उद्यानविद्या महाविद्यालायाच्या प्रथम वर्षातील विद्यार्थ्यांचा स्वागत समारंभ

 विद्यार्थ्यांनी शिक्षणासोबतच नैतिक मूल्यांचा आदर करावा....कुलगुरू मा. डॉ. इन्द्र मणि

वसंतराव नाईक मराठवाडा कृषि विद्यापीठातील उद्यानविद्या महाविद्यालयात दि. ५ ऑक्टोबर रोजी प्रथम वर्षाच्या पदवीच्या विद्यार्थ्यांसाठी स्वागत समारंभाचे आयोजन करण्यात आले. कार्यक्रमाच्या अध्यक्षस्थानी विद्यापीठाचे कुलगुरू मा. डॉ. इन्द्र मणि हे होते, तर विशेष अतिथी म्हणून शिक्षण संचालक डॉ. उदय खोडके आणि कुलसचिव श्री. संतोष वेणीकर हे होते.

अध्यक्षीय भाषणात कुलगुरू मा. डॉ. इन्द्र मणि यांनी विद्यार्थ्यांना उद्यानविद्या पदवीच्या माध्यमातून भविष्यातील रोजगार आणि स्वयंरोजगाराच्या अनेक क्षेत्रात संधीं आहेत. या संधी मिळविण्यासाठी विद्यार्थ्यांनी शिक्षणासोबतच नैतिक मूल्यांचा आदर करत स्वतःच्या सर्वांगीण विकासावर भर द्यावा असे नमूद केले. यावेळी त्यांनी  “काक चेष्टा बको ध्यानं, श्वान निद्रा तथैव च। अल्पहारी गृह त्यागी, विद्यार्थी पंच लक्षणं॥” या संस्कृत सुभाषिताद्वारे  विद्यार्थ्यांना शिक्षणातील शिस्तीचे महत्त्व विशद केले.

विशेष अतिथी शिक्षण संचालक डॉ. उदय खोडके यांनी नवीन शैक्षणिक धोरण २०२० बद्दल मार्गदर्शन केले, तर कुलसचिव डॉ. संतोष वेणीकर यांनी उद्यानविद्या विभागाद्वारे उद्योगाच्या भरपूर संधी आहेत. म्हणून विद्यार्थ्यांनी स्वतःचा उद्योग उभारून उद्योजक व्हावे. याबरोबरच उद्यानविद्या पदवी अभ्यासक्रमातून मिळालेल्या ज्ञानाचा शेतीमध्ये अवलंब करून प्रगतशील बागायतदार होण्याचे आवाहन केले.

प्रास्ताविकात सहयोगी अधिष्ठाता डॉ. खंदारे यांनी उद्यानविद्या महाविद्यालयातील यशस्वी विद्यार्थ्यांची माहिती दिली तसेच इतर कार्याचा अहवाल सादर केला. विद्यार्थ्यांनी विविध सांस्कृतिक कार्यक्रम सादर करून समारंभाला उत्साहपूर्ण रंगत आणली. सूत्रसंचालन कु. साक्षी कल्याणकर आणि अक्षद केंद्रे यांनी केले, तर आभार डॉ. अंशुल लोहकरे यांनी केले.

कार्यक्रमाचे आयोजनासाठी  डॉ. बी. एम. कलालबंडी, डॉ. वैशाली भगत, डॉ. श्रुती वानखेडे, डॉ. सचिन पव्हणे आणि द्वितीय वर्षातील विद्यार्थ्यांचे विशेष परिश्रम घेतले.

