वनामकृविच्या नाहेप-डीएफएसआरडीए केंद्रास माननीय श्री. परिमल सिंह यांची सदिच्छा भेट

 

वसंतराव नाईक मराठवाडा कृषि विद्यापीठाच्या नाहेपअंतर्गत डीएफएसआरडीए केंद्रास नानाजी देशमुख कृषि संजीवनी प्रकल्पाचे प्रकल्प संचालक माननीय श्री. परिमल सिंह (भा.प्र.से.) यांनी दिनांक ३० एप्रिल रोजी सदिच्छा भेट दिली.

या प्रसंगी हवामान आधारित सेंसर प्रणालीच्या पार्श्वभूमीवर, भारतीय पिक पद्धतीनुसार शेतकऱ्यांना परवडणारी, स्वस्त व उच्च प्रतीची तंत्रज्ञाने विकसित करून ती नव लघुउद्योजकांना कराराद्वारे उपलब्ध करून देण्याचा सल्ला त्यांनी दिला. तसेच एग्री-बॉट, एग्री-ड्रोन, एग्री-एजीवी आणि एग्री-एआय प्रयोगशाळांना भेट देत, डीएफएसआरडीए केंद्राचे प्रमुख अन्वेषक डॉ. गोपाल शिंदे यांच्याशी विविध अभ्यासक्रम आणि प्रशिक्षण कार्यक्रमांबाबत सविस्तर चर्चा केली.

डॉ. शिंदे यांनी ग्राफ्टिंग रोबोट व ३-डी प्रिंटरसारख्या अत्याधुनिक साधनांचा वापर करून तंतोतंत व डिजिटल शेती कशी विकसित करता येईल याविषयी सादरीकरण केले.

या भेटीदरम्यान विद्यापीठाचे शिक्षण संचालक डॉ. भगवान आसेवार आणि विस्तार शिक्षण संचालक डॉ. राकेश अहिरे यांनी विद्यापीठस्तरीय वार्षिक व आकस्मिक उपक्रम रचनेबाबत मार्गदर्शन घेतले.

नानाजी देशमुख कृषि संजीवनी प्रकल्पाचे मृद विज्ञान तंत्रज्ञ श्री. विजय कोळेकर, विद्यापीठाचे डॉ. प्रवीण कापसे व अन्य मान्यवर यावेळी उपस्थित होते.

भेटीनंतर माननीय श्री. परिमल सिंह यांची विशेष मुलाखत नाहेप केंद्राच्या डिजिटल स्टुडिओमध्ये प्रमुख डॉ. प्रवीण कापसे यांनी घेतली. या मुलाखतीतून त्यांनी शेतकऱ्यांपर्यंत नवीन तंत्रज्ञाने पोहचविण्याबाबत सूचना व मार्गदर्शन केले.

या संपूर्ण भेटी दरम्यान तांत्रिक सहायक श्री. जगदीश माने, श्री. नितीन शहाणे आणि श्री. दीपक समिंद्रे यांनी परिश्रम घेतले.

माननीय श्री. परिमल सिंह यांच्या मुलाखतीची लिंक - https://youtu.be/1naeTivTNiA