वनामकृविच्या अन्नतंत्रज्ञान महाविद्यालयात ‘दीक्षारंभ’ व विद्यार्थी-पालक-शिक्षक संवाद मेळावा उत्साहात संपन्न

विद्यार्थ्यांनी ज्ञान, कौशल्य आणि शिस्तीच्या बळावर यश संपादन करावे – माननीय कुलगुरू प्रा. (डॉ.) इन्द्र मणि

वसंतराव नाईक मराठवाडा कृषि विद्यापीठ, परभणी अंतर्गत अन्नतंत्रज्ञान महाविद्यालयात शैक्षणिक वर्ष २०२६-२७ मध्ये नवप्रवेशित विद्यार्थ्यांसाठी आयोजित ‘दीक्षारंभ’ तसेच ‘विद्यार्थी-पालक-शिक्षक संवाद मेळावा’ उत्साहपूर्ण वातावरणात संपन्न झाला. अन्न अभियांत्रिकी विभागाच्या परीक्षा सभागृहात दिनांक ९ ऑक्टोबर २०२६ रोजी आयोजित या कार्यक्रमात विद्यार्थ्यांना महाविद्यालयीन शिक्षणाची ओळख करून देण्यासोबतच त्यांच्या सर्वांगीण विकासासाठी पालक आणि शिक्षक यांच्यात समन्वय साधण्यावर भर देण्यात आला.

कार्यक्रमाचे उद्घाटन व अध्यक्षस्थान विद्यापीठाचे माननीय कुलगुरू प्रा. (डॉ.) इन्द्र मणि यांनी भूषविले. प्रमुख पाहुणे म्हणून शिक्षण संचालक डॉ. बाबासाहेब ठोंबरे आणि विस्तार शिक्षण संचालक डॉ. राकेश अहिरे उपस्थित होते. यावेळी महाविद्यालयाचे अधिष्ठाता डॉ. राजेश क्षीरसागर, शिक्षण प्रभारी डॉ. बी. एस. आगरकर यांच्यासह विभागप्रमुख, प्राध्यापक, कर्मचारी, विद्यार्थी आणि पालक मोठ्या संख्येने उपस्थित होते.

अध्यक्षीय भाषणात माननीय कुलगुरू प्रा. (डॉ.) इन्द्र मणि यांनी विद्यार्थ्यांनी उच्च शिक्षणाच्या उपलब्ध संधींचा योग्य उपयोग करून घ्यावा, असे आवाहन केले. ज्ञान, कौशल्य, सकारात्मक दृष्टिकोन आणि कठोर परिश्रम यांच्या बळावर विद्यार्थ्यांनी स्वतःचे व्यक्तिमत्त्व विकसित करावे. केवळ शैक्षणिक प्रगतीवर लक्ष केंद्रित न करता सामाजिक जबाबदारीची जाणीव ठेवावी आणि भविष्यातील आव्हानांना आत्मविश्वासाने सामोरे जावे, असा प्रेरणादायी संदेश त्यांनी दिला.

प्रमुख पाहुणे डॉ. बाबासाहेब ठोंबरे यांनी विद्यार्थ्यांना मार्गदर्शन करताना शिस्त, सातत्य, वेळेचे नियोजन आणि संयम या गुणांचे महत्त्व अधोरेखित केले. विद्यार्थ्यांनी नियमित अभ्यास करून विषयांचे सखोल ज्ञान संपादन करावे, महाविद्यालयातील शैक्षणिक व प्रात्यक्षिक सुविधांचा पुरेपूर लाभ घ्यावा आणि निश्चित ध्येयाच्या दिशेने सातत्याने प्रयत्न करावेत, असे आवाहन त्यांनी केले.