शेतकऱ्यांच्या यशोगाथा त्यांच्याच मुखातून ऐकण्याची संधी... कुलगुरू मा. डॉ. इन्द्र मणि

 ऑनलाइन शेतकरी शास्त्रज्ञ संवादास उत्स्फूर्त प्रतिसाद

वसंतराव नाईक मराठवाडा कृषि विद्यापीठाच्या शास्त्रज्ञाद्वारे रबी हंगामातील ज्वारी आणि हरभरा या पिकांच्या वाणांची निवड, पेरणी पद्धती, पेरणीची वेळ याबद्दलच्या पेरणीपूर्व नियोजनाची अचूक माहिती देण्यात येत असून शेतकऱ्यांचे उत्पादन वाढीसाठी नक्कीच लाभ मिळेल असे प्रतिपादन कुलगुरू  मा. डॉ. इन्द्र मणि यांनी केले. ते दिनांक ४ ऑक्टोबर रोजी वसंतराव नाईक मराठवाडा कृषि विद्यापीठाच्या विस्तार शिक्षण संचालनालय व कृषि विभाग महाराष्ट्र शासन यांच्या संयुक्त विद्यमाने कीटकशास्त्र विभागातील क्रॉपसॅप प्रकल्प अंतर्गत ऑनलाईन शेतकरी शास्त्रज्ञ कृषि संवादाच्या चौदाव्या भागात अध्यक्षस्थानावरून बोलत होते. माननीय  कुलगुरू यांनी ऑनलाइन शेतकरी शास्त्रज्ञ संवादास उत्स्फूर्त प्रतिसाद मिळत असल्यामुळे आयोजकांचे अभिनंदन करून समाधान व्यक्त केले. भविष्यात या कार्यक्रमात ५०० हून अधिक शेतकरी बंधू भगिनी सहभागी व्हावेत अशी आशा व्यक्त केली. त्या दृष्टीने शेतकऱ्यांना आवश्यकतेनुसार आणि वेळेनुसार मार्गदर्शनाचे नियोजन करण्यात येईल. तसेच प्रश्न – उत्तरावर अधिकचा भर देण्यात येईल. शेतकरी बंधू-भगिनींनी ही आपल्या मित्र परिवारास या कार्यक्रमाचा माहिती देऊन विस्तार कार्यात सहभागी व्हावे असे आवाहन केले. ऑनलाईन कार्यक्रमांमध्ये यशस्वी शेतकऱ्याने अवलंबलेल्या चांगल्या शेतीतंत्रज्ञानाबद्दल त्यांचे मार्गदर्शन ठेवण्यात येईल. त्यांची यशोगाथा त्यांच्याच मुखातून ऐकण्याची संधी उपलब्ध करून दिली जाईल, असेही याप्रसंगी त्यांनी नमूद केले.

प्रास्ताविकात विस्तार शिक्षण संचालक डॉ. भगवान आसेवार यांनी कार्यक्रमाचे महत्व विशद करून जास्तीत जास्त शेतकरी बांधवांनी उपस्थित राहण्याचे आवाहन केले.

तांत्रिक सत्रात हवामान शास्त्रज्ञ डॉ. कैलास डाखोरे यांनी येणाऱ्या आठवड्याचा हवामानाचा अंदाज सांगून शेतीमध्ये करावयाची कामाचे नियोजनाबद्दल मार्गदर्शन केले. कृषी विद्यावेत्ता प्रा. अरुण गुट्टे यांनी हरभरा लागवडीचे तंत्रज्ञान सांगताना हरभरा पिकाची उत्पादकता वाढविण्यासाठीची वाणाची निवड, जमिनीची निवड, बीजप्रक्रिया, पाणी व्यवस्थापन, खत व्यवस्थापन, गादी वाफ्यावरील लागवड या पंचसूत्रीबद्दल तसेच हरभरा पिकाची मर रोगाचे नियंत्रण याबद्दल माहिती दिली. तर डॉ. प्रीतम भुतडा यांनी ज्वार लागवड तंत्रज्ञानाबाबत मार्गदर्शन केले.

सूत्रसंचालन आणि आभार डॉ. अनंत लाड यांनी केले. मराठवाड्यातील आठही जिल्ह्यासह महाराष्ट्राच्या इतर जिल्ह्यातून २०० हून अधिक शेतकऱ्यांनी यावेळी उत्स्फूर्त प्रतिसाद नोंदवला. कार्यक्रमात शेतकऱ्यांनी विचारलेल्या विविध प्रश्नाना विद्यापीठाचे शास्त्रज्ञांनी आणि कृषी विभागाच्या अधिकाऱ्यांनी समाधानकारक उत्तरे दिली.

