वसंतराव नाईक मराठवाडा कृषि विद्यापीठाचे माननीय कुलगुरू प्रा. (डॉ.)
इन्द्र मणि यांनी दिनांक १९ एप्रिल रोजी छत्रपती संभाजीनगर येथील हिमायत बाग
परिसरातील फळ संशोधन केंद्रात आढावा बैठक घेतली. या बैठकीस राष्ट्रीय कृषि संशोधन
प्रकल्पाचे डॉ. सूर्यकांत पवार, फळ संशोधन केंद्राचे शास्त्रज्ञ डॉ. रविंद्र नाईनवाड,
कृषि विज्ञान केंद्राच्या कार्यक्रम समन्वयक डॉ. दीप्ती पाटगावकर
तसेच संबंधित अधिकारी व कर्मचारी उपस्थित होते.
या बैठकीदरम्यान माननीय कुलगुरूंनी विद्यापीठाच्या छत्रपती संभाजीनगर येथील
विविध कार्यालयांच्या कार्याचा आढावा घेतला. त्यांनी परिसराचे सुशोभीकरण, वृक्ष लागवड व
स्वच्छतेवर भर देण्याच्या सूचना दिल्या. येणाऱ्या खरीप हंगामात शेतकऱ्यांना कमी
खर्चात अधिक उत्पादन मिळवून देण्यासाठी विद्यापीठाने विकसित केलेले तंत्रज्ञान कृषि
विभागाच्या सहकार्याने शेतकऱ्यांपर्यंत
पोहोचविण्याचे निर्देशही त्यांनी दिले.
यावेळी पीएम-प्रणाम योजना, नैसर्गिक व सेंद्रिय शेती याबाबत शेतकऱ्यांमध्ये जनजागृती
करण्याचे सूचना त्यांनी कृषि विज्ञान केंद्राला दिली. तसेच, बायोमिक्स
व जैविक खते यांचे उत्पादन वाढवून त्याचा पुरवठा शेतकऱ्यांना वेळेत आणि मोठ्या
प्रमाणात करण्यासाठी प्रयत्नशील राहण्याचे निर्देश दिले.
माननीय कुलगुरूंनी हे ही स्पष्टपणे नमूद केले की, विद्यापीठातील
सर्व अधिकारी व कर्मचाऱ्यांनी एकमेकांचे सहकार्य घेत शेतकऱ्यांच्या गरजेनुसार
संशोधनाची दिशा ठरवावी आणि कोणताही द्वेषभाव न ठेवता कार्यरत राहावे. त्यांनी चालू
उपक्रमांची माहिती घेतली व येणाऱ्या खरीप हंगामाच्या यशस्वीतेसाठी सर्वांनी
एकजुटीने प्रयत्न करण्याचे आवाहन केले.
