उन्हाळी पिके, फळबागा आणि पशुधानांची काळजी घ्यावी... माननीय कुलगुरू प्रा (डॉ.) इन्द्र मणि
वसंतराव नाईक मराठवाडा कृषि विद्यापीठाच्या विस्तार शिक्षण संचालनालय आणि महाराष्ट्र शासनाच्या कृषि विभाग यांच्या संयुक्त विद्यमाने कीटक शास्त्र विभाग व कृषि विभागाच्या क्रॉपसॅप प्रकल्पांतर्गत ऑनलाइन शेतकरी - शास्त्रज्ञ कृषि संवाद कार्यक्रमाचा ४२ वा भाग माननीय कुलगुरू प्रा (डॉ.) इन्द्र मणि यांच्या अध्यक्षतेखाली दिनांक १८ एप्रिल रोजी संपन्न झाला.
यावेळी बोलताना माननीय कुलगुरू प्रा (डॉ.) इन्द्र मणि यांनी
वाढत्या उन्हाळ्याच्या पार्श्वभूमीवर शेतकऱ्यांना उन्हाळी पिके, फळबागा
आणि पशुधन यांची काळजीपूर्वक देखभाल करण्याचा सल्ला दिला. त्यांनी शेतकऱ्यांना
शुभेच्छा देत कार्यक्रमाचे कौतुक केले.
कार्यक्रमाच्या यशस्वी आयोजनासाठी विस्तार शिक्षण संचालक डॉ.
राकेश अहिरे यांचे मार्गदर्शन लाभले. प्रमुख विस्तार शिक्षण अधिकारी डॉ. प्रशांत
देशमुख यांनी कार्यक्रमाचे प्रभावी समन्वयन करत पुढील १८ मे रोजी विद्यापीठाच्या
वर्धापन दिनानिमित्त आयोजित खरीप मेळाव्याची माहिती दिली. या मेळाव्यात आधुनिक
तंत्रज्ञान प्रदर्शन व परिसंवादाचे आयोजन करण्यात येणार असून शेतकऱ्यांनी मोठ्या
संख्येने सहभागी व्हावे,
असे आवाहन त्यांनी केले.
कीटकशास्त्र विभाग प्रमुख डॉ. पुरुषोत्तम नेहरकर यांनी
मधुमक्षिका पालनविषयी माहिती दिली, तर हवामान तज्ञ डॉ. कैलास डाखोरे
यांनी येणाऱ्या मान्सूनच्या हंगामी अंदाजाबाबत माहिती दिली. तसेच आगामी आठवड्यातील
हवामानाचा सविस्तर अंदाज देत शेतीच्या कामाचे नियोजन कसे करावे याचे मार्गदर्शन
केले.
विस्तार कृषि विद्यावेत्ता प्रा. अरुण गुट्टे यांनी खरीप
हंगामपूर्व तयारीवर सखोल मार्गदर्शन करत जमिनीची मशागत, ट्रायकोडर्मासारख्या
उपयुक्त बुरशींचा वापर, बीजप्रक्रिया, पिकांची
फेरपालट आणि सुधारित वाणांची निवड यावर भर दिला.
या कार्यक्रमात शेतकऱ्यांनी मोठ्या संख्येने सहभाग घेत आंबा घन
लागवड, हळद लागवड, खरीपपूर्व समस्यांबाबत प्रश्न उपस्थित
केले. यावर विद्यापीठाचे तज्ज्ञ डॉ. लक्ष्मणराव जावळे, डॉ.
विश्वनाथ खंदारे, डॉ. सूर्यकांत पवार, डॉ.
गजानन गडदे, डॉ. अरुण गुट्टे, डॉ.
कैलास डाखोरे आणि डॉ. नेहरकर यांनी समाधानकारक उत्तरे दिली. कार्यक्रमाचे
सूत्रसंचालन प्रा. अरुण गुट्टे यांनी केले तर आभार प्रदर्शन डॉ. पुरुषोत्तम नेहरकर
यांनी मानले.