विद्या, धन आणि शक्ती यांचा उपयोग समाज कल्याणासाठी व्हावा - कुलगुरू मा. डॉ. इन्द्र मणि यांचे कृषि पदवी विद्यार्थ्यांना मार्गदर्शन

 वनामकृविच्या छत्रपती संभाजीनगर येथील कृषि महाविद्यालयाचा दीक्षारंभ समारंभ संपन्न

जगाचा आणि आपल्या देशाचा विचार करता, अंतराळ विज्ञान आणि कृषि विज्ञान या दोन्ही क्षेत्रांना अनन्यसाधारण महत्त्व आहे. विद्यार्थी जीवनात विद्यार्थ्यांनी विज्ञानवादी दृष्टीकोन बाळगणे गरजेचे आहे. जेव्हा ज्ञानाच्या माध्यमातून विद्या, धन आणि शक्ती प्राप्त होईल, तेव्हा त्यांचा उपयोग समाजकल्याणासाठी केला गेला पाहिजे. अशा विचारसरणीमुळेच मानवी जीवन खऱ्या अर्थाने कृतार्थ होते, असे मत वसंतराव नाईक मराठवाडा कृषि विद्यापीठ, परभणीचे कुलगुरू मा. डॉ. इन्द्र मणि यांनी व्यक्त केले. वसंतराव नाईक मराठवाडा कृषि विद्यापीठांतर्गत छत्रपती संभाजीनगर येथे नव्याने सुरू झालेल्या कृषि महाविद्यालयातील शैक्षणिक वर्ष २०२४-२५ मध्ये प्रथम वर्षात प्रवेशित विद्यार्थ्यांसाठी दिनांक ४ ऑक्टोबर रोजी आयोजित दीक्षारंभ समारंभात मार्गदर्शन करताना कुलगुरू महोदयांनी वरील विचार मांडले. कुलगुरू महोदय पुढे म्हणाले, छत्रपती संभाजीनगर जिल्ह्यात एक शासकीय कृषि महाविद्यालय असावे अशी मनापासून इच्छा होती. हा जिल्हा आणि शहर राज्यातील महत्त्वाचे असून, शासन आणि विद्यापीठाच्या प्रयत्नांतून हे महाविद्यालय सुरू झाले, याचा अत्यंत आनंद आहे. याच महाविद्यालयातील विद्यार्थ्यांना मार्गदर्शन करताना प्रसन्नता वाटते, असे प्रतिपादन केले.

प्रास्ताविकात सहयोगी अधिष्ठाता डॉ. सूर्यकांत पवार म्हणाले की, नवीन शैक्षणिक धोरणानुसार विद्यार्थ्यांची जिज्ञासू गुण विकसित झाली पाहिजे, तसेच त्यांच्या मनावर ताण येवू नये यासाठी प्रवेश घेतल्यानंतर दीक्षारंभ कार्यक्रमात सुरुवातीचे १५ दिवस विविध क्षेत्रातील तज्ञांच्या मार्गदर्शनाखाली ज्ञानदान कार्य पार पडले असे नमूद केले. या प्रसंगी कृषि विज्ञान केंद्राचे कार्यक्रम समन्वयक डॉ. किशोर झाडे, शास्त्रज्ञ डॉ. सी. बी. पाटील, डॉ. बाळासाहेब अंधारे आदींची  उपस्थिती होती.

मागील पंधरा दिवसांत विविध विषयांचे प्राध्यापक आणि बाह्य तज्ञांनी दिलेल्या मार्गदर्शनामुळे आम्हाला महाविद्यालयाशी जवळीक साधता आली, असे मनोगत शैक्षणिक वर्ष २०२४-२५ मध्ये प्रथम वर्षात प्रवेशित दोन विद्यार्थ्यांनी कुलगुरू महोदयांसमोर व्यक्त केले. कार्यक्रमाचे सूत्रसंचालन आणि आभार डॉ. सुरेखा कदम यांनी केले.

