परभणी जिल्ह्यात दर्पण दिन साजरा : ज्येष्ठ पत्रकारांचा गौरव
भारताची लोकशाही जगातील सर्वोत्कृष्ट लोकशाही -कुलगुरू मा. प्रा. (डॉ.) इन्द्र मणि
परभणी जिल्हा मराठी पत्रकार संघ आणि शारदा महाविद्यालय यांच्या संयुक्त विद्यमाने दर्पण दिन व ज्येष्ठ पत्रकारांचा सत्कार समारंभ शारदा महाविद्यालयात मोठ्या उत्साहात दिनांक ६ जानेवारी रोजी साजरा करण्यात आला. कार्यक्रमाचे उद्घाटन वसंतराव नाईक मराठवाडा कृषी विद्यापीठाचे कुलगुरू डॉ. इन्द्र मणि यांच्या हस्ते करण्यात आले.
कार्यक्रमाच्या अध्यक्षस्थानी ज्येष्ठ साहित्यिक व पत्रकार डॉ. आसाराम लोमटे होते, तर प्रमुख पाहुणे म्हणून जिल्ह्याचे पोलीस अधीक्षक श्री रविंद्र सिंह परदेशी, प्राचार्य डॉ. बबन पवार, मराठी पत्रकार परिषदेचे सरचिटणीस प्रा. सुरेश नाईकवाडे व सामाजिक कार्यकर्ते भारत नांदुरे आदींची उपस्थिती होती.
माननीय कुलगुरू डॉ. इन्द्र मणि यांनी आपल्या भाषणात पत्रकारितेचे समाजघडणीत महत्त्व विशद केले. पुढे ते म्हणाले की, भारताचं नाव हे जगाच्या पटलावर जेव्हा येते, तेव्हा इतर देशातील लोकांना आपल्या भारत देशाचा अभिमान वाटतो भारतातील लोकशाही ही आज जगात सर्वोत्कृष्ट लोकशाही आहे, त्यामुळे भारतातील लोकांना इतर देशांमध्ये आदराचे स्थान आहे. या लोकशाहीला टिकविण्याचं काम भारताचा चौथा स्तंभ पत्रकार ही उल्लेखनीय भूमिका निभावत असतात. पत्रकार लोकशाहीच्या चौथ्या स्तंभाला बळकटी देत असून, जनतेच्या प्रश्नांना आवाज देण्याचे महत्त्वाचे कार्य पार पाडतात असे नमूद करून त्यांनी सत्कारमूर्ती आणि जिल्ह्यातील सर्व पत्रकारांचे अभिनंदन करून त्यांना शुभेच्छा दिल्या.
कार्यक्रमात ज्येष्ठ पत्रकारांचा विशेष सत्कार करण्यात आला. यावेळी मान्यवरांनी पत्रकारितेच्या विविध पैलूंवर आपले विचार मांडले. पत्रकार संघ व शारदा महाविद्यालयाने संयुक्तपणे हा कार्यक्रम यशस्वी केल्याबद्दल उपस्थितांनी कौतुक केले. कार्यक्रमाचे संयोजन परभणी जिल्हा मराठी पत्रकार संघाने केले असून, हा दिवस परभणी जिल्ह्यातील पत्रकारिता क्षेत्रासाठी प्रेरणादायी ठरला.
