृती ही बदलत आहे. मागील काही वर्षामध्ये राज्यात ज्वारी आणि बाजरी या अन्नधान्य पिकाखालील क्षेत्र कमी झाले आहे. या बदलामुळे आपले मुख्य अन्नात  ग्लुटेनयुक्त गव्हाच्या चपातीचा वापर मोठया प्रमाणात वाढला आहे. ज्वारी, बाजरी नाही तर चारा नाही, चारा नाही तर जनावरे नाहीत आणि जनावरे नाहीत तर शेतीला शेणखत नाही. अर्थात पिक पध्दतीतील बदलाच्या या फे-यात मानवी आणि मातीचे आरोग्यही बिघडत चालले आहे. अशा परिस्थतीतीमध्ये वसंतराव नाईक मराठवाडा कृषि विद्यापीठांतर्गत औरंगाबाद येथील राष्ट्रीय कृषि संशोधन प्रकल्प, इक्रीसॅट संस्था हैदराबाद व अखिल भारतीय समन्वयीत बाजरी सुधार प्रकल्प यांच्या संयुक्त विद्यमाने बाजरी पिकामध्ये अधिकतम लोह व जस्त युक्त एएचबी-1200 (AHB 1200Fe) आणि एएचबी-1269 (AHB 1269) संकरीत वाण राष्ट्रीय स्तरावर  प्रसारीत करण्यात आले आहेत. या वाणा मुळे खाण्यास पौष्टीक आणि आरोग्यदायक बाजरीची भर पडली असल्याने राज्यात बाजरीचे क्षेत्र वाढण्यास हातभार लागेल. या संशोधनामुळे आदिवासी भागातील कुपोषीत लहान मुले आणि महिलांच्या खाद्यामध्ये लोह आणि जस्तयुक्त बाजरीचा समावेश केल्यास कुपोषण कमी करण्यास व महिलांची कार्यक्षमता  वाढण्यास मदत होणार आहे. संशोधन केंद्राने विविध पिकांच्या संशोधन शिफारशी (बाजरा व मका) दिलेल्या असुन विस्तार कार्याद्वारे हे तंत्रज्ञान शेतक-यांपर्यंत पोहोचविले आहे.

राष्ट्रीय कृषि संशोधन प्रकल्पाचे सहयोगी संचालक संशोधन डॉ. सुर्यंकांत पवार तसेच पैदासकार डॉ. दिपक पाटील, वनस्पती रोग शास्त्रज्ञ डॉ. गजेंद्र जगताप, प्रा. दिनेश लोमटे, डॉ. एस आर जक्कावाड, डॉ. नितीन पतंगे, प्रा. सुरेखा कदम, श्री. राजेंद्र सावंत आदीसह सेवानिवृत्त पैदासकार डॉ. नंदकुमार सातपुते, डॉ. घुगे, श्री. ठोंबरे, श्री. कनिमर, श्री. चक्रे, श्री. दहिफळे, श्री. लघाने, श्री. माने, श्री. वाघमारे आदींचे संशोधनात योगदान आहे. या सन्‍मानाबाबत विद्यापीठाचे कुलगुरु मा डॉ अशोक ढवण, संशोधन संचालक डॉ दत्तप्रसाद वासकर, विस्तार शिक्षण संचालक डॉ. प्रदिप इंगोले यांनी राष्ट्रीय कृषि संशोधन प्रकल्पातील सर्व शास्त्रज्ञांचे अभिनंदन केले व भविष्यात देखील चांगले कार्य चालु ठेवावे अश्या शुभेच्छा दिल्या.