वनामकृवितील कृषि महाविद्यालयात स्वच्छता मोहीम उत्साहात साजरी

 

परभणी: वसंतराव नाईक मराठवाडा कृषि विद्यापीठातील कृषि महाविद्यालयाच्या परभणीमध्ये राष्ट्रीय सेवा योजने अंतर्गत दिनांक २ ऑक्टोबर रोजी राष्ट्रपिता महात्मा गांधी यांच्या जयंतीनिमित्त विविध कार्यक्रम घेऊन स्वभाव स्वच्छता, संस्कार स्वच्छता आणि स्वच्छ भारत दिन मोठ्या उत्साहात साजरा करण्यात आला. या निमित्ताने महाविद्यालय परिसरात स्वच्छता अभियान राबवण्यात आले, ज्यात राष्ट्रीय सेवा योजनेचे स्वयंसेवक, अधिकारी आणि कर्मचारी मोठ्या संख्येने सहभागी झाले.

कार्यक्रमात, माननीय कुलगुरू डॉ. इन्द्र मणि यांनी दूरभाष्य प्रणालीद्वारे स्वच्छता अभियानात सहभागी स्वयंसेवकांना मार्गदर्शन केले. त्यांनी गांधीजींच्या विचारांची आठवण करून देत, स्वच्छता हे एक दिवसाचे कार्य न ठरवता, नेहमीच ते पुढे नेण्याचे आवाहन केले. त्यांनी स्वच्छ परिसर, स्वच्छ मन आणि स्वच्छ पर्यावरण याचे महत्त्व अधोरेखित केले.

स्वच्छता अभियानात महाविद्यालयाचे शिक्षण संचालक डॉ. उदय खोडके, विस्तार शिक्षण संचालक डॉ. भगवान आसेवार आणि प्राचार्य डॉ. सय्यद इस्माईल यांनीही सहभाग घेतला. त्यांनी स्वच्छतेचे संदेश देत विद्यार्थ्यांना आणि स्वयंसेवकांना प्रेरित केले. या अभियानात महाविद्यालयातील १०० राष्ट्रीय सेवा योजना स्वयंसेवकांनी श्रमदान केले.

स्वच्छता मोहिमेनंतर महाविद्यालयाच्या सभागृहात महात्मा गांधी आणि लाल बहादूर शास्त्री यांच्या प्रतिमांना पुष्पहार अर्पण करून पूजन करण्यात आले. त्यानंतर विद्यार्थ्यांनी "स्वच्छ भारत का इरादा" या नाटिकेची सादरीकरण केले, ज्यात शुभांगी राऊत, श्रुती येरावाड, श्वेता दुधाटे, वैष्णवी पाटील, अर्पिता जाधव आणि दीक्षा त्रिभुवन यांचा सहभाग होता. कार्यक्रमाच्या शेवटी विद्यार्थ्यांनी विविध गांधीवादी विचारांवर भाषण सादर केली, ज्यात कृष्णकांत पोरडत, दिनेश काळे, सिद्धी शिंदे, तृप्ती कुमारी, तनुश्री, आणि ऐश्वर्या पवार यांनी महत्त्वाचे विचार मांडले. वर्षा महानंदीया यांनी "एकला चलो रे" हे बंगाली गीत सादर करून उपस्थितांना गांधीजींच्या विचारांनी प्रेरित केले. कार्यक्रम यशस्वी करण्यासाठी महाविद्यालयाचे प्राचार्य डॉ. सय्यद इस्माईल यांच्या मार्गदर्शनाखाली डॉ. भाग्यरेषा गजभिये आणि प्रा. संजय पवार यांनी विशेष परिश्रम घेतले. कार्यक्रमात महाविद्यालयातील अधिकारी, कर्मचारी आणि विद्यार्थी मोठ्या संख्येने सहभागी झाले होते.

