‘रंगमंच उत्सव २०२५’ उत्साहात साजरा – विद्यार्थ्यांच्या कलागुणांना मिळाली नवी दिशा!

 ‘रंगमंच’च्या माध्यमातून विद्यार्थ्यांच्या सुप्त कलागुणांना वाव... माननीय कुलगुरू प्रा. (डॉ.) इन्द्र मणि

वसंतराव नाईक मराठवाडा कृषि विद्यापीठाच्या गोळेगाव येथील कृषी महाविद्यालयात दिनांक २५ मार्च रोजी ‘रंगमंच उत्सव २०२५’ हा वार्षिक सांस्कृतिक महोत्सव मोठ्या उत्साहात आणि जल्लोषात पार पडला. या बहारदार सोहळ्याचे अध्यक्षस्थान विद्यापीठाचे माननीय कुलगुरू प्रा. (डॉ.) इन्द्र मणि यांनी भूषवले. कार्यक्रमाचे आयोजन सहयोगी अधिष्ठाता डॉ. वासुदेव नारखेडे यांच्या मार्गदर्शनाखाली करण्यात आले.

अध्यक्षीय भाषणात माननीय कुलगुरू प्रा. (डॉ.) इन्द्र मणि यांनी विद्यार्थ्यांच्या शैक्षणिक वाटचालीतील आव्हाने आणि जीवनावश्यक कौशल्ये यावर मार्मिक विचार मांडले. त्यांनी ‘रंगमंच’च्या माध्यमातून विद्यार्थ्यांना त्यांच्या सुप्त कलागुणांना वाव देण्याचे महत्त्व अधोरेखित केले. असे सांस्कृतिक उपक्रम विद्यार्थ्यांच्या सर्वांगीण विकासात महत्त्वाची भूमिका बजावतात, असे त्यांनी सांगितले.

कार्यक्रमाचे प्रास्ताविक सहयोगी अधिष्ठाता डॉ. वासुदेव नारखेडे यांनी केले. या कार्यक्रमात विद्यार्थ्यांनी विविध नाटके, नृत्य, संगीत आणि कलाकृतींचे प्रभावी सादरीकरण केले. विशेषत: सामाजिक संदेश देणाऱ्या नाट्यप्रस्तुतींनी प्रेक्षकांना अंतर्मुख केले, तर रंगतदार नृत्याविष्कारांनी उपस्थितांना मंत्रमुग्ध केले. हा सांस्कृतिक सोहळा विद्यार्थ्यांच्या उत्स्फूर्त सहभागाने अधिक रंगतदार झाला.

कार्यक्रमाचे सूत्रसंचालन स्वप्नील चिलगर आणि रेणू डोंगरे यांनी अतिशय कुशलतेणे आणि प्रभावीपणे पार पाडले. तसेच, या कार्यक्रमाला जिमखाना उपाध्यक्ष डॉ. पी.के. राठोड, राष्ट्रीय सेवा योजनेचे कार्यक्रम अधिकारी डॉ. आर.व्ही. भालेराव, डॉ. सारंग डी.एच., डॉ. सुभाष ठोंबरे, डॉ. संजय पवार यांच्यासह महाविद्यालयातील शिक्षक, कर्मचारी आणि विद्यार्थी मोठ्या संख्येने उपस्थित होते.

या भव्य आयोजनासाठी आठव्या सत्रातील विद्यार्थ्यांनी विशेष परिश्रम घेतले. त्यांच्या अथक मेहनतीमुळे हा कार्यक्रम अत्यंत यशस्वी ठरला. ‘रंगमंच उत्सव २०२५’ने संपूर्ण महाविद्यालयात आनंद आणि उत्साहाची लहर निर्माण केली, तसेच विद्यार्थ्यांच्या कलागुणांना एक नवीन दिशा दिली.