डॉ. राकेश अहिरे यांनी कृषि व अन्नप्रक्रिया क्षेत्रातील ज्ञान, आधुनिक तंत्रज्ञान आणि कौशल्यविकासाच्या वाढत्या संधींविषयी मार्गदर्शन केले. बदलत्या काळानुसार विद्यार्थ्यांनी तांत्रिक ज्ञानासोबत व्यावहारिक कौशल्ये विकसित करून भविष्यातील आव्हानांसाठी सज्ज व्हावे, असे त्यांनी नमूद केले.

प्रास्ताविकात डॉ. राजेश क्षीरसागर यांनी दीक्षारंभ कार्यक्रमाचे महत्त्व विशद केले. नवप्रवेशित विद्यार्थ्यांना महाविद्यालयीन शैक्षणिक वातावरणाची ओळख करून देणे, त्यांच्यात आत्मविश्वास निर्माण करणे आणि पालक-शिक्षक यांच्यात प्रभावी संवाद प्रस्थापित करणे हा या उपक्रमाचा मुख्य उद्देश असल्याचे त्यांनी सांगितले.

आंतरमहाविद्यालयीन क्रीडा व विविध स्पर्धांमध्ये अन्नतंत्रज्ञान महाविद्यालयाच्या विद्यार्थ्यांनी उल्लेखनीय कामगिरी केली. खो-खो स्पर्धेत २३ संघांमधून प्रथम क्रमांक पटकावत विद्यार्थ्यांनी सुवर्णपदक मिळविले. तसेच कबड्डी स्पर्धेत ३६ संघांमधून उत्कृष्ट खेळाचे प्रदर्शन करीत प्रथम क्रमांक आणि सुवर्णपदक प्राप्त केले. याशिवाय बास्केटबॉल, प्रश्नमंजुषा आणि वादविवाद स्पर्धांमध्येही विद्यार्थ्यांनी कौशल्यपूर्ण कामगिरी केली. या यशाबद्दल माननीय कुलगुरू प्रा. (डॉ.) इन्द्र मणि आणि उपस्थित मान्यवरांच्या हस्ते यशस्वी विद्यार्थ्यांचा गौरव करून त्यांचे अभिनंदन करण्यात आले.

यावेळी पालक प्रतिनिधींनी मनोगत व्यक्त करून विद्यार्थ्यांच्या शैक्षणिक प्रगतीसाठी पालक, शिक्षक आणि महाविद्यालय प्रशासन यांच्यात नियमित संवाद व परस्पर सहकार्य आवश्यक असल्याचे मत मांडले.

विद्यार्थी-पालक-शिक्षक संवाद मेळाव्याच्या माध्यमातून महाविद्यालयातील विविध विभागप्रमुख व प्राध्यापकांनी पालकांशी संवाद साधला. अभ्यासक्रम, शैक्षणिक व्यवस्था, प्रात्यक्षिक प्रशिक्षण आणि विद्यार्थ्यांच्या सर्वांगीण विकासासाठी उपलब्ध असलेल्या संधींची माहिती देण्यात आली. तसेच पालकांना महाविद्यालयातील विविध विभागांना भेट देऊन शैक्षणिक सुविधांची प्रत्यक्ष पाहणी करण्याची संधी मिळाली.

कार्यक्रमाच्या आयोजनासाठी विद्यार्थी बॅच २०२४ यांनी सहकार्य केले. कु. गायत्री शिंदे आणि कुमार सूरज बारी यांनी सूत्रसंचालन केले, तर डॉ. बी. एस. आगरकर यांनी आभार प्रदर्शन केले.

या कार्यक्रमामुळे नवप्रवेशित विद्यार्थ्यांना महाविद्यालयीन जीवन, शैक्षणिक वातावरण आणि उपलब्ध संधींची माहिती मिळाली. तसेच पालक, शिक्षक आणि महाविद्यालय प्रशासन यांच्यातील संवाद अधिक दृढ होण्यास मदत झाली. विद्यार्थ्यांच्या शैक्षणिक वाटचालीला सकारात्मक व प्रेरणादायी सुरुवात करून देणारा हा कार्यक्रम उत्साहात संपन्न झाला.