वनामकृविच्या अन्नतंत्र महाविद्यालयात दीक्षारंभ कार्यक्रम आणि विद्यार्थी-पालक-शिक्षक मेळावा संपन्न

 ध्येयनिश्चिती करून उज्वल भविष्य घडवावे… कुलगुरू मा डॉ. इन्द्र मणि

वसंतराव नाईक मराठवाडा कृषि विद्यापीठ अंतर्गत अन्नतंत्र महाविद्यालयात नवीन शैक्षणिक धोरणानुसार दिनांक ३० सप्टेंबर रोजी बी. टेक. अन्नतंत्र प्रथम वर्षात नवीन प्रवेशित विद्यार्थ्यांसाठी दीक्षारंभ कार्यक्रम आणि विद्यार्थी-पालक-शिक्षक मेळाव्याचे आयोजन केले होते. अध्यक्षस्थानी कुलगुरू मा डॉ. इन्द्र मणि तर प्रमुख पाहुणे म्हणून शिक्षण संचालक डॉ.उदय खोडके हे होते.

अध्यक्षीय भाषणात कुलगुरू मा डॉ. इन्द्र मणि यांनी उपस्थित पालकांचे त्यांच्या पाल्याने अन्नतंत्र महाविद्यालयामध्ये प्रवेश घेतल्याबद्दल अभिनंदन केले. त्यांनी पूर्वीच्या काळातील संस्कृत सुभाषिकामध्ये नमूद केल्याप्रमाणे विद्यार्थ्यांसाठी “काक चेष्टा बको ध्यानं, श्वान निद्रा तथैव च । अल्पहारी गृह त्यागी, विद्यार्थी पंच लक्षणं॥“ या गुणांबद्दल मार्गदर्शन केले. नवीन शैक्षणिक प्रणाली अभ्यासक्रमासाठी ही पहिली बॅच असून, याद्वारे अभ्यासक्रमात विद्यार्थ्यांना ज्ञान आणि कौशल्य विकासाठी मोठी संधी मिळणार आहे. या महाविद्यालयांमध्ये केंद्रशासन पुरस्कृत सामायिक सुविधा केंद्रही आहे. यामुळे हे विद्यार्थी भाग्यवान आहेत. विद्यार्थ्यांनी ध्येयनिश्चित करून, त्या दृष्टीने अभ्यास व कृती करावी आणि आपले उज्वल भविष्य घडवावे असे प्रतिपादन केले.

शिक्षण संचालक डॉ.उदय खोडके म्हणाले की, यासाठी नवीन शैक्षणिक धोरण विद्यार्थ्यांना लाभदायक ठरणार आहे. अन्न तंत्र शाखेमधिल रोजगार व उद्योगासाठीच्या संधीबद्दल मार्गदर्शन करून औद्योगिक क्षेत्रातील महत्त्व विशद केले.

सहयोगी अधिष्ठाता डॉ. आर बी क्षीरसागर यांनी प्रास्ताविकात नवीन प्रवेशित विद्यार्थ्यांसाठी दीक्षारंभ कार्यक्रमाचे महत्व विशद केले. नवीन शैक्षणिक प्रणालीचा विद्यार्थ्यांना मिळणारा लाभ याची माहिती दिली. विद्यार्थ्यांनी अभ्यासासोबतच म्म्हाविद्यालायाच्या इतर शैक्षणिक उपक्रमांमध्ये देखील हिरीरीने भाग घ्यावा असे सुचविले.

पालकांमध्ये प्रतिनिधिक स्वरूपात श्रीमती खळीकर यांनी आणि विद्यार्थ्यांमधून कुमारी गायत्री शिंदे हिने महाविद्यालय आणि महाविद्यालयामध्ये प्रवेश घेतल्यानंतरचे अनुभव सांगितले. याप्रसंगी महाविद्यालयातील डॉ. हेमंत देशपांडे, डॉ. के एस गाडे, डॉ. व्ही डी सुर्वे, डॉ. एस के सदावर्ते, डॉ. जी एम माचेवाड, डॉ. अनुप्रिता जोशी, डॉ. एस एम सोनकांबळे, डॉ.चंद्रलेखा भोकरे आणि शिक्षण सहयोगी डॉ. प्रीती ठाकूर, डॉ. गोविंद देसाई, डॉ. नरेंद्र देशमुख, डॉ. सय्यद जुबेर, डॉ. मोहम्मद निसार आदींची उपस्थिती होती.

सूत्रसंचालन साक्षी पाठक आणि आयुष जीभकाटे यांनी तर आभार साक्षी तिखे यांनी मानले. कार्यक्रमाचे आयोजन महाविद्यालयातील पाचव्या सत्रातील विद्यार्थ्यांनी केले.

वनामकृवित स्वभाव स्वच्छता, संस्कार स्वच्छता आणि स्वच्छ भारत दिन साजरा

 सर्वांनी आपले मन स्वच्छ, विचार स्वच्छ आणि कार्य स्वच्छ ठेवावे.... कुलगुरू मा. डॉ. इन्द्र मणि

वसंतराव नाईक मराठवाडा कृषी विद्यापीठात स्वच्छता ही सेवा २०२४ अंतर्गत “स्वभाव स्वच्छता, संस्कार स्वच्छता आणि स्वच्छ भारत दिन” दिनांक २ ऑक्टोबर रोजी राष्ट्रपिता महात्मा गांधी यांच्या जयंतीदिनी विविध कार्यक्रमाद्वारे साजरा केला. यानिमित्त विद्यापीठाच्या शिक्षण संचालनालयाद्वारे राष्ट्रीय सेवा योजने अंतर्गत कृषी महाविद्यालय, उद्यानविद्या  महाविद्यालय, सामुदायिक विज्ञान महाविद्यालय, अन्नतंत्र महाविद्यालय, कृषी अभियांत्रिकी आणि तंत्रज्ञान महाविद्यालय येथे तर विस्तार शिक्षण संचालनालयाच्या वतीने कृषी तंत्रज्ञान माहिती केंद्र आणि शेतकरी भवन येथे तसेच इतर कार्यालयात स्वच्छता मोहीम राबविण्यात आली.

मार्गदर्शनात कुलगुरू मा. डॉ. इन्द्र मणि म्हणाले की, स्वच्छ परिसर, स्वच्छ पर्यावरण, स्वच्छ समाज असावा, यासाठी राष्ट्रपिता महात्मा गांधीजी आग्रही होते. यावर्षी स्वच्छता मोहीमेसाठीच्या स्वच्छता ही सेवा २०२४ अंतर्गत “स्वभाव स्वच्छता, संस्कार स्वच्छता” थीमनुसार मनाची स्वच्छता, विचारांची स्वच्छता आणि कार्याची स्वच्छता हे सर्वात महत्त्वाचे आहे. याचे भविष्यात नक्कीच चांगले परिणाम दिसून येतील. गांधीजी स्वतः सर्वात घाणीच्या ठिकाणी जाऊन स्वच्छता करत आणि स्वच्छतेचे महत्व पटवून देत. गांधीजींच्या विचारानुसार विचार स्वच्छ असतील तर कार्य स्वच्छ होते आणि यातून समाज चांगला बनतो. म्हणून स्वच्छतेचे कार्य हे केवळ एक तास किंवा एक दिवसा पुरता न ठेवता कायमस्वरूपी सुरू ठेवावे असे आवाहन यावेळी त्यांनी केले. याबरोबरच गांधीजींचा अहिंसेचा विचार देखील महत्त्वाचा आहे. आपल्या मनात हिंसा येत असेल तर आपण एकही चांगले कार्य करू शकत नाही. म्हणून विचार अहिंसायुक्त स्वच्छ ठेवावे. आपल्या अधिकारासाठी अहिंसायुक्त कार्य करावे. आपल्याला होणाऱ्या त्रासासाठी आपण एखाद्या विरुद्ध हिंसा ने प्रतिकार करतो, यावेळी आपली ताकत अर्धी होते, परंतु अहिंसेने प्रतिकार करताना आपली दुप्पट ताकत येते. भारताद्वारे संपूर्ण जगाला अहिंसेचे पुजारी, शांतीचे दूत राष्ट्रपिता महात्मा गांधी यांच्या शांततेचा संदेश दिला जात आहे. सर्वांनी आपले मन स्वच्छ, विचार स्वच्छ आणि कार्य स्वच्छ ठेवावे. दुसऱ्याविषयी मनात कटुता ठेवू नये. हा गांधीजींचा विचार, त्यांचे मानस मुलगा आणि मुलगी बनून पुढे घेवून जावू. गांधीजींचे विचार निरंतर पुढे चालू ठेवून समाजात शांतीद्वारे एकजुटीने कार्य करून समाज कल्याण साधू असे प्रतिपादन केले.

शिक्षण संचालक डॉ. उदय खोडके यांनी प्लास्टिक मुळे स्वच्छतेच्या अनेक समस्या उद्भवतात. याकरिता प्लास्टिकचा वापर टाळावा तसेच त्याची योग्य विल्हेवाट लावावी. आपला परिसर प्लास्टिक मुक्त ठेवावा. याबरोबरच महात्मा गांधीजी यांच्या स्वच्छतेचा आणि अहिंसेचा विचार मनात रुजवून स्वभावातच स्वच्छता ठेवावी असे नमूद केले.

विस्तार शिक्षण संचालक डॉ भगवान आसेवर यांनी अस्वच्छतेमुळे पर्यावरणाचा ऱ्हास होतो तसेच पर्यावरणामध्ये अनेक प्रकारचे विषारी वायू निर्माण होतात. याचा जीवित तसेच वनस्पतीच्या आरोग्यावर विपरीत परिणाम होतो. म्हणून आपला परिसर स्वच्छ ठेवावा. याबरोबरच गांधीजींचे स्वच्छतेचे गुण अंगी करावेत असे प्रतिपादन केले

कार्यक्रमात शिक्षण संचालक डॉ. उदय खोडके, विस्तार शिक्षण संचालक डॉ भगवान आसेवर, सहयोगी अधिष्ठाता डॉ. सय्यद इस्माईल, डॉ. जया बंगाळे, डॉ. आर बी क्षीरसागर, डॉ. विश्वनाथ खंदारे, डॉ. राजेश कदम, विद्यार्थी कल्याण अधिकारी डॉ. पी आर झंवर यांच्यासह विविध विभागाचे प्रमुख, प्राध्यापक, अधिकारी, कर्मचारी आणि विद्यार्थी बहुसंख्येने सहभागी झाले. कार्यक्रमा दरम्यान विविध महाविद्यालयाच्या विद्यार्थ्यांनी भित्तीपत्रके, प्रभात फेऱ्या, पथनाट्य, निबंध स्पर्धा, व्हिडिओ क्लिप बनवणे, निबंध, भाषण अश्या विविध स्पर्धा मध्ये सहभागी होऊन विद्यापीठ परिसरात स्वच्छतेचे संदेश देवून स्वच्छतेचे कार्य केले. कार्यक्रम यशस्वीतेसाठी रासेयोचे कार्यक्रमाधिकारी प्रा. संजय पवार, डॉ. भाग्यरेषा गजभिये, डॉ. रवी शिंदे, डॉ. प्रवीण घाडगे,  डॉ. विद्यानंद मनवर, जिमखाना उपाध्यक्षा डॉ. वैशाली भगत आदींच्या मार्गदर्शनाखाली स्वयंसेवकांनी परिश्रम घेतले.

वनामकृविच्या नांदेड येथील कृषि महाविद्यालयाचा दीक्षारंभ समारंभ संपन्न

 शिस्तप्रिय आणि चारित्र्यवान होवून जीवनात उत्कर्ष साधावा...कुलगुरु मा.डॉ.इन्द्र मणि

वसंतराव नाईक मराठवाडा कृषि विद्यापीठाने शिक्षण, संशोधन आणि विस्तार कार्यात भरीव योगदान दिलेले असून सक्षम मनुष्यबळ विकास साधला आहे, असे प्रतिपादन कुलगुरु मा. डॉ. इन्द्र मणि यांनी केले. ते दिनांक ३० सप्टेंबर रोजी विद्यापीठाच्या नांदेड येथील कृषि महाविद्यालयात शैक्षणिक वर्ष २०२४ -२५ मध्ये बी. एससी. (कृषी) या पदवी अभ्यासक्रमास प्रथम वर्षात प्रवेश घेतलेल्या विद्यार्थ्यांसाठी आयोजित दीक्षारंभ समारंभात अध्यक्षस्थानावरून बोलत होते. ते पुढे म्हणाले की, महारष्ट्राच्या प्रशासनात विविध महत्त्वाच्या पदांवर या विद्यापीठातील विद्यार्थी यशस्वी सेवा बजावत आहेत. विद्यार्थ्यांनी शिस्तप्रिय आणि चारित्र्यवान होवून जीवनात उत्कर्ष साधावा आणि आदर्श नागरिक बनावे. याद्वारे विद्यार्थ्यांनी स्वतःचा आणि आपल्या कुटुंबियांचा विकास साधावा असे नमूद केले.

कार्यक्रमासाठी शिक्षण संचालक डॉ. उदय खोडके यांची प्रमुख उपस्थिती होती. प्रमुख मार्गदर्शक म्हणून नांदेड येथील वन विभागाचे, उप वन संरक्षक अधिकारी श्री केशव वाबळे (आयएफएस) हे होते. व्यासपीठावर कुलसचिव श्री संतोष वेणीकर, विद्यापीठाच्या कार्यकारी परिषदेचे सदस्य श्री भागवत देवसरकर, सहयोगी अधिष्ठाता डॉ. राजेश कदम, माजी  संशोधन संचालक (बियाणे) डॉ. देवराव देवसरकर आदींची उपस्थिती होती.

या प्रसंगी शिक्षण संचालक डॉ. उदय खोडके यांनी नवीन शैक्षणिक धोरण या शैक्षणिक वर्षापासून विद्यापीठात आवलंबिले जात असून यामध्ये शिक्षण जास्तीतजास्त व्यवसायाभिमुख व कौशल्याधारित करण्यात आले आहे. विद्यार्थ्यांनी स्वत:चे शिक्षण पूर्ण करत असतांना आपल्या विविध कला-गुणांना वाव देवून आनंददायी करण्यावर भर देण्यात आला आहे, असे प्रतिपादन केले.

उप वन संरक्षक अधिकारी श्री केशव वाबळे यांनी, सध्या स्पर्धेचा काळ असल्याने विद्यार्थ्यांनी स्वतःला सतत कार्यमग्न ठेवणे आवश्यक आहे. अभासाक्रमाच्या पहिल्या सत्रापासूनच आपले ध्येय निश्चित करावे व यश मिळवावे असे नमूद केले.

प्रास्तविकात  सहयोगी अधिष्ठाता डॉ. राजेश कदम यांनी नवीन शैक्षणिक धोरण आणि दीक्षारंभ कार्यक्रमाबद्दल माहिती दिली. तसेच विद्यार्थ्यांनी सर्वांगीण विकासासाठी प्रत्येक शैक्षणिक कार्यात तसेच क्रीडा स्पर्धेत सहभागी होणे आवश्यक आहे असे मत व्यक्त केले.

यावेळी डॉ. अरविंद पांडागळे, डॉ. सुजाता धूतराज, डॉ. विजय चिंचाने, डॉ. पवन ढोके, डॉ. संजय देवकुळे, डॉ. नरेशकुमार जायेवार, उज्वला सुरेवाड, प्रकाश सिंगरवाड, संतोष राठोड, जी पी इढोले, वर्षा ताटेकुंडलवार, श्रीकृष्ण वारकड आदीसह नवीन  प्रवेशित सर्व विद्यार्थी आणि त्यांचे पालक उपस्थित